സൂപ്പര്‍ ബ്ലോഗര്‍ 2012

ബൂലോകം.കോം   പോര്‍ട്ടല്‍  നടത്തുന്ന സൂപ്പര്‍ ബ്ലോഗര്‍ 2012 അവാര്‍ഡു  വോട്ടിംഗ് തീരാന്‍ ഇനി രണ്ടു ദിവസം  കൂടി മാത്രം.  ഇത്  മൂന്നാം തവണയാണ് ബൂലോകം ഡോട്ട് കോമിന്റെ നേതൃത്വത്തില്‍ സൂപ്പര്‍ ബ്ലോഗര്‍ അവാര്‍ഡു  നടത്തപ്പെടുന്നത്.  ബഷീര്‍ വള്ളിക്കുന്ന്, നിരക്ഷരന്‍  എന്നിവരായിരുന്നു  മുന്‍ വര്‍ഷത്തെ അവാര്‍ഡു ജേതാക്കള്‍. 

മുന്‍  വര്‍ഷങ്ങളെ അപേക്ഷിച്ച്   വ്യക്തമായ തിരഞ്ഞെടുപ്പ് മാന മാനദണ്ഡങ്ങളോടെ  ആണ്  ഈ വര്‍ഷത്തെ  വോട്ടെടുപ്പ് നടത്തുന്നത് എന്ന് ബൂലോകം .കോം  ചെയര്‍മാന്‍ & പബ്ലിഷര്‍ ജെയിംസ്‌ ബ്രൈറ്റ്  നമ്മുടെ ബൂലോകത്തോട് പറഞ്ഞു. വായനക്കാരുടെ  വോട്ടിംഗ്  വഴി നടക്കുന്ന തെരഞ്ഞെടുപ്പിന്    അമ്പതു ശതമാനം  മാര്‍ക്ക് മാത്രമേ  നല്കുവെന്നും താഴെ  നല്‍കുന്ന വ്യക്തമായ  മാനദണ്ഡങ്ങള്‍  കണക്കിലെടുത്ത് മാത്രമേ  ഈ വര്‍ഷത്തെ സൂപ്പര്‍ ബ്ലോഗ്ഗര്‍ അവാര്‍ഡിന്  ആളുകളെ പരിഗണിച്ചിരിക്കുന്നത് എന്നും അദ്ദേഹം കൂട്ടിച്ചേര്‍ത്തു.  

തെരഞ്ഞെടുപ്പിന് കണക്കിലെടുത്ത മാനദണ്ഡങ്ങള്‍

1. മലയാളം അക്ഷരത്തെറ്റുകൂടാതെയും പരമാവധി വ്യാകരണപ്പിശകുകള്‍ ഒഴിവാക്കിയും എഴുതാനുള്ള കഴിവ്
2. രണ്ടായിരത്തി പന്ത്രണ്ടില്‍ ഈ- എഴുത്തില്‍ ഉള്ള സജീവ സാന്നിധ്യം
3. കൈകാര്യം ചെയ്യുന്ന വിഷയങ്ങളില്‍ ഉള്ള അറിവും, അതിനു അനുയോജ്യമായ ഈ-എഴുത്ത് മാധ്യമത്തിന്റെ തെരെഞ്ഞെടുപ്പും
4. സര്‍ഗാത്മകത
5. ജനസമ്മതിയും അഭിപ്രായങ്ങള്‍ സ്വരൂപിക്കാനുള്ള കഴിവും
6. എഴുത്തിന്റെ ഉയര്‍ന്ന ഗുണനിലവാരത്തിലൂടെ ഈ -എഴുത്തിനെ, പ്രിന്റ്‌ മാധ്യമങ്ങള്‍ക്കൊപ്പം മുഖ്യധാരയിലേക്ക് എത്തിക്കുവാനുള്ള പങ്കാളിത്തം
7. ഈ എഴുത്തില്‍ ആധുനിക സാങ്കേതിക വിദ്യകളുടെ അനുയോജ്യമായ ഉപയോഗത്തിലുള്ള വൈദഗ്ദ്ധ്യം
8. സൃഷ്ട്ടികളിലും അഭിപ്രായങ്ങളിലുമുള്ള മൗലികത

സൂപ്പര്‍ ബ്ലോഗര്‍ 2012 വോട്ട്  രേഖപ്പെടുത്തുവാന്‍ ഈ ലിങ്ക് വഴി പോകാം


കഴിഞ്ഞ വര്‍ഷത്തെ സൂപ്പര്‍ ബ്ലോഗര്‍  അവാര്‍ഡു ജേതാവായ ശ്രീ  നിരക്ഷരന്‍ എന്ന  മനോജ്‌ രവീന്ദ്രന്‍   തനിക്കു ലഭിച്ച  മുഴുവന്‍ അവാര്‍ഡു തുകയും  (13001 രൂപ)  കാസര്‍ഗോഡ്‌  എന്‍ഡോ  സള്‍ഫാന്‍ ദുരിതാശ്വാസനിധിയിലേക്ക്  സംഭാവനയായി നല്‍കി മാതൃകയായിരുന്നു.  നമ്മുടെ ബൂലോകം എഡിറ്റോറിയല്‍ ബോര്‍ഡ് അംഗം കൂടിയാണ്  ശ്രീ നിരക്ഷരന്‍ .

ടീം  നമ്മുടെ ബൂലോകം

We Salute......

നോർവേയിലെ ഫ്ജോർഡ് യാത്ര

 സജി മാർക്കോസ്

"നോർവേയിൽ പോകുന്ന സ്ഥിതിയ്ക്ക് ഫ്ജോർഡ് (fjord) യാത്ര ഒഴിവാക്കാൻ പറ്റില്ല" വർഷങ്ങൾ നോർവേയിൽ താമസിച്ചവനേപ്പോലെയാണ് ജയ്സന്റെ സംസാരം.

 "ഫ്രാങ്ക്ഫർട്ടിൽ നിന്നും നോർവേയുടെ തലസ്ഥാനമായ ഓസ്ലോയിൽ നമ്മുടെ ഫ്ലൈറ്റ് എത്തുന്നത് രാത്രി 10 മണിയ്ക്ക്. അപ്പോഴേയ്ക്കും ഓസ്ലോ സെന്റ്ട്രൽ റെയിൽ വേസ്റ്റേഷനിലുള്ള NSB ഓഫീസ് അടച്ചു പോകും. കാരണം നമ്മൾ ചെല്ലുന്നത് നിഭാഗ്യവശാൽ ശനിയാഴ്ചയാണ്. മറ്റേതെങ്കിലും ദിവസം ആയിരുന്നെങ്കിൽ കുഴപ്പം ഇല്ലായിരുന്നു.  അവിടെ നിന്നും ആണ് നമ്മുടെ ഫ്ജോർഡ് ടിക്കറ്റ് കളക്ട് ചെയ്യേണ്ടത്. അപ്പോൾ എന്തു ചെയ്യും? "

 ജയ്സൺ പറഞ്ഞുകൊണ്ടേയിരുന്നു, എങ്കിലും ഞാനതൊന്നും കാര്യമായി ശ്രദ്ധിച്ചില്ല. 

സാങ്കേതിക വിവരങ്ങളിൽ അസാമാന്യജ്ഞാനവും വളരെ കൃത്യതയുമുള്ള ഒരു സഹയാത്രികൻ ഉള്ളതിന്റെ ഗുണം കഴിഞ്ഞ പത്തിരുപതു വർഷമായി ഞാൻ അനുഭവിക്കുന്നതാണ്. ചോദ്യം ചോദിയ്ക്കുന്ന ആൾ തന്നെ അല്പം കഴിഞ്ഞ് ഉത്തരവും കണ്ടെത്തികൊള്ളും എന്ന് എനിയ്ക്ക് അറിയാമായിരുന്നു. 

ശ്രദ്ധിക്കാതിരുന്നതിന്റെ കാരണം അത് മാത്രമായിരുന്നില്ല. കമ്പ്യൂട്ടറിൽ കാണുന്ന നോർവേ ഫ്ജോർഡ് യാത്രയുടെ ചിത്രങ്ങൾ ആരുടേയും മനം മയക്കുന്നതായിരുന്നു. സഞ്ചാരികളുടെ സ്വപ്നയാത്രയായ ഫ്ലാം റെയിൽവെ- ലോകത്തിലേ ഏറ്റവും രസകരമായ   ട്രെയിൻ സഞ്ചാരം എന്നു സാക്ഷ്യപ്പെടുത്തിയ മനോഹരവും അതേസമയം സാഹസികവുമായ ഒന്നേകാൽ മണിക്കൂർ യാത്ര ആയിരുന്നു ഫ്ജോർഡ് ടൂറിന്റെ ഒന്നാമത്തെ  ആകർഷണം.

  
ഫ്ലാം ട്രെയിൻ

ഫ്ലാം റെയില്‍‌വേയിൽ 20 തുരങ്കങ്ങൾ, 4 വാട്ടർ ടണൽ, 1പാലം എന്നിവയാണുള്ളത് . സമുദ്ര നിരപ്പിൽ നിന്നും 02. മീറ്റർ ഉയരത്തിലുള്ള മിർഡാലിൽ നിന്നും ആരംഭിച്ച് 20 കി. മി താണ്ടി ഫ്ലാം റെയില്‍‌വേ സ്റ്റേഷണില്‍  എത്തുമ്പോൽ 870 മീറ്റർ ഉയരത്തിൽ എത്തുന്നു. ഫ്ലാമിൽ നിന്നും തുടർന്നുള്ളയാത്ര ക്രൂസിലാണ്. ഫ്ജോർഡ് എന്ന നോർവീജിയൻ വാക്കിന്റെ അർത്ഥം കുത്തനെയുള്ള കുന്നുകൾക്കിടയിൽ നീണ്ടുകിടക്കുന്ന ജലാശയം എന്നാണ്.പിന്നീട് നോർവീജിയൻ ഭാഷയിൽ നിന്നും ആ വാക്ക് ഇംഗ്ലീഷ്ഭാഷ അതേപടി സ്വീകരിക്കുകയായിരുന്നു.  

  

നോർവീജിയന്‍  ഫ്ജോർഡ് (from google)

ചെങ്കുത്തായ ചരിവുകളുള്ള കൂറ്റൻ പർവ്വതങ്ങൾ. അതിന്റെഇടുങ്ങിയ താഴ്വാരത്തിലൂടെ ഒരു പുഴ പോലെ നീണ്ടു പോകുന്ന നിശ്ചല ജലാശയം. ഇരുവശവും ആകാശം മുട്ടെ ഉയർന്നു നിൽക്കുന്ന പർവ്വതങ്ങൾക്കിടയിലൂടെയുള്ള ക്രൂസിലെ യാത്ര, ഫെബ്രുവരി മാസത്തിലെ കൊടും തണുപ്പ് -ഇതൊക്കെ സ്വപ്നം കണ്ടിരിയ്ക്കുകയാണ്ഞാൻ.

 "അപ്പോൾ, നോർവേ ഇൻ എ നട്ഷെൽ"  എന്ന് യാത്രയുടെ ടിക്കറ്റ് എടുക്കുന്നു. ഒകേ.....?"

 "ഒകെ" എന്നു ഞാനും 

 യൂറോറെയിലിന്റെ സന്ദർശകർക്കായുള്ള പാസ് എടുത്തിരുന്നതുകൊണ്ട് 25 % കിഴിവ് കഴിച്ച് 3,300 നോർവീജിയൻ ക്രോണർ. (NOK)

 "ഡൺ"   ജയ്സൺ

. "ബീപ് ബീപ്" ക്രഡിറ്റ് കാർഡിൽ നിന്നും പൈസ എടുത്തിരിയ്ക്കുന്നു എന്നു കാണിച്ച് മെസേജും വന്നു. 

 ഈ യാത്രയിൽ ഒരാളോടും വഴി ചോദിയ്ക്കരുതെന്നും ഒരു ടാക്സി പോലും പിടിയ്ക്കരുതെന്നും ഞങ്ങൾ തീരുമാനിച്ചിരുന്നു. യാത്രയ്ക്കുള്ള മുന്നൊരുക്കമായി പോകുന്ന എല്ലാ സ്ഥലത്തേക്കുറിച്ചും ഒരു യാത്രികൻ അറിയേണ്ട മുഴുവൻ വിവരങ്ങളും ശേഖരിച്ച്, എല്ലാ ടിക്കറ്റുകളും മുങ്കൂട്ടി വാങ്ങി, ഹോട്ടലുകൾ ബുക്ക് ചെയ്ത്, അങ്ങിനെ  വളരെ അസൂത്രിതമായ ഒരു യാത്രയായിരുന്നു ഞങ്ങൾ പദ്ധതിയിട്ടിരുന്നത്.

 പന്ത്രണ്ടോളം  രാജ്യങ്ങൾ കാണേണ്ടതുണ്ട്. യാത്രയേക്കാൾ രസകരം ഈ പദ്ധതിയൊരുക്കൽ ആണെന്നു ഞങ്ങളുടെ മുൻകാല അനുഭവങ്ങളിൽ നിന്നും അറിയാമായിരുന്നു. അതുകൊണ്ട് ഏതാണ്ട് 2 മാസക്കാലം എല്ലാ ദിവസവും മൂന്നും നാലും മണിക്കൂർ വീതം കമ്പ്യൂട്ടറിനു മുന്നിൽ ഇരുന്നു. പൊകേണ്ട റൂട്ടും അവിടുത്തെ പ്രധാന ആകര്‍ഷണങ്ങളും അതിനുള്ള പാ‍സുകളും റിസര്‍വ് ചെയ്തു.   എല്ലാ റിസർവേഷൻ പേപ്പറുകളും മൂന്നു കോപ്പി വീതം പ്രിന്റ് ചെയ്തു, ഓരോകോപ്പി ഓരോരുത്തരുടേയും കൈയ്യിലും, ഒരു കോപ്പി പൊതുവായും വച്ചു. ഓരോ രാജ്യത്തു ചെല്ലുമ്പോഴും ഉണ്ടാകുന്ന സമയ വ്യത്യാസങ്ങൾക്കനുസരിച്ച് ചാർട്ട് ഉണ്ടാക്കി,. കൂടാതെ മൊബൈൽ ട്രാവെൽ ആപ് ഉപയോഗിച്ച് എല്ലാ  പ്ലാനിംഗും  നടത്തുകയും ചെയ്തു. 

 എങ്കിലും രാത്രി 10 മണിയ്ക്ക് സ്കാൻഡിനേവിയൻ എയർലൈൻസിൽ ഓസ്ലോയിൽ വന്നിറങ്ങുമ്പോൾ അല്പം ഭയം തോന്നാതിരുന്നില്ല. കാരണം . അടുത്ത ദിവസത്തെ ഫ്ജോർഡ് യാത്രയുടെ കൺഫർമേഷൻ നമ്പർ അല്ലാതെ മറ്റൊന്നും കൈവശം ഇല്ല. ഞങ്ങൾ ഹോട്ടലിൽ പോകാതെ രാത്രി തന്നെ ഓസ്ലോ സെന്റ്ട്രൽ റെയില്‍‌വേ സ്റ്റേഷനിലെ ഓഫീസിൽ എത്തി. പക്ഷേ,ഓഫീസ് അടച്ചു പോയിരിക്കുന്നു. രാവിലെ 8 മണിയ്ക്കു യാത്ര ചെയ്യെണ്ടതാണ്, 10 മണിയ്ക്കേ ഓഫീസ് തുറക്കുകയുള്ളു എന്ന് ബോർഡ് വച്ചിരിയ്ക്കുന്നു.

 പക്ഷേ, ജയ്സണ് ഒരു കൂസലും ഇല്ലായിരുന്നു.

 "എന്തെങ്കിലും വഴി കാണാതിരിയ്ക്കില്ല"  അവൻ ഉറപ്പിച്ചു പറഞ്ഞു. 

 ഇതു മുൻകൂട്ടി കണ്ടിരുന്ന ഒരു പ്രതിസന്ധിതന്നെയായിരുന്നു. ഇത്തരം ഒരു സാഹചര്യത്തിൽ എങ്ങിനെ ടിക്കറ്റ് ലഭിയ്ക്കും എന്നു ചോദിച്ച് NSB യ്ക്ക് മെയിലും അയച്ചിരുന്നു. രണ്ടു വാചകത്തിൽ മറുപടിയും വന്നു.

"റെയിൽ വേസ്റ്റേഷനിൽ നിന്നും നിങ്ങൾക്ക് ടിക്കറ്റ് കളക്ട് ചെയ്യാനാകും"   ഇത്ര മാത്രം!

 എങ്ങിനെ കിട്ടും, ആരെ കാണണം, എന്നൊക്കെ ചോദിച്ച് ഞങ്ങൾ പിന്നേയും മൂന്നു മെയിലുകൾ കൂടി അയച്ചു.എല്ലാ പ്രാവശ്യവും ഉടൻ തന്നെ മറു പടിയും വന്നു. ആദ്യത്തെ അതേ വാചകങ്ങൾ. പിന്നെ ചോദിച്ചിട്ടു കാര്യമില്ല എന്നു മനസിലായി , ഓസ്ലോയിൽ ചെന്നിട്ടു നോക്കാം എന്നു സമാധാനിച്ച് എഴുത്തുകുത്തുകള്‍ അവസാനിപ്പിക്കുകയായിരുന്നു.

 "ദേ, ആ സ്ത്രീയുടെ ഓവർക്കോട്ടിൽ എഴുതിയിരിയ്ക്കുന്നത് NSB എന്നല്ലേ?" പതിവു പോലെ ജയസൺ അതു കണ്ടു പിടിച്ചു.

 ഒരു ചെറുപ്പക്കാരി കാപ്പി കുടിച്ചു കൊണ്ട് നിൽക്കുന്നു. ഞങ്ങൾ അടുത്തു ചെന്ന് വിവരങ്ങൾ തിരക്കി. ഞങ്ങളുടെ കൺഫർമേഷൻ നമ്പർ വാങ്ങി , അവർ അടച്ചിട്ടിരുന്ന NSB ഓഫീസ് തുറന്ന്, ഒരു കവർ കൈയ്യിൽ തന്നു , ശുഭ യാത്രയും നേർന്ന് നടന്നു മറഞ്ഞു. 

 ഞങ്ങൾ കവർ തുറന്നു.

ഓസ്ലോയിൽ നിന്നും മിർഡാൽ വരെയുള്ള ട്രെയിൽ ടിക്കറ്റ്, 

മിർഡാലിൽ നിന്നും ഫ്ലാം വരെയുള്ള ഫ്ലാം റെയിൽ വേ ടിക്കറ്റ്, 

ഫ്ലാമിൽ നിന്നും ഗഡ്വാഞ്ചൻ വരെയുള്ള ഫ്ജോർഡ് ക്രൂസ് ടിക്കറ്റ്, ഗഡ്വാഞ്ച്ചൻ മുതൽ വോസ്സ് വരെയുള്ള ബസ് ടിക്കറ്റ്, 

വോസ്സിൽ നിന്നും ബർഗൻ വരെയുള്ള ട്രെയിൻ ടിക്കറ്റ്! 

 എല്ലാം ഭദ്രം! രാവിലെ 8 മണിയ്ക്ക് ആരംഭിച്ച് രാത്രി 8. 15 അവസാനിയ്ക്കുന്ന യാത്രയുടെ മുഴുവൻ വിവരങ്ങളും അടങ്ങിയ ഒരു ചെറിയ പുസ്തകവും. 

വിവിധ ഏജൻസികൾ നടത്തുന്ന ഇത്തരം യാത്രകളുടെ ഏകോപനവും, യാത്രക്കാർക്ക് നൽകുന്ന സേവനവും നമ്മുടെ ടൂറിസം വകുപ്പ് മാത്രകയാക്കേണ്ടതാണ്.

 യാത്ര അവസാനിയ്ക്കുന്ന ബർഗൻ റെയിൽ വേസ്റ്റേഷണിൽ നിന്നും 200 മീറ്റർ മാത്രം ദൂരെ സ്ഥിതി ചെയ്യുന്ന ഹോട്ടൽ റിക്കാ  ആണ്‌ പിറ്റേദിവസം  ദിവസം രാത്രി തങ്ങുവാൻ ബുക്ക് ചെയ്തിരുന്നത്. റെയില്‍‌വേസ്റ്റേഷന്റെയോ എയർപ്പോർട്ടിന്റെയോ തൊട്ടടുത്തുള്ള ഹോട്ടലുകൾ ആണ് ബുക്ക് ചെയ്തിരുന്നതെല്ലാം. സന്ദർശകർ കുറവായ ശൈത്യകാലത്ത് അസമയത്തു ചെന്നു പെട്ടാൽ ദൂരെ സ്ഥലങ്ങളില്‍ എത്തിപ്പെടുവാന്‍ ബുദ്ധുമുട്ട് ഉണ്ടാകുമെന്ന് ഞങ്ങൾ മനസിലാക്കിയിരുന്നു.

 "സമാധാനമായല്ലോ- ഇനി ഹോട്ടലിലേയ്ക്കു പോകാം"  ജയ്സൺ പെട്ടിയും വലിച്ചു കൊണ്ട് മുൻപിൽ നടന്നു.

 പുറത്ത് മൈനസ് പന്ത്രണ്ട് ഡിഗ്രിയാണ് ചൂട്. നിരത്തുകളിൽ വാഹനത്തിരക്കില്ല. വല്ലപ്പോഴും ഒരു വണ്ടി വന്നു പോകുമ്പോള്‍ മാത്രം റോഡിന്റെ കറുപ്പു നിറം പുറത്തുകാണാം. നിമിഷങ്ങല്ക്കുള്ളിൽ വീണ്ടും മഞ്ഞു വീണു മൂടും. മരങ്ങളെല്ലാം ഇലകൊഴിച്ച് ശിഖരങ്ങൾ മഞ്ഞിൽ മൂടി നിൽക്കുന്നു.  പട്ടണത്തിൽ എല്ലാം ചെറിയ ചെറിയ കെട്ടിടങ്ങൾ മാത്രം. കാൽനടക്കാർ ആരെയും കാണാനില്ല. അംകർ ഹോട്ടലിലേയ്ക്ക് പത്തു മിനിറ്റോളം   നടക്കണം. 

കോട്ടൺ കൈയ്യുറയ്ക്കു മുകളിൽ വാട്ടർ പ്രൂഫ് കൈയ്യുറ എടുത്തു ധരിച്ചു. രണ്ടാമത്തെ തൊപ്പിയുടെ വള്ളിയും മുറുക്കി.മഫ്ലർ വലിച്ച് മൂക്കു വരെ മൂടി.സ്കാൻഡിനേവിയയിൽ ശൈത്യകാലത്തു പൊതുവെ മൂന്നു അടുക്കു വസ്ത്രങ്ങളാണ് ധരിയ്ക്കുന്നത്. മൂക്കും കണ്ണും മാത്രം പുറത്തു കാണുകയുള്ളൂ. 

ഒരു കൈയ്യിൽ ഹോട്ടലിലേയ്ക്കുള്ള വഴികാട്ടി നാവിഗേറ്ററും മറ്റേക്കൈയ്യിൽ പെട്ടിയും വലിച്ചുകൊണ്ട് വിജനമായ റോട്ടിലെ പൊടിമഞ്ഞിലൂടെ ഞങ്ങൾ നടന്നു. ചുറ്റും മഞ്ഞു പെയ്തുകൊണ്ടിരിന്നു. വര്‍ഷത്തില്‍ എല്ലാ മാസവും തണുപ്പാണെങ്കിലും നോര്‍‌വ്വേക്കാര്‍ തണുപ്പിനെ ഇഷ്ടപ്പെടുന്നവരാണ്‌. "മോശം തണുപ്പ് എന്നൊന്നില്ല, മറിച്ച് മോശമാകുന്നത്   വസ്ത്രധാരണം ആണ്" എന്ന പ്രശസ്തമായ നോര്‍‌വ്വേ പഴമൊഴി അവരുടെ തണുപ്പിനോടുള്ള മനോഭാവത്തെ കാണിക്കുന്നു.

വഴിൽ കണ്ട ഒരു ചെറിയ റെസ്റ്റാറന്റിൽ കയറി. എല്ലാവരും അഹാരത്തോടൊപ്പം വീഞ്ഞും കുടിയ്ക്കുന്നു. തണുപ്പിനെ പ്രതിരോധിയ്ക്കുവാനുള്ള ഏറ്റവും നല്ല മാർഗ്ഗം അതാണത്രേ!

ഉപഭോഗവസ്തുക്കൾക്ക് ലോകത്തിലേ ഏറ്റവും വിലകൂടിയ പട്ടണങ്ങളിൽ ഒന്നാണ് ഓസ്ലോ.ഒരു കിലോ അരിയ്ക്കു 250 രൂപ, ഒരു പാകറ്റ് സിഗരിറ്റിനു 900 രൂപ. വിലക്കൂടുതൽ കൊണ്ടായിരിയ്ക്കണം പുകയില വാങ്ങി സിഗരറ്റ് തെറുത്ത് വലിയ്ക്കുന്നവരും കുറവല്ലായിരുന്നു.

 നോർവീജിയൻ യുവാവ് സിഗരറ്റ്  തെറുക്കന്നത് കണ്ട് പഠിക്കുന്ന ജയ്സൺ

പൊതുവേ നോർവ്വേക്കാർ അപരിചതരോട് ഭവ്യതയോടെ ഇടപെടുന്ന മനുഷ്യരായി തോന്നി. സംശയങ്ങൾ മാന്യമായി മറുപടി പറയുകയും, ചിരിച്ചുകൊണ്ട് സംസാരിയ്ക്കുകയും ചെയ്യുന്ന നല്ല മനുഷ്യർ. പൗരസ്വാതന്ത്രത്തിന് ഏറ്റവും കൂടുതൽ വിലകൽപ്പിക്കുന്ന നോർവേയാണ് ലോകത്തിലെ   ക്രിമനൽ റേറ്റ് ഏറ്റവും കുറവുള്ള രാജ്യവും. ലോക സമാധാനത്തിനുള്ള നോര്‍വ്വേയുടെ സംഭാവനകളെ മാനിച്ച്  സമാധാനത്തിനുള്ള നോബല്‍ സമ്മാനം എല്ലാ വര്‍ഷവും നല്‍കുന്നത് ഓസ്ലായില്‍ വച്ചു നടത്തപ്പെടുന്ന ചടങ്ങില്‍  വച്ചാണ്. ലോകത്തില്‍ താമസിയ്ക്കാന്‍ കൊള്ളാവുന്ന  ഏറ്റവും നല്ല രാജ്യം എന്നു യുണൈറ്റഡ് നേഷന്‍സ് സാക്ഷ്യപ്പെടുത്തിയ രാജ്യമാണ്‌ നോര്‍‌വ്വേ.

ഡെന്മാർക്ക്, സ്വീഡൺ , നേർവ്വേ എന്നീ രാജ്യങ്ങളെ ചേർത്തു  വിളിച്ചിരിന്ന  സ്കാൻഡിനേവ്യ എന്ന പേര്  ഇന്നു ലോപിച്ച് സ്കാനിയ എന്നാണ്  പൊതുവെ പറയപ്പെടുന്നത്.  യൂറോപ്യൻ യൂണിയന്റെ അംഗമല്ലാത്ത ഒരു യൂറോപ്യൻ രാജ്യമാണ് നോർവ്വേ എന്നതും ഈ രാജ്യത്തിന്റെ മറ്റൊരു പ്രത്യേകതയാണ്. ലോകത്തിലേ ഏറ്റവും ഉയർന്ന പ്രതിശീർഷ വരുമാനുള്ള രാജ്യങ്ങളിൽ ഒന്നായ നോർവ്വേയുടെ പ്രധാന വരുമാനം മാർഗ്ഗം എണ്ണയും പ്രകൃതി വാതകങ്ങളും ആണ്. എണ്ണ കയറ്റുമതിയിൽ അഞ്ചാമത്തേയും പ്രകൃതിവാതക കയറ്റുമതിയിൽ മൂന്നാമത്തേയും സ്ഥാനം നോർവ്വേയ്ക്കുണ്ടെങ്കിലും എണ്ണ ഉല്പാദക രാജ്യങ്ങളുടെ യൂണിയനിൽ  (OPEC) നോർവ്വേ അംഗത്വമെടുത്തിട്ടില്ല.  എണ്ണ പര്യവേഷണത്തിനുള്ള ഏറ്റവും നൂതന സാങ്കേതിക വിദ്യകൾ വികസിപ്പിക്കുന്നതിൽ നോർവ്വേ  മുൻപന്തിയിൽ ആണുള്ളത്. ഏതാണ്ട് പൂർണ്ണമായും      ജലവൈദ്യുത പദ്ധതികളെ ഊർജ്ജസ്രോത്സായി ആശ്രയിക്കുന്ന നോർവ്വേയിൽ ആണവനിലയങ്ങൾ ഒന്നും പ്രവർത്തനത്തിലില്ല. 

ലൂഥറൻസ് സഭയാണ് നോർവ്വേയിലെ പ്രമുഖ മതം എങ്കിലും 32% പൗരന്മരും ദൈവ വിശ്വാസികളല്ല എന്നു  യൂറോബാരോമീറ്റർ  സർവേയിൽ പറയുന്നു. (യൂറോപ്പ് വാസികളുടെ വിവിധ വിഷയങ്ങളിലുള്ള നിലപാടും  നിലവാരവും അളക്കുന്നതിന് നടത്തപ്പെടുന്ന സർവ്വേ ആണ് യൂറോബാരോമീറ്റർ)

ആയിരം വർഷം പഴക്കമുള്ള തടിയിൽ നിർമ്മിച്ച സ്റ്റേവ് ചർച്ചുകളാണ് നോർവ്വേയുടെ മറ്റൊരു ആകർഷണം . തൂണുകളും തുലാങ്ങളും വലിയ തടിയിൽ പൊഴികളുണ്ടാക്കി  ഉറപ്പിച്ച് ആണികൾ ഒന്നും ഉപയോഗിക്കാതെ  
നിരവധി നിലകളിൽ  പണിതുയർത്തിയിരിയ്ക്കുന്ന  പ്രത്യേകതരം  നിർമ്മിതികളാണ് സ്റ്റേവ് ചർച്ചുകൾ.  ഇത്തരം  28 ചർച്ചുകൾ പൂർണ്ണമായും പരിരക്ഷിക്കുവാൻ നോർവ്വേ സർക്കാരിന് കഴിഞ്ഞിട്ടുണ്ട്.

സ്റ്റേവ് ചര്‍ച്ചിന്റെ ഉള്‍വശം

കൊടിയ തണുപ്പത്ത് മറ്റൊന്നും ചെയ്യാനില്ലാത്തതുകൊണ്ട്, ഞങ്ങൾ  ഭക്ഷണം കഴിച്ച് കിടന്നുറങ്ങി.

 ഉറങ്ങുന്നതിനു മുന്‍പ് ഫ്രാങ്ക്ഫര്‍ട്ട് എയര്‍ പോര്‍ട്ടിലെ  ചെക്കിംഗ് സിസ്റ്റം ഒരിക്കല്‍കൂടി ഞങ്ങള്‍ക്ക് ഓര്‍മ്മിക്കാതിരിക്കാനായില്ല. പൂര്‍ണ്ണമായി  അണ്‍മാന്‍ഡ് ചെക്ക്-ഇന്‍ സിസ്റ്റം. എയര്‍ ലൈന്‍സിന്റെ പ്രവേശനം കവാടത്തില്‍  വച്ചിരിയ്ക്കുന്ന സ്കാനറില്‍ ടിക്കറ്റിന്റെ പ്രിന്റ് ഔട്ടിലെ ബാര്‍ കോഡും പാസപ്പോര്‍ട്ടിന്റെ ആദ്യം പേജും സ്കാന്‍ ചെയ്യുമ്പോല്‍ ബൊര്‍ഡിംഗ് പാസ്സ്  പ്രിന്റ് ചെയ്തു വരുന്നു. ലഗേജ് അയക്കേണ്ട കമ്പാര്‍റ്റ്മെന്റില്‍ വയ്ച്ചു കഴിയിമ്പോല്‍ സ്ക്രീ‍നില്‍  ക്ര്ത്യമായ നിര്‍ദ്ദേശങ്ങള്‍- ഇടത്തേയ്ക്കു തിരിയ്ക്കുക,കൈപ്പിടി മുകളിലായി വയ്ക്കുക. അവസാനം എല്ലാം ശരിയായപ്പോല്‍  ലഗേജ് അയക്കട്ടേ എന്നൊരു ചോദ്യം. പക്ഷേ ഞങ്ങള്‍ക്ക്  ലഗേജില്‍ ഒട്ടിച്ച സ്റ്റിക്കറിന്റെ കൌണ്ടര്‍ റെസിപ്റ്റ് കിട്ടുന്നില്ല. ലഗേജ് പോയാല്‍ ഒരു തെളിവും ഇല്ല, ചോദിക്കാന്‍ ഒരു മനുഷ്യനും ഇല്ല. രണ്ടും കല്പിച്ച് ഒക്കെ അടിച്ചു. നിമിഷങ്ങള്‍ക്കുള്ളില്‍ ഒരു ചെറിയ രശീതി പ്രിന്റ് ചെയ്തു വന്നു- എല്ലാം ഭദ്രം! സെക്യൂരിറ്റി സ്കാനിംഗ് ആണ് ഏറ്റവും രസകരമായി തോന്നിയത്.  സ്കാനര്‍ ഒകെ പറയാതെ മുന്നിലെ ഗേറ്റ് തുറക്കില്ല. അല്ലാതെ നമ്മുടെ നാട്ടിലെ എയര്‍പ്പോര്‍ട്ടിലേതുപോലെ നോക്കുകുത്തി സ്കാനര്‍ അല്ല. സ്കാനിംഗ് കഴിഞ്ഞ് പോക്കറ്റിലും കഷത്തിലും കൈയ്യിട്ടു നോക്കാന്‍ സി ഐ എസ് എഫുകാരനും ഇല്ല. സ്കാന്‍ഡിനേവിയന്‍ എയര്‍ ലൈന്‍സ് പോലെ നിസാര തുകയ്ക്ക് സര്‍വീസ് നടത്തുന്ന കമ്പനികള്‍ മുക്കിനും മൂലയ്ക്കും സഹായത്തിന് ജോലിക്കാരെ നിര്‍ത്തിയാല്‍ ലാഭകരമായി പ്രവര്‍ത്തിക്കാന്‍ കഴിയില്ല എന്നതായിരിയ്ക്കും കാരണം .

 രാവിലെ സമത്തു തന്നെ സെൻട്രൽ റെയിൽ വേ സ്റ്റേഷനിലേയ്ക്ക് തിരിച്ചു. ഓസ്ലോയിൽ നിന്നും മിർഡാലിലേയ്ക്കുള്ള ട്രെയിൽ യാത്രയാണ് ആദ്യം. കൃത്യ 08.11 ന് തന്നെ തീവണ്ടി പുറപ്പെട്ടു.

 യാത്രക്കാർ ആരും തന്നെയില്ല. എല്ലാ ബോഗികളും കാലിയായി കിടക്കുന്നു. നല്ല വൃത്തിയുള്ള കമ്പാർട്ട്മെന്റ്. ഉള്ളില്‍ ഒരു ലഘു ഭക്ഷണ ശാല, ഹോട്ടൽ മുറിയ്ക്കു സമാനമായ  വിശാലമായ ഇരിപ്പിടങ്ങൾ . നാലര മണിക്കൂർ യാത്രയുണ്ട് മിർഡാൽ വരെ. മേൽ വസ്ത്രങ്ങൾ എല്ലാം അഴിച്ചു വച്ചു. ട്രെയിനിന്റെ  ഏസിയിൽ നിന്നും  നല്ല സുഖകരമായ ചെറിയചൂട് .

 പുറത്ത് കാണ്ണെത്തുന്ന ദൂരം മുഴുവൻ വെളുത്ത മഞ്ഞ്. ഇടയ്ക്കിടയ്ക്ക് കടും നിറത്തിലുള്ള ചെറിയ ഒറ്റപ്പെട്ട വീടുകൾ.വീട്ടു മുറ്റവും  റോഡുകളും  മഞ്ഞിൽ മൂടിക്കിടക്കുന്നു. വീടിന്റെ ചിമ്മിനികളിൽ നിന്നും പുകുയുയരുന്നുണ്ട്- പുറത്ത് ആരേയും കാണാനില്ലെങ്കിലും വീട്ടുള്ളിൽ ആളുകൾണ്ട്.

 ട്രെയിൻ ഇടയ്ക്കിടയ്ക്ക് ചില സ്റ്റേഷനുകളിൽ നിർത്തുന്നുണ്ടെങ്കിലും ആരും കയറുന്നതും ഇറങ്ങുന്നതും ഇല്ല. പുറത്തെ തണുപ്പ് ഇന്നലേത്തേതിൽ നിന്നും  അല്പം കുറഞ്ഞിരിയ്ക്കുന്നു -മൈനസ് ഏഴു ഡിഗ്രീ . 

 ഓരോ സ്റ്റേഷനിൽ എത്തുമ്പോൽ ഞങ്ങൾ ക്യാമറയുമെടുത്ത് പെട്ടെന്നു പുറത്തിറങ്ങും. കോട്ടും തൊപ്പിയും ഗ്ലൗസ്സുമില്ലാത്ത തൂവെള്ള മഞ്ഞിൽ ഇരിന്നും കിടന്നും ഫോട്ടോ എടുക്കും. കൂടിയാൽ രണ്ടു മിനിറ്റ് അതിൽ കൂടുതൽ പിടിച്ചു നിൽകാനാവില്ല. ഇത്തരം ഒരു രാജ്യത്ത് ക്രിമനൽ റേറ്റ് കുറഞ്ഞതിൽ അൽഭുതപ്പെടാനില്ലെന്നു തോന്നി. പുറത്തിറങ്ങിയിട്ടു വേണ്ടെ കുറ്റം ചെയ്യാൻ!.

പത്തു മണി കഴിഞ്ഞപ്പോഴേയ്ക്കും ഫിൻസ് സ്റ്റേഷനിൽ എത്തി. വടക്കേ യൂറോപ്പിലെ ഏറ്റവും ഉയരം കൂടിയ റെയൽവേ സ്റ്റേഷൻ ആണ് ഫിൻസ്. റെയിൽ മാർഗ്ഗം അല്ലാതെ ഫിൻസിൽ എത്തിച്ചേരുവാൻ റോഡുകളില്ല. മഞ്ഞുകാലത്ത് ഫിൻസ് ഒരു പേരു കേട്ട സ്കീയിം ലോക്കേഷൻ ആണ്.

ഒന്നു രണ്ട് ഹോട്ടലുകളും, റെയില്വേസ്റ്റേഷനും മാത്രമേ ഫിൻസിലുള്ളൂ. ഇതിനിടയിൽ എവിടെ നിന്നോ ചില യാത്രക്കാർ കയറിയിരുന്നു. അവർ സ്കീയിം ഗ് ഭാണ്ഡവും പേറി മലമുകളിലേയ്ക്കു നടന്നു പോകുന്നത് കണ്ടു. കുഞ്ഞു കുട്ടികളും അവരോടൊപ്പം ഉണ്ടായിരുന്നു.

ഫിൻസ് സ്റ്റേഷനിലെ ഓട്ടോറിക്ഷ

 ട്രെയിൻ ഫിൻസ് സ്റ്റേഷൻ വിടുന്നതിനു മുൻപ് ഞങ്ങൾക്ക് മൂന്നു കൂട്ടുകാരെ കിട്ടി. ഒരമ്മയും രണ്ടു പെണ്മക്കളും. ഡെന്മാർക്കിൽ നിന്നും ഊരു ചുറ്റാൻ ഇറങ്ങിവരാണ്. 

അവരോട് സംസാരിച്ചും നാട്ടു വിശേഷങ്ങൾ പറഞ്ഞും ഫോട്ടോ എടുത്തും ഫ്ലാം റെയില്‍ വേസ്റ്റേഷനിൽ എത്തിയത് അറിഞ്ഞില്ല. മഞ്ഞ് മൂടിക്കിടക്കുന്ന മറ്റൊരു സ്റ്റേഷൻ. പച്ച നിറത്തിലുള്ള ചെറിയ ട്രെയിനായിരുന്നു ഫ്ലാം ട്രെയിൻ

 ഞങ്ങൾ ഫ്ലാം   ട്രെയിനിൽ കയറിപ്പറ്റി.

ഫ്ലാം ട്രെയിൻ

 വലിയ കുന്നിൻ ചരുവിലൂടെ സാവാധാനത്തിലായിരുന്നു യാത്ര.  ഈ മഞ്ഞു മൂടിക്കിടക്കുന്ന മലകളെല്ലാം വേനൽക്കാലത്ത് പച്ച പുതച്ചു നിൽക്കും. ഇലകൊഴിഞ്ഞ ശിഖരങ്ങൾ വീണ്ടും തളിർക്കും. ഇപ്പോൾ എല്ലാം ഉറങ്ങുകയാണ്. അതിന്റെ നടുവിൽ ഒച്ചിഴയുന്നതു പോലെ ഫ്ലാം ട്രെയിൽ. അതിൽ ഞങ്ങൾ അഞ്ചു യാത്രകാർ. ഇടയ്ക്കിടയ്ക്കു തുരങ്കത്തിലെ കൂരിരുട്ട്. ശാന്തവും നിശബ്ദവുമായ അന്തരീക്ഷം.

പുറത്ത് ദൂരെ മലഞ്ചെരുവിൽ സ്കീയിംഗിനു വേണ്ടി യാത്രക്കാർ മലമുകളിലേയ്ക്ക് കയറിപ്പോകുന്നതു കണാം. പുറത്ത് അസഹനീയമായ തണുപ്പാണെങ്കിലും ഉള്ളിൽ ഏസിയിൽ നിന്നും വരുന്ന സുഖമുള്ള ചെറു ചൂടുകാറ്റ്.    ഒരു അവധിക്കാല യാത്രയ്ക്കു പറ്റിയ ഇടം തന്നെ. 

 ഒരു മണിക്കൂർ യാത്രയുണ്ടായിരുന്നു ഫ്ലാം ട്രെയിനിൽ. ഫ്ലാം സ്റ്റേഷനിൽ എത്തി . സമയം 3 മണി. ഉച്ച ഭക്ഷണം കഴിച്ചില്ല. എങ്കിലും യാത്രയ്ക്കു തയാറായി ക്രൂസ് കിടക്കുന്നതുകൊണ്ടപ്പ്ല് വിശപ്പ് തോന്നിയില്ല. ട്രെയിനിൽ നിന്നും ഇറങ്ങി നടന്നു. വീതികൂടിയ ഒരു പ്ലാറ്റ് ഫോം. അതിന്റെ  ഒരു വശത്ത് ട്രെയിൽ , മറുവശത്ത് ബോട്ട്! വളരെ രസകരമായി തോന്നി അവരുടെ ആസൂത്രണങ്ങൾ!  അപരിചിതരായ സന്ദർശകർക്ക് പോലും   ആരോടും ഒന്നും ചോദിയ്ക്കേണ്ടിവരില്ല. പ്ലാറ്റ് ഫോമിൽ നിന്നും എപ്പോഴും മഞ്ഞു കോരി മാറ്റി വൃത്തിയാക്കിക്കൊണ്ടിരിയ്ക്കുന്നു.

 പ്ലാറ്റ്ഫോമിന്റെ  ഒരു വശത്ത് ക്രൂസ് മറുവശത്ത് ട്രെയിൻ

ഫ്ലാമിൽ നിന്നും ഗഡ്വാഞ്ചാൻ വരെ ക്രൂസിൽ രണ്ടര മണിക്കൂർ യാത്രയുണ്ട്. അമ്മയം മക്കളും ഞങ്ങളോടൊപ്പം ബോട്ടിൽ കയറി.സ്റ്റേഷനിൽ ഒന്നു രണ്ടു കുടംബങ്ങൾ  കൂടി ക്രൂസ് യാത്രയ്ക്കുണ്ടായിരുന്നു.

   ഒരു അവിസ്മരണീയമായ യാത്രയായിരുന്നു ഫ്ജോർഡ് ക്രൂസ്. മഞ്ഞു പാളികൾ പൊങ്ങിക്കിടക്കുന്ന നരച്ച നിറത്തിലുള്ള വെള്ളം . ഇരു വശങ്ങളിലും വൻ മലകൾ. മലഞ്ചെരുവിൽ മഞ്ഞിനിടയിൽ അവിടവിടെയായി തെളിഞ്ഞു കാണുന്ന കറുത്ത പാറകൾ. ഇളം കറുപ്പും വെളുപ്പും അല്ലാതെ ചുറ്റുപാട് എങ്ങും മറ്റൊരു നിറമില്ല. ഏതോ ബ്ലാക് ആൻഡ് വൈറ്റ് പടത്തിലെ രംഗങ്ങൾ പോലെ തോന്നിപ്പിച്ചു . ബോട്ടിന് പിന്നിൽ   ജലത്തിൽ വീഴുന്ന നീണ്ട വരകൾ നോക്കിയിരുന്നു. തണുപ്പിൽ ആ വരകളും ഉറഞ്ഞു പോയതു പോലെ!

 ഫ്ജോറ്റ്ഡ് യാത്ര ഗഡ്വാഞ്ചനിൽ എത്തിയപ്പോൾ സമയം  അഞ്ചര.  അഞ്ചു മണി ആകുമ്പോഴേയ്ക്കു രാത്രിയാകുമെങ്കിലും  നേർത്ത വെളിച്ചം   എപ്പോഴും ഉണ്ടായിരിയ്ക്കും. ധ്രുവപ്രദേശത്തോട് ചേർന്ന രാജ്യങ്ങളിൽ രാത്രി സമയം കൂടുതലാണ്. തണുപ്പുകാലത്ത് പ്രത്യേകിച്ചും.  വേനല്‍ക്കാലത്ത് രാത്രി പന്ത്രണ്ടു മണിയ്ക്കും നോര്‍‌വേയില്‍ സൂര്യവെളിച്ചം ലഭിക്കും. അതുകൊണ്ടാണ്‌ ഈ രാജ്യം പാത്രിരാ സൂര്യന്റെനാട് എന്ന പേരില്‍ അറിയപ്പെടുന്നത്.  ഇനി വോസ്സു വരെ ഒരു മണിക്കൂർ, ബസ്സിലും വോസ്സിൽ നിന്നും ബർഗൻ വരെ ഒരു മണിക്കൂർ ട്രെയിനിലും സഞ്ചരിയ്ക്കണം.

 യാത്ര തുടങ്ങിയ ഓസ്ലോ നോർവേയുടെ കിഴക്കേയറ്റത്തും യാത്ര അവസാനിപ്പിക്കുന്ന ബെർഗൻ പടിഞ്ഞാറേ അറ്റത്തുമാണ് സ്ഥിതി ചെയ്യുന്നത്. 1800 കള്‍ വരെ സ്കാന്‍ഡിനേവ്യയിലെ ഏറ്റവും വലിയ പട്ടണം ബര്‍ഗന്‍ ആയിരുന്നു. പിന്നീട് ഡെന്മാര്‍ക്കും, സ്വീഡനും സ്വതന്ത്രമായി. നോര്‍വ്വേയുടെ തലസ്ഥാനം ഓസ്ലോയുമായി . അങ്ങിനെ ബെര്‍ഗന്റെ പ്രാധാന്യം കുറഞ്ഞു.

 ബെര്‍ഗന്‍ പട്ടണം

അടുത്ത ദിവസത്തെ യാത്ര ബർഗനിൽ നിന്നും വിമാന മാർഗ്ഗം ഓസ്ലോ വഴി ഫിൻലൻഡിന്റെ തലസ്ഥാനമായ ഹെൽസിങ്കിയിലേയ്ക്കാണ്. രാവിലെ ഉണരേണ്ടതുണ്ട്. അതുകൊണ്ട് കിട്ടിയ സമയം ബസിൽ കിടന്നു തന്നെ ഒന്നു ഉറങ്ങാൻ തന്നെ തീരുമാനിച്ചു. കഴിയുമെങ്കിൽ ഇവിടെ ഒരു വേനൽക്കാല യാത്ര കൂടി നടത്തണം എന്നു ചിന്തിച്ചു, ഉറക്കത്തിലേയ്ക്ക് പ്രവേശിച്ചു.


(അടുത്ത ഭാഗം - സാന്താക്ലൊസ് വില്ലേജ്, ഫിന്‍ലാന്‍ഡ്)

ദീപം വഹിച്ച ദൂതന്‍

Deepavali Special  By Arun Kayamkulam

ഭരതന്‍ ഉറങ്ങിയിരുന്നില്ല.

പതിനാല്‌ വര്‍ഷം, നീണ്ട പതിനാലു വര്‍ഷമായുള്ള കാത്തിരുപ്പാണ്.ജ്യേഷ്ഠന്‍ വരുമെന്ന് ഉറപ്പാണ്, എങ്കിലും മനസ്സില്‍ ആകെ അസ്വസ്ഥത.അയോദ്ധ്യാവാസികളെല്ലാം 

കൂടെയുണ്ട്, പോരാത്തതിനു ശത്രുഘ്നനും.

പാദുകം പൂജിച്ച് കൊണ്ട് പതിനാലു വര്‍ഷമായി കഴിയുന്നു...

ജ്യേഷ്ഠാ, അങ്ങ് എവിടെയാണ്??

തഴുകി കടന്ന് പോയ മന്ദമാരുതന്‍ പോലും മറുപടി പറയുന്നില്ല, അവരും തന്നോട് പിണക്കമായിരിക്കും.ജ്യേഷ്ഠനെ വനത്തിലേക്ക് അയച്ച പാപിയായൊരമ്മയുടെ 

മകനാണല്ലോ താന്‍.കാലം ഒരുപക്ഷേ നാളെ തനിക്കും അധികാരമോഹമായിരുന്നെന്ന് പറയുമോ?

അങ്ങനെ പറയാതിരിക്കണമെങ്കില്‍ ജ്യേഷ്ഠന്‍ വരണം.

ശ്രീരാമദേവാ, അങ്ങ് എവിടെയാണ്??

മറുപടി നിശബ്ദതയായിരുന്നു.

ഭരതന്‍റെ സങ്കടം കാണാന്‍ വയ്യാതെ ശത്രുഘനന്‍ പുറത്തേക്കിറങ്ങി.തന്‍റെ ജ്യേഷ്ഠന്‍റെ മനസ്സ് വേദനിക്കുന്നത് അവനു സഹിക്കുമായിരുന്നില്ല.ഇതിപ്പോള്‍ ആദ്യമായല്ല, 

ശ്രീരാമദേവനെ വേര്‍പിരിഞ്ഞ അന്ന് തുടങ്ങിയ സങ്കടമാണ്..

ഇനി ഒരു ദിവസം കൂടി കാത്താല്‍ മതി.

ജ്യേഷ്ഠന്‍ വാക്ക് പാലിക്കാതിരുന്നിട്ടില്ല, നാളെ വരും.

അപ്പോഴാണ്‌ ജനകൂട്ടത്തിനിടയില്‍ നിന്ന് ഒരു ആരവമുയര്‍ന്നത്.ശത്രുഘനന്‍ പുറത്തേക്ക് ഇറങ്ങി, എല്ലാവരും ആകാശത്തേക്ക് നോക്കുന്നു...

എന്താണത്??

ദൂരെ ഒരു പൊട്ടു പോലെ!!!

അത് അടുത്ത് അടുത്ത് വരുന്നുണ്ട്.

കോലാഹലം കേട്ട് പുറത്തേക്ക് ഇറങ്ങിയ ഭരതനും ആ കാഴ്ച കണ്ടു...

വായു വേഗത്തില്‍ അടുത്ത് വരുന്ന ഒരു രൂപം!!

നിമിഷ നേരം കൊണ്ട് മുന്നില്‍ പറന്ന് ഇറങ്ങിയ ആ രൂപത്തെ അവര്‍ അത്ഭുതത്തോടെ നോക്കി.ഒരു കാര്യം ഉറപ്പ്, അത് മനുഷ്യനല്ല, ഒരു കുരങ്ങിന്‍റെ മുഖം, എന്നാല്‍ 

ദൈവികമായ ഒരു തേജസ്സും.

ഭരതന്‍ അറിയാതെ കൈ കൂപ്പി.

തിരികെ കൈ കൂപ്പി ആ രൂപം പറഞ്ഞു:

"ഞാന്‍ ഹനുമാന്‍, ശ്രീരാമദാസന്‍"

അത്ഭുതത്തോടെയായിരുന്നു അവര്‍ ആ കഥ കേട്ടത്...

പതിനാലു വര്‍ഷം മുമ്പ് തങ്ങളില്‍ നിന്ന് പിരിഞ്ഞ രാമന്‍റെ കഥ.സീതയെ അപഹരിച്ച രാവണന്‍റെ കഥ.ഒടുവില്‍ ചിറ കെട്ടി ലങ്കയിലെത്തി യുദ്ധം ചെയ്ത കഥ.

രാമരാവണയുദ്ധം കേട്ടപ്പോള്‍ അവരില്‍ ഒരോരുത്തര്‍ക്കും ശരീരത്തിലൂടെ രക്തം കുതിച്ച ചാടുന്ന പോലെ തോന്നി.ഒടുവില്‍ രാമന്‍ രാവണനെ വധിച്ചതറിഞ്ഞപ്പോള്‍ 

അറിയാതെ അവര്‍ വിളിച്ച പോയി:

"ജയ് സീതാറാം...ജയ് സീതാറാം..."

അങ്ങനെ അഗ്നിശുദ്ധി വരുത്തിയ സീതാദേവിയുമായി രാമദേവന്‍ അയോദ്ധ്യയിലേക്ക് തിരിച്ചതറിഞ്ഞപ്പോള്‍ ഭരതന്‍ ആകാംക്ഷയോടെ ചോദിച്ചു:

"ജ്യേഷ്ഠനിപ്പോള്‍ എവിടെയാണ്?"

ഭരതനെ നോക്കി ഒന്ന് പുഞ്ചിരിച്ചിട്ട് ഹനുമാന്‍ മറുപടി നല്‍കി:

"ഇന്ന് ഭരദ്വാജ ആശ്രമത്തിലാണ്, നാളെ ഇവിടേക്ക് വരും"

ആബാലവൃദ്ധം ജനങ്ങളും ആകാംക്ഷയോടാണ്‌ കാത്തിരുന്നത്.

രാമദേവന്‍ വരുന്നുണ്ടെന്ന ഹനുമാന്‍റെ വാക്കുകള്‍ അവരിലേക്ക് ഒരു വെളിച്ചം പകര്‍ന്നിരിക്കുന്നു, അതൊരു പൂത്തിരിയായി കത്തി പടരുന്ന നിമിഷത്തിനായാണ്‌ അവരുടെ 

കാത്തിരിപ്പ്.

എല്ലാവരുടെയും മനസില്‍ ഹനുമാന്‍ പറഞ്ഞ കഥയാണ്, രാമന്‍റെ യാത്രയുടെ കഥ.

ഭരതനും ശത്രുഘനനും സമാധാനമായി ഇരിക്കാന്‍ പറ്റുന്നില്ല.തങ്ങളുടെ എല്ലാമെല്ലാമായ ജ്യേഷ്ഠന്‍റെ വരവ് മാത്രമാണ്‌ അവരുടെ മനസ്സില്‍.

സമയം നീങ്ങി കൊണ്ടിരിക്കുന്നു....

എവിടെ ശ്രീരാമസ്വാമി??

ഒരോ മനസ്സിലും ഈ ചോദ്യം മാത്രം.

"അതാ അവിടെ...!!!" ആരുടേയോ സ്വരം.

ആകാശത്തില്‍ അയാള്‍ ചൂണ്ടിയ ഭാഗത്തേക്ക് നോക്കിയ ജനങ്ങളില്‍ നിന്ന് ഒരു ആരവം ഉയര്‍ന്നു..

അതാ പുഷ്പക വിമാനം പ്രത്യക്ഷമായിരിക്കുന്നു!!

"ശ്രീരാമസ്വാമി....ശ്രീരാമസ്വാമി..."

ജയ് വിളികള്‍ അന്തരീക്ഷത്തിലെങ്ങും മുഴങ്ങി.

വിമാനം നിലത്തേക്കിറങ്ങി, അതില്‍ നിന്നും രാമലക്ഷ്മണന്‍മാരും സീതയും മറ്റ് സ്നേഹിതരും ഇറങ്ങി.കൈകേയിയുടെ കണ്ണില്‍ അറിയാതെ കണ്ണുനീര്‍ 

നിറഞ്ഞു.സീതാസ്വയംവരത്തിനു ശേഷം അയോധ്യയിലെത്തിയ രാമന്‍ തന്‍റെ കാല്‌ തൊട്ട് വന്ദിച്ചിട്ട് ആരും കേള്‍ക്കാതെ രഹസ്യമായി ആവശ്യപ്പെട്ടത് അവരുടെ മനസ്സിലേക്ക് 

ഓടിയെത്തി...

"കൈകേയി മാതാവേ, ഇനി എല്ലാം മാതാവിനെ കഴിയു..."

രാവണനിഗ്രഹത്തിനു രാമനു പോകാന്‍ താന്‍ കാരണമാകുമെന്ന് അന്നേ രാമനു അറിയാമായിരുന്നോ?

ആ സംശയത്തിനു മറുപടി എന്നോണ്ണം രാമദേവന്‍ കൈകേയിയെ നോക്കി പുഞ്ചിരിച്ചു.കൈകേയിയുടെ മനസ്സില്‍ ഒരായിരം പൂത്തിരികള്‍ കത്തി.

അന്ന് അയോദ്ധ്യാവാസികളുടെ മനസ്സ് നിറഞ്ഞു.

വീടുകളിലെല്ലാം വിളക്ക് കൊളുത്തി ആഘോഷമായി അവര്‍ കൊണ്ടാടി.

രണ്ട് പ്രാവശ്യമാണ്‌ ഭൂമിയില്‍ ഇങ്ങനൊരു ആഘോഷമുണ്ടായത്...

ഒന്ന് പത്നീ സമേതനായി വിഷ്ണുഭഗവാന്‍ നരകാസുരനെ വധിച്ചനാളിലാണെങ്കില്‍ മറ്റൊന്ന് വിജയശ്രീലാളിതനായി തിരികെയെത്തിയ രാമനെ സ്വീകരിക്കുന്ന ദിവസവും...

കാലാന്തരത്തില്‍ ആ ആഘോഷത്തിനു ദീപാവലി എന്ന് പേരായി.

ദീപങ്ങളുടെ ആവലി...

തിന്മയുടെ മേല്‍ നന്മയുടെ വിജയം...

അതിനൊരു ആഘോഷം...

ദീപാവലി!!!

തിന്മകള്‍ അരങ്ങ് വാഴുന്ന ഈ കാലഘട്ടത്തില്‍ ഒരിക്കല്‍ കൂടി നന്മയുടെ വിജയം ആഗ്രഹിച്ചു കൊണ്ട്, സ്നേഹപൂര്‍വ്വം എല്ലാ സുഹൃത്തുക്കള്‍ക്കും ദീപാവലി 

ആശംസകളോടെ...

സ്നേഹപൂര്‍വ്വം

അരുണ്‍ കായംകുളം 

" എല്ലാ വായനക്കാര്‍ക്കും നമ്മുടെ ബൂലോകം ടീമിന്റെ ഹൃദയം നിറഞ്ഞ  ദീപാവലി ആശംസകള്‍  "

Image Courtesy

http://shirdiwaalesaibaba.blogspot.in

ലോണിനു പിന്നില്‍....???? ഭാഗം 2

പ്രിയ വായനക്കാരെ,

ലേഖന  പരമ്പരയുടെ  ഒന്നാം ഭാഗം പ്രസിദ്ധീകരിച്ച്    ഏതാനും  മണിക്കൂറിനുള്ളില്‍  തന്നെ  സിറ്റി ബാങ്കില്‍ നിന്നും   ചില പോസിറ്റീവ്  നടപടികള്‍   ഉണ്ടായതായി  അറിയുന്നു. എന്നിരുന്നാലും ഈ ലേഖന പരമ്പര അതിന്റെ  ഉദ്ദേശത്തോടു  കൂടി മുന്നോട്ടു  പോകുന്നതാണ്  - ജോ 

ഭാഗം ഒന്ന്  ഇവിടെ വായിക്കാം


ഭാഗം 2

ബൌണ്‍സ് ആയ ചെക്ക്   ഇല്ലാതെ  പണം  നല്‍കാന്‍  നിര്‍വാഹമില്ല  എന്ന്  അവരുടെ  ഭര്‍ത്താവ് കര്‍ക്കശമായി തന്നെ പണം പിരിക്കാന്‍ വന്നവരോട് പറഞ്ഞു. സിറ്റി ബാങ്ക് നിയോഗിച്ച എറണാകുളത്തെ  റിക്കവറി ഓഫീസില്‍ നിന്നും  വന്നിരിക്കുകയാണ് അവര്‍. കൃത്യമായി തവണകള്‍ അടക്കാത്തത് കൊണ്ട്  സിറ്റി ബാങ്ക്  അവരുടെ  റിക്കവറി  ഏജന്‍സി യിലേക്ക്    കാര്യങ്ങള്‍ ഏല്‍പ്പിച്ചിരിക്കുകയാണ്.

"റിക്കവറി ഏജന്‍സി" എന്ന് പറയുമ്പോള്‍ അത് എത്തരത്തിലുള്ള ഏജന്‍സി ആണെന്ന് വായനക്കാര്‍ക്ക്  ഊഹിക്കാമല്ലോ. അന്നൊക്കെ ചെറുതും വലുതുമായ ബാങ്കുകള്‍ കൊള്ളപ്പലിശ ലോണുകള്‍ ആളുകള്‍ക്ക് വാരിക്കോരി നല്‍കുകയും പിന്നീട് "റിക്കവറി ഏജന്‍സി" എന്ന്  ഓമനപ്പേരിട്ടു വിളിക്കുന്ന, അല്‍പ്പം ചോരത്തിളപ്പുള്ള ചെറുപ്പക്കാരായ ആളുകളെ വിട്ടു വിരട്ടി    പണവും അതിന്റെ പലിശയും പിന്നെ റിക്കവറി ചാര്‍ജ്ജും അടക്കം പിടുങ്ങുന്ന ഒരു സംഘം   ബാങ്കുകളുടെ ചിലവില്‍ ഓഫീസ് ഇട്ടു "നിയമ വിധേയം"എന്ന  രീതിയില്‍ പ്രവര്‍ത്തിച്ചു വന്നിരുന്നു.   അന്നത്തെ കാലത്ത് ഫിനാന്‍ഷ്യല്‍  സ്ഥാപനങ്ങള്‍ക്ക്  പുറമേ പല മൊബൈല്‍ കമ്പനികളും ബ്ലേഡ് മാഫിയകളും  ഇത്തരം റിക്കവറി  ഇടപാടുകള്‍ക്ക് ആളുകളെ നിയോഗിച്ചിരുന്നു.  പിന്നീട് ഇത്തരം റിക്കവറി ഇടപാടുകള്‍  അക്രമത്തിലേക്ക് തിരിയുകയും ഒരു ന്യൂ  ജനറേഷന്‍ ബാങ്കിന്റെ വാഹന  റിക്കവറിക്കിടെ  ഉടമ കൊല്ലപ്പെടുകയും കൂടെ ചെയ്തതോടെ  പോലീസും അധികാരികളും  ഇത്തരം  റിക്കവറി നടപടികള്‍ക്കെതിരെ രംഗത്ത്  വരികയും ശക്തമായ നടപടികള്‍ സ്വീകരിക്കുകയും ചെയ്യ്കയും ഉണ്ടായതിനെ തുടര്‍ന്നാണ്‌ "അക്രമ റിക്കവറി " സംവിധാനങ്ങള്‍ക്ക് അല്‍പ്പം ശമനം ഉണ്ടായത്.  സമൂഹത്തോട്  ചെയ്യാവുന്ന വളരെ നിഷ്ടൂരമായ  ഒരു പരിപാടിയാണ് ഇത്തരം  റിക്കവറി പ്രോസസ്സ്. ഇതിനായി ആളുകളെ  നിയോഗിക്കുക വഴി നിരവധി  തൊഴിലില്ലാത്ത ചെറുപ്പക്കാരെ ഈ റിക്കവറി നടപടിക്കു നിയോഗിക്കുകയും അവസാനം ഇവരുടെ സ്വഭാവം തന്നെ  "ഗുണ്ടായിസം എന്നാല്‍ പണം " എന്ന  രീതിയില്‍  മാറ്റി എടുക്കുകയും ചെയ്തു എന്നുള്ളതാണ്  ന്യൂ -ജന റേഷന്‍  ധനകാര്യ - മൊബൈല്‍  സ്ഥാപങ്ങള്‍  കൊണ്ടുണ്ടായ നേട്ടം. ഒട്ടനവധി അക്രമികളെ  സൃഷ്ടിച്ചെടുക്കാന്‍ ഇവര്‍ വഹിച്ചിരുന്ന പങ്ക് അത്ര ചെറുതൊന്നുമല്ല .

അനുഭവത്തിലേക്ക് വരാം. ....  വന്നിരുന്ന റിക്കവറി ആള്‍ക്കാര്‍ ചെക്ക്  ബൌണ്‍സ് ആണെന്നും  ആയതിനാല്‍ പണം ഈടാക്കും  എന്നും തന്നെ പറഞ്ഞു. ബൌണ്‍സിങ്  - റിക്കവറി ചാര്‍ജ്  അടക്കം അവര്‍ പറഞ്ഞ തുക  വലുതായിരുന്നു.  ബന്ധുവിന്റെ ഭര്‍ത്താവ് യാതൊരു കാരണവശാലും  വ്യക്തമായ പ്രൂഫ്‌  ഇല്ലാതെ പണം നല്‍കില്ല എന്ന  വാശിയിന്മേലും  ഉറച്ചു  നിന്നു . ലോണ്‍ എടുത്തിട്ടുണ്ടെങ്കില്‍, ആ പണം തിരിച്ചടച്ചില്ലെങ്കില്‍   ഉണ്ടാകാവുന്ന  പ്രത്യാഘാതം  വളരെ  വലുതായിരിക്കും എന്ന് ഓര്‍മ്മപ്പെടുത്തിയാണ്  റിക്കവറിക്ക് എത്തിയവര്‍ തിരികെ പോയത്.  അതിനു ശേഷമുള്ള ദിവസങ്ങളില്‍ പലവട്ടം  അവരില്‍ നിന്നും ഫോണുകള്‍  വരുവാന്‍ തുടങ്ങി.  ഇതിനിടയില്‍  പലവട്ടം അവര്‍ ബന്ധുവിന്റെ ഭര്‍ത്താവിന്റെ ഓഫീസില്‍ എത്തി. ഇതിനിടയില്‍ മാസങ്ങള്‍ കടന്നു. ആ സമയത്ത് റിക്കവറി ഓഫീസിന്റെ ഇന്‍ ചാര്‍ജ് പ്രത്യേകം അവരെ കാണുവാന്‍ എത്തി. വളരെ വിശദമായി ഇങ്ങനെ ഇന്‍സ്റ്റാള്‍ മെന്റ് മുടക്കം വരുത്തിയാല്‍ ഉണ്ടാകാവുന്ന ഭാവിശ്യത്തുകലെക്കുരിച്ചു പറഞ്ഞു. കോടതിയിലേക്ക് പോയാല്‍  പിന്നെ ഇവര്‍ക്ക് ഒന്നും ചെയ്യാന്‍ പറ്റാതാകും അതിനാല്‍  രണ്ടു മാസത്തെ എങ്കിലും  അടക്കുവാന്‍ ആവശ്യപ്പെട്ടു.  അങ്ങനെയെങ്കില്‍  മുടക്കം ആറുമാസം കഴിയാതെ  ആകുമെന്നും ചെക്കിനെക്കുരിച്ചു അന്വേഷിക്കാന്‍ സമയം കിട്ടുമെന്നും പറഞ്ഞു.  അങ്ങനെ  താല്‍ക്കാലികമായി രണ്ടു മാസത്തെ തുക അടക്കാന്‍  അവര്‍ തയ്യാറായി.
 

പിന്നീട്  ഇന്‍സ്റ്റാള്‍ മെന്റ് അടക്കണം എന്നാവശ്യപ്പെട്ടു വീണ്ടും അവര്‍ വന്നപ്പോള്‍ , പണം  തരണമെങ്കില്‍  ഇനി ആ ചെക്ക് പ്രസന്റ്  ചെയ്യില്ല  എന്ന് ബാങ്കില്‍ നിന്നും  എഴുതി തന്നാല്‍   ബാക്കി ഇ എം ഐ അടക്കുന്ന കാര്യം  ആലോചിക്കാം എന്ന് അവരുടെ ഭര്‍ത്താവ് റിക്കവറി ആള്‍ക്കാരോട് പറഞ്ഞു. മാത്രമല്ല, മുടങ്ങി എന്ന് പറയുന്ന   തവണകള്‍ക്ക് അവര്‍ നേരത്തെ ആവശ്യപ്പെട്ടിരുന്നത് പോലെ യാതൊരു വിധ പിഴകളും നല്‍കുന്നതുമല്ല എന്നറിയിച്ചു.   അതെ തുടര്‍ന്ന് റിക്കവറി ഏജന്‍സിയിലെ ആളുകള്‍ സിറ്റി ബാങ്കുമായി ബന്ധപ്പെട്ടു. ഇതേ തുടര്‍ന്ന് ബാങ്ക് നമ്മുടെ കഥാനായികയുടെ ആവശ്യം അംഗീകരിക്കുകയാണ് എന്നറിയിച്ചു. മാത്രമല്ല, സിറ്റി ബാങ്കില്‍ നിന്നും  ബന്ധുവിന്റെ ഭര്‍ത്താവിന്റെ  മൊബൈലില്‍ വിളിച്ചു ഇനി തുടര്‍ന്നുള്ള  തവണകള്‍  റിക്കവറി ഏജന്‍സി  വശം  കൊടുത്താല്‍ മതി എന്നും അതിനു യാതൊരുവിധ  അഡീഷനല്‍  ചാര്ജ്ജുകളും  നല്‍കേണ്ടതില്ല  എന്നും  അറിയിച്ചു.  നഷ്ട്ടപ്പെട്ട  ചെക്കുകളെക്കുറിച്ച്  അന്വേഷണം  നടക്കുകയാണെന്നും  എന്തെങ്കിലും പുരോഗതി ഉണ്ടായാല്‍ വിവരം അറിയിക്കാമെന്നും  പറഞ്ഞു.

അങ്ങനെ കുറച്ചു ദിവസങ്ങള്‍ക്കു ശേഷം  വീണ്ടും റിക്കവറി ഏജന്‍സിയുടെ ആള്‍ക്കാര്‍  വന്നു.  അവരുടെ   കൈവശം  അപ്പോള്‍ ഒരു സ്റ്റേറ്റ്മെന്റ്  കൂടി  ഉണ്ടായിരുന്നു.  ഇരുപത്തി ഒന്ന്  തവണകള്‍ .  കൃത്യമായി  പണം  അടച്ചിട്ടുണ്ടെന്നും  ബാക്കിയുള്ള അഞ്ചു  തവണകള്‍  ആണ്  അടക്കാത്തതെന്നും  ഉള്ള ഒരു   ഇന്റേണല്‍  സ്റ്റേറ്റ്മെന്റ്  ആയിരുന്നു അത്. (ചിത്രം 1) മറ്റു ചില വിവരങ്ങള്‍  കൂടി  അതില്‍  ഉണ്ടായിരുന്നു ( ഈ വിവരങ്ങള്‍  സിറ്റി  ബാങ്കുമായുള്ള  സംസാരത്തില്‍  പലവട്ടം തെളിവുകള്‍ ആയി മാറിയിരുന്നു  )

 

എന്നാല്‍ ഈ  രേഖകള്‍ പ്രകാരം പണം അടക്കുവാന്‍  തയ്യാറല്ല  എന്നും നഷ്ട്ടപ്പെട്ട ചെക്കുകള്‍  ഇനി പ്രെസന്റ് ചെയ്യില്ല എന്നും പറഞ്ഞ സിറ്റി ബാങ്കില്‍ നിന്നും ഔദ്യോഗികമായി  എഴുതി നല്‍കിയാല്‍  കഴിഞ്ഞു പോയ ഇ എം ഐ കള്‍  ഒരുമിച്ചടക്കാം എന്നും തുടര്‍ന്നുള്ള  ഇ എം ഐ കള്‍  മുറപോലെ നല്‍കാന്‍  തയ്യാറാണ്  എന്നും  ബന്ധുവിന്റെ ഭര്‍ത്താവ് അവരോടു  വ്യക്തമാക്കി. അതേത്തുടര്‍ന്ന് തിരികെപോയ അവര്‍ വീണ്ടും വന്നത്  സിറ്റി ബാങ്കിന്റെ  ഔദ്യോഗിക കത്തുമായാണ്‌.

പക്ഷെ അതില്‍  ആറു  മാസത്തെ  ചെക്കുകള്‍ നഷ്ടപ്പെട്ട  വിവരം മാത്രമേ   രേഖപ്പെടുത്തിയിട്ടുണ്ടായിരുന്നുള്ളൂ. (ചിത്രം 2 ) പിന്നീടുള്ള ചെക്കുകളുടെ വിവരം അന്വേഷണം നടക്കുകയാണ് എന്നും  അതിനു ശേഷം മാത്രം  അവയെക്കുറിച്ചുള്ള  സ്റ്റേറ്റ്മെന്റ്   നല്‍കാം എന്നും  അറിയിച്ചു.

ലോണ്‍ തുക എന്തായാലും  തിരിച്ചടക്കേണ്ടത്‌ തന്നെ അല്ലേ ? പിന്നെ വെറുതെ  സംസാരിച്ചു ബാധ്യതകള്‍ കൂട്ടുന്നത്‌ എന്തിനു എന്ന്   വിചാരിച്ചു  ആ രേഖയുടെ പുറത്തു  ബന്ധുവും ഭര്‍ത്താവും അഞ്ചു മാസത്തെ തുക ഒന്നിച്ചടച്ച് രസീത് വാങ്ങി. (ചിത്രം 3)

പക്ഷെ  ഏറെ  പിഴവുകള്‍   നിറഞ്ഞതായിരുന്നു സിറ്റി ബാങ്കില്‍ നിന്നുള്ള ആ കത്ത്. ബന്ധുവും ഭര്‍ത്താവും  ആ സമയത്ത്  ശ്രദ്ധിച്ചതായിരുന്നുവെങ്കിലും  അക്കാര്യത്തിനു കൂടുതല്‍  വാശി പിടിക്കാതിരുന്നത്  പിന്നീട് അവര്‍ക്ക് വിനയായിത്തീരുകയായിരുന്നു..... വിന അത് ഒരു "വിന" തന്നെ ആയിരുന്നു.

(തുടരും )

( പ്രിയ വായനക്കാരെ , ബിസിനസ്സ്  തിരക്കുകള്‍ക്കിടയില്‍  ഈ  പരമ്പര  ഘട്ടം ഘട്ടമായെ  എഴുതുവാന്‍ സാധിക്കുന്നുള്ളൂ . സദയം ക്ഷമിക്കുക.. വനിതയുടെ പ്രൈവസി  മാനിച്ചു  തെളിവുകള്‍  നല്കിയിരിക്കുന്നതിലെ  ഉപഭോക്താവിനെ സംബന്ധിച്ച വിവരങ്ങളും ഫോണ്‍ നമ്പറുകളും  ജാമ്യം  നിന്നവരുടെ   വിവരങ്ങളും   മറച്ചിട്ടുണ്ട്‌   - ജോ )






Post a Comment

View All Comments

ലോണിനു പിന്നില്‍ ........????

 പ്രിയ വായനക്കാരെ,

ഒരു വ്യക്തിക്കുണ്ടായ  വ്യത്യസ്ത  അനുഭവകഥയും അതിനു പരിഹാരം  കണ്ടെത്തുന്നതുമായ  വഴികളും  പ്രസിദ്ധീകരിക്കുകയാണ് ഇവിടെ.   നമ്മുടെ ബൂലോകത്തിന്റെ  പ്രസാധകനായ  "ജോ"  ആണ്   വിശദമായ ഈ  ലേഖനം എഴുതുന്നത്‌.  ഏതാനും തുടര്‍ ഭാഗങ്ങളായി  എഴുതുന്ന ഈ ലേഖന പരമ്പരയില്‍   വായനക്കാര്‍ക്ക്  ഉപകാരപ്പെട്ടേക്കാവുന്ന  പല കാര്യങ്ങളും  ഉണ്ട്.  ഏവരുടെയും അഭിപ്രായങ്ങള്‍   പ്രതീക്ഷിച്ചു കൊള്ളുന്നു.

നിങ്ങള്‍ ഏതെങ്കിലും ലോണ്‍  എടുത്തതാണോ ?
അടച്ചു തീര്‍ത്തതാണോ ?
അല്ലെങ്കില്‍ ഇനി എടുക്കുവാന്‍ ഉദ്ദേശിക്കുന്നുണ്ടോ ?

         അഥവാ ഉദ്ദേശിക്കുന്നുണ്ടെങ്കില്‍ ഒരു നൂറു വട്ടമെങ്കിലും ആലോചിക്കണം .............. ഈയടുത്ത് ഒരു ബന്ധുവില്‍ നിന്നും അറിഞ്ഞ സംഭവ കഥ കേട്ടപ്പോള്‍  എന്റെ മനസ്സില്‍  പെട്ടെന്ന് തോന്നിയത് ഇങ്ങിനെയായിരുന്നു.

     ഏതെങ്കിലും അത്യാവശ്യത്തിനു  നമുക്ക് പണം വേണ്ടിവരുമ്പോള്‍  നമ്മുടെ ബന്ധുക്കളുടെ അടുത്തോ, സുഹൃത്തുക്കളുടെ അടുത്തോ  നമ്മളെ സഹായിക്കാന്‍  ആവശ്യത്തിനു പണം ഇല്ലാതെ വരുമ്പോള്‍   ' ലളിതമായ  തവണ വ്യവസ്ഥ 'യില്‍   ലഭിക്കുന്ന ഒരു ലോണിനു വേണ്ടി നാം അറിയാതെ   കൈ നീട്ടിപ്പോകും എന്നത് സത്യമാണ്.  പ്രത്യേകിച്ച്  'പേഴ്‌സണല്‍ ലോണ്‍'  എന്ന്  ഓമനിച്ചു വിളിക്കുന്ന  കൊള്ളപ്പലിശ  ലോണിനു വേണ്ടി. പക്ഷെ ഇതില്‍ ഒളിഞ്ഞിരിക്കുന്ന ചില ചതികള്‍ , തട്ടിപ്പുകള്‍ ഭീകരമാണ് എന്നതാണ് മുകളില്‍ സൂചിപ്പിച്ച കഥ കേട്ടപ്പോള്‍ മനസ്സിലായത്..

    കഥ വഴി ഇങ്ങിനെ...

    കുറച്ചു നാള്‍ മുന്‍പ്  ഒരു പ്രത്യേക  ആവശ്യവുമായിട്ടായിരുന്നു വളരെ അടുത്ത ബന്ധത്തില്‍ പെട്ട ഒരു സ്ത്രീ എന്നെ സമീപിച്ചത്.  ആ വനിതക്ക്   പകല്‍   ജോലിക്ക് പോകേണ്ടതുണ്ട് എന്നതിനേക്കാളേറെ,  പ്രശ്‌നങ്ങള്‍ക്ക്   ഓണ്‍ ലൈന്‍ വഴി  പരിഹാരങ്ങള്‍  പെട്ടെന്ന്  സാധ്യമാവുന്നതിനാലും , ഇന്റര്‍നെറ്റില്‍  സദാ സമയവും ആഴ്ന്നിരിക്കുന്ന ആളാണ് ഞാന്‍ എന്നതിനാലുമാണ് ഇത്തരം ഒരു കാര്യത്തിന് എന്നെ സമീപിച്ചത്. അഞ്ചു ലക്ഷത്തോളം  രൂപ  മുടക്കേണ്ട ആവശ്യമുള്ള തന്റെ  ഭര്‍ത്താവിന്റെ ബിസിനസ്സില്‍ തന്നാലാവുന്ന സഹായം നല്‍കാന്‍ എച് ഡി എഫ് സി  ബാങ്ക് വഴി ഒരു ലോണിനു അവര്‍ അപേക്ഷിച്ചിരുന്നു.   അതാവട്ടെ ,  ആ ബാങ്കില്‍ സാലറി അക്കൌണ്ടും  റെക്കറിന്‍ഗ്  അക്കൌണ്ടും   ഉള്ളതിനാല്‍  അവര്‍ക്കൊരു 'പ്രീ അപ്രൂവ്ഡ്  ലോണ്‍'  അനുവദിച്ചിരിക്കുന്നു എന്നുള്ള    എക്‌സിക്യുട്ടീവിന്റെ നിരന്തര  ഫോണ്‍ വിളിയുടെ പശ്ചാത്തലത്തില്‍ ആയിരുന്നുതാനും. എന്നാല്‍ ലോണിന് അപേക്ഷിച്ച് ഒരാഴ്ച  കഴിഞ്ഞപ്പോള്‍ ,  എച് ഡി എഫ് സി ബാങ്കിന്റെ ലോണ്‍ സെക്ഷനില്‍  നിന്നും ലോണ്‍ അപേക്ഷ നിരസിച്ചതായി അവര്‍ക്ക് ഒരറിയിപ്പ്   ഫോണ്‍  മുഖാന്തിരം ലഭിച്ചു.  വ്യക്തമായ കാരണം ബാങ്ക്  പറഞ്ഞുമില്ല.  പകരം  നിങ്ങളുടെ സിബില്‍ റെക്കോര്‍ഡ്  ക്ലിയര്‍ അല്ല എന്ന് മാത്രം പറഞ്ഞെത്രെ!

        എന്താണ് സിബില്‍ എന്നും  ആ റെക്കോര്‍ഡ് പ്രകാരം എന്താണ്  ലോണ്‍ ലഭിക്കാന്‍ തടസ്സം എന്നന്വേഷിക്കാനും  വേണ്ടിയാണ്  ഇന്റര്‍നെറ്റ്  സാധ്യതകള്‍ തേടി  എന്നെ  സ്ത്രീ സമീപിച്ചത് . ഒരു പരിചയവും ഇല്ലാത്ത കാര്യങ്ങള്‍ ആണെങ്കില്‍ കൂടിയും, അവരുടെ  'ലോണ്‍ കഥ' കേട്ടപ്പോള്‍  എന്നാലാവുന്ന  സഹായം  ചെയ്യാമെന്ന്  ഞാനും ഏറ്റു.


        അതിന്റെ പരിഹാര സാധ്യതകളിലേക്ക്  കടക്കുന്നതിനു മുന്‍പ്  വായനക്കാര്‍ കൂടി ആ കഥ അറിഞ്ഞിരിക്കേണ്ടത്  ആവശ്യമായതിനാല്‍ അത് ഇവിടെ കുറിക്കുന്നു.

        2003  ആഗസ്തിലാണ്  തന്റെ  വിവാഹത്തോടനുബന്ധിച്ചു   വേണ്ടുന്ന ചിലവുകളിലേക്കായി  ആ പെണ്‍കുട്ടി  തന്റെ സഹപ്രവര്‍ത്തകന്റെ സുഹൃത്തായ സിറ്റി ബാങ്ക്  എക്‌സിക്യുട്ടീവ് വഴി ഒരു ലോണിനു  അപേക്ഷിക്കുന്നത്.   സിറ്റി ബാങ്കില്‍ അക്കൌന്റ്  എടുത്തു, ആ ചെക്ക്  നല്‍കിയാല്‍  ലോണ്‍ സാങ്ഷന്‍  ആക്കാം എന്ന് എക്‌സിക്യുട്ടീവ്  ആവശ്യപ്പെട്ടതനുസരിച്ച്  അവര്‍  വേണ്ട കാര്യങ്ങള്‍ ചെയ്തു. മൂന്നാം ദിവസം ലോണ്‍ അനുവദിക്കപ്പെട്ടു. പ്രതിമാസ തിരിച്ചടവായി  1495 രൂപ  48 തവണകളായി നിശ്ചയിക്കപ്പെട്ടു ലോണ്‍ 4 വര്ഷം കൊണ്ട് അടച്ചു തീര്‍ക്കണം.  

വിവാഹമൊക്കെ ഭംഗിയായി നടന്നു. പിന്നെയും ഒരു വര്‍ഷത്തോളം കടന്നുപോയി.. ലോണ്‍  മുടങ്ങാതെ കൃത്യമായി അടച്ചു പോന്നു.  ഈ അവസരത്തിലാണപ്രസവത്തോടനുബന്ധിച്ചു  അവര്‍ക്ക് ഗുരുതരമായ  ചില  ആരോഗ്യ പ്രശ്‌നങ്ങള്‍ ഉണ്ടാവുകയും തുടര്‍ന്ന്  ജോലി  ചെയ്യാന്‍  പറ്റാതെ വരികയും ഉണ്ടായത്.   അവര്‍ക്ക് ജോലി രാജി വയ്‌ക്കേണ്ടിവരികയും വീട്ടില്‍ റസ്റ്റ്  എടുക്കേണ്ടിയും വന്നു. എന്നിട്ടും ലോണിന്റെ ഇന്‍സ്റ്റാള്‍മെന്റിന്  അവര്‍ മുടക്കം ഒന്നും വരുത്താതിരിക്കുവാന്‍ ശ്രദ്ധിച്ചിരുന്നു.  പക്ഷെ,  സിറ്റി ബാങ്കിലെ  അക്കൌന്റ് സ്‌റ്റേറ്റ്‌മെന്റ്   തപാല്‍  വഴി വീട്ടില്‍ എത്തിയപ്പോള്‍ ആണ്  അതില്‍  പല മാസങ്ങളിലായി 500 രൂപ വീതം  കുറവ് വന്നിരിക്കുന്നതും  ലോണ്‍ തുക കൃത്യമായി  എടുക്കുകയും ചെയ്തതായി കാണുന്നത്.  അവര്‍  ഭര്‍ത്താവുമൊന്നിച്ച് ബാങ്കില്‍ ചെന്നപ്പോള്‍ ലഭിച്ച  മറുപടി  രസകരമായിരുന്നു. പ്രിവിലേജ് കസ്റ്റമര്‍മാരെ  മാത്രം ഉള്‍ക്കൊള്ളിക്കുന്നതിന്റെ ഭാഗമായി  അന്‍പതിനായിരം രൂപ  അക്കൌണ്ടില്‍  പ്രതിമാസ ട്രാന്‍സാക്ഷന്‍  ഇല്ലാത്തവര്‍ക്ക് ഫൈന്‍ ആയി  500 രൂപ വീതം  ബാങ്ക് പിടിക്കും  എന്ന പുതിയ പോളിസി  ബാങ്ക്  നടപ്പില്‍ വരുത്തിയിരിക്കുന്നു!  മറ്റെങ്ങും ഇല്ലാത്ത ഈ നടപടി കേട്ട് അവര്‍ ഞെട്ടി.  ഇതിനകം തന്നെ രണ്ടായിരം രൂപയോളം  ബാങ്ക്  പിടിച്ചിരിക്കുന്നു.   ഇപ്പോള്‍ ജോലി പോലുമില്ലാത്ത തനിക്കു  പ്രതിമാസം എങ്ങനെ  അന്‍പതിനായിരം രൂപ യുടെ  വരവ് ചെലവ്  ഉണ്ടാക്കാന്‍ സാധിക്കും?   ബാങ്കിലെ വനിത ഹെല്പ് ഡെസ്‌ക് ഉത്തരവും നല്‍കി . സംഗതി സിമ്പിള്‍ !!  'ഈ ബാങ്കിലെ അക്കൌന്റ്  ക്ലോസ്  ചെയ്യുക.  ഇപ്പോഴുള്ള   ലോണ്‍  അടച്ചു തീര്‍ക്കാന്‍  മറ്റൊരു  ബാങ്കിലെ  ചെക്കുകള്‍  പകരം നല്‍കുക.'

    അങ്ങനെ ചെയ്താല്‍ ഇത് വരെ ബാങ്ക് പിടിച്ച തുക  മുഴുവന്‍ തിരികെ നല്‍കും.  അതു പ്രകാരം  എന്റെ ബന്ധു  ആ ബാങ്കിലെ അക്കൌന്റ് ക്ലോസ് ചെയ്യുകയും പകരം  എച് ഡി എഫ് സി  ബാങ്കിലെ  ചെക്ക്  നല്‍കാന്‍ തീരുമാനിക്കുകയും ചെയ്തു.  അപ്പോഴും കടമ്പകള്‍ ഇനിയുമുണ്ടായിരുന്നു. പകരം ചെക്ക് നല്‍കേണ്ടത് ബാങ്കില്‍ അല്ല, മറിച്ച് അവരുടെ ലോണ്‍ സെക്ഷന്‍  ആയ എറണാകുളം രവിപുരത്തെ  ഓഫീസില്‍  എത്തിക്കണമത്രെ!.  അതനുസരിച്ച്  അവര്‍ ലോണ്‍ നല്‍കിയ  എക്‌സിക്യുട്ടീവിനെ വിളിച്ചു കാര്യങ്ങള്‍ പറഞ്ഞു. അദ്ദേഹത്തിന്റെ സാന്നിധ്യത്തില്‍  പകരം ചെക്ക്  അന്നത്തെ ഏരിയ മാനേജറിനെ ഏല്‍പ്പിച്ചു.  അപ്പോഴാണ്  നേരത്തെ നല്‍കിയ  സിറ്റി ബാങ്കിന്റെ ചെക്കുകള്‍  ബാങ്ക്‌ലൂരിലെ ഓഫീസില്‍ ആണെന്നും അത്  കൊറിയര്‍ വഴി തിരികെ ലഭിക്കുകയുള്ളൂ  എന്ന്  ഏരിയ മാനേജര്‍  സൂചിപ്പിച്ചത്. ചെക്ക് പകരം മാറുന്നതിന്റെ  ഫോര്‍മാലിറ്റി കണക്കാക്കി  ഒന്നോ രണ്ടോ മാസം എടുക്കും പുതിയ ചെക്ക് ബാങ്കില്‍ പ്രെസന്റ്  ആവാന്‍ എന്നദ്ദേഹം  പറയുകയും ചെയ്തു.  പ്രസവത്തെ ത്തുടര്‍ന്നുള്ള ചില ആരോഗ്യ പ്രശങ്ങള്‍ ആ വനിതയ്ക്ക്  ഉണ്ടായിരുന്നെന്ന് പറഞ്ഞല്ലോ,  അതിനാല്‍ അവര്‍ ഏറെ നാളത്തേക്ക് വീട്ടില്‍  റെസ്റ്റില്‍ ആവുകയും  അവരുടെ എച് ഡി എഫ് സി ബാങ്ക് അക്കൌണ്ടില്‍  മിനിമം ബാലന്‍സ് ആയ അയ്യായിരം രൂപയ്ക്ക് പുറമേ  ലോണ്‍ ഇന്‍സ്റ്റാള്‍മെന്റ്  ചെക്ക് മാറുന്നതിനാവശ്യമായ തുകകൂടെ ഭര്‍ത്താവ് നിക്ഷേപിച്ചു  വരികയും ചെയ്തു. 

എന്നാല്‍  മൂന്നു മാസത്തോളമായിട്ടും  ചെക്ക്  ഒന്നും വരാതിരുന്നത് കൊണ്ട്  അവര്‍ എക്‌സിക്യുട്ടീവിനെ  വിളിച്ചു അന്വേഷിച്ചു.   ആ എക്‌സിക്യുട്ടീവ് അവിടെ നിന്നും മാറി മറ്റൊരു സ്ഥാപനത്തില്‍ ആണെന്നും,  ചില നടപടി ക്രമങ്ങളുടെ  ഭാഗമായിട്ടായിരിക്കാം  ചെക്ക്  വൈകുന്നത് എന്നും  അത് കൈവശം എത്തിക്കോളുമെന്നും ആണ് ബാങ്കിലെ എക്‌സിക്യുട്ടീവ് ആയിരുന്ന അദ്ദേഹം പറഞ്ഞത്.  നാല് മാസങ്ങള്‍ക്ക് ശേഷം...   മുന്‍പ് ഇവര്‍ ജോലി ചെയ്തിരുന്ന ഓഫീസിലെ സുഹൃത്ത് വിളിക്കുകയും  ചിലര്‍  അന്വേഷിച്ചു വന്നതായും ലോണ്‍  മുടങ്ങിയിരിക്കുന്നതിനെക്കുറിച്ചും  പറയുകയുണ്ടായി.  വന്നവരെ ബന്ധപ്പെടുവാനുള്ള ഫോണ്‍ നമ്പരും സുഹൃത്ത് നല്‍കിയിരുന്നു.  അതനുസരിച്ച് അവരുടെ ഭര്‍ത്താവ്   ആ നമ്പരില്‍ വിളിച്ചു.  നല്‍കിയ ചെക്ക്  ബൌന്‍സ് ആയിരിക്കുന്നതിനാല്‍ ,  ഫൈന്‍ അടക്കം  മൂന്നു മാസത്തെ തുകയും ഒന്നിച്ചു അടക്കണം എന്നായിരുന്നു ബാങ്കില്‍ നിന്നുള്ള ആവശ്യം.  അങ്ങിനെയെങ്കില്‍ ചെക്കുമായി പിറ്റേന്ന്  തന്റെ  ഓഫീസില്‍ എത്തുവാന്‍  സ്ത്രീയുടെ ഭര്‍ത്താവ് ആവശ്യപ്പെട്ടു.  തുടര്‍ന്ന്  അദ്ദേഹം ഭാര്യയ വിളിച്ചു കാര്യങ്ങള്‍ സൂചിപ്പിക്കുകയും എ ടി എം വഴി ബാങ്ക് അകൌണ്ടിന്റെ സ്‌റ്റേറ്റ് മെന്റ്  എടുത്തു നോക്കിയപ്പോള്‍  അക്കൌണ്ടില്‍ വേണ്ടത്ര തുക ഉള്ളതായി കാണുകയും ചെയ്തു.

പിന്നെ എന്തായിരിക്കും സംഭവിച്ചത്? എന്തായാലും അടുത്ത ദിവസം ബാങ്കില്‍ നിന്നും ചെക്കുമായി ആള്‍ വരുമ്പോള്‍ കാര്യങ്ങള്‍ വിശദമായി ചോദിച്ചറിയാമല്ലോ എന്ന്! കരുതി അവര്‍ കാത്തിരുന്നു...

പക്ഷെ, പിറ്റേന്ന്  ബന്ധുവിന്റെ ഭര്‍ത്താവിന്റെ ഓഫീസില്‍  പണം പിരിക്കാന്‍ വന്നവര്‍  ബൌന്‍സ് ആയി  എന്ന് പറഞ്ഞ  ചെക്ക്   മാത്രം കൊണ്ട് വന്നിട്ടില്ലായിരുന്നു.

(തുടരും...)




ഭാഗം 2 ഇവിടെ വായിക്കാം 

പുണ്ണെഴുത്തുകൾ

എച്മുകുട്ടി എന്ന പേരില്‍ ബ്ലോഗ്‌ എഴുതുന്ന 
കല. സി  എഴുതിയ കഥ.

ചുമലിൽ ചൂടുള്ള കൈപ്പടം പതിഞ്ഞപ്പോൾ ഞെട്ടിപ്പോയി. ആരെങ്കിലും സ്നേഹത്തോടെ സ്പർശിച്ചിട്ട് എത്രയോ കാലമായിരിയ്ക്കുന്നു. തണുപ്പു കാലത്തെ മൃദുലമായ വെയിൽ പോലെ, ഒരു പൂവിതൾ താഴെ വീഴും പോലെ ഒരാൾ തൊടുന്നത് എങ്ങനെയായിരിയ്ക്കുമെന്ന് മറന്നേ കഴിഞ്ഞ ഈ വേളയിൽ…….

ഇതാരാണിത്?

കഴുത്തും തലയും പണിപ്പെട്ട്, സമയമെടുത്ത് ഇടത്തോട്ട് തിരിച്ച് നോക്കി. നരച്ച താടി മാത്രമേ ആദ്യം ദൃശ്യമായുള്ളൂ. സ്കാർഫു കൊണ്ട് മുഖത്തിന്റെ വലതു ഭാഗം മറഞ്ഞിട്ടുണ്ടെന്നുറപ്പു വരുത്തി, ശരീരം പൂർണമായും തിരിച്ച് താടിയുടെ ഉടമയെ അഭിമുഖീകരിച്ചു.

മാഷാണല്ലോ, ഇത്.

അദ്ദേഹം ഞടുങ്ങിയോ?

‘മാഷിവിടെ?‘

കർച്ചീഫിൽ മുഖം തുടച്ചുകൊണ്ട് മാഷ്, തികച്ചും സാധാരണമായി പറഞ്ഞു.

‘വിജുവിനെ അഡ്മിറ്റ് ചെയ്തിട്ടുണ്ട്.‘

‘എന്തു പറ്റി?‘

‘അവന്റെ ദുബായ് ലൈഫുണ്ടാക്കിയ തകരാറ്. കിഡ്നിയ്ക്ക് എപ്പോഴും ഓരോരൊ കുഴപ്പങ്ങളാണ്.‘

മാഷ് ക്ഷീണിച്ചിരിയ്ക്കുന്നു. ആകെ നരച്ചു. കണ്ണടയ്ക്ക് പുറകിൽ, മിഴികളിലെ തിളക്കം മാത്രം അല്പം ബാക്കിയുണ്ട്. അവയിൽ കർച്ചീഫിലൊതുങ്ങാത്ത നനവിന്റെ ഈറൻ…ഒന്നും കണ്ടില്ലെന്നു നടിച്ചു. മനസ്സിന്റെ സ്ഥാനത്ത് വലിയ കരിമ്പാറക്കെട്ടായിട്ടും അതു അലമുറയിടുന്നുവല്ലോ……

‘തിരക്കില്ലെങ്കിൽ ഇവിടെ ഇരിയ്ക്കാം. എനിയ്ക്ക് അധിക നേരം നിൽക്കാൻ വയ്യ. ഇടതു കാലിന് ബലക്കുറവുണ്ട്.’ മാഷിന്‍റെ  ശബ്ദത്തിനും ഇടർച്ചയുണ്ടായിട്ടുണ്ടെന്ന് മനസ്സിലായി.

കാലം അങ്ങനെയൊക്കെയാണല്ലോ നമ്മളോട് ചെയ്യുക. ലോബിയിലിട്ടിരുന്ന സോഫയിൽ ഒപ്പം ഇരുന്നു.

‘മാഷ് തനിച്ചാണോ?‘

‘അല്ല, കുട്ടീ. അജി ഇവിടെ ഡോക്ടറാണ്. അത് ഒരു വലിയ സമാധാനം. അല്ലെങ്കിൽ ഇത്ര വലിയ ആസ്പത്രിയിൽ ഞാൻ ചുറ്റിപ്പോകുമായിരുന്നു.‘

സ്കാർഫിന്റെ സ്ഥാനം മാറാതിരിയ്ക്കാൻ പണിപ്പെട്ട് മാഷിന്‍റെ  വാക്കുകൾ കേട്ടുകൊണ്ടിരുന്നു. ഞാനും അജിയും ശോഭയും ഒന്നിച്ചാണ് പഠിച്ചത്. അതേതു കാലമായിരുന്നു? കഴിഞ്ഞ യുഗങ്ങൾ പോലെ, അതി വിദൂരമായ ഭൂതകാലത്തിലെവിടേയോ ഞങ്ങൾ സഹപാഠികളായിരുന്നു.

അജി ഡോക്ടറായി ജോലി ചെയ്യുന്ന ആശുപത്രിയിൽ സ്ഥിരമായി ചികിത്സയ്ക്ക് ചെല്ലുകയാണ് വർത്തമാനകാലത്തിലെ ഞാൻ. ഇവിടെ വച്ച് ഞങ്ങളൊരിയ്ക്കലും തമ്മിൽ കണ്ടിട്ടില്ല. ഈ രൂപത്തിൽ, ഉണങ്ങാപ്പുണ്ണുകളുടെ അടിമയായി കണ്ടിരുന്നുവെങ്കിൽ അയാൾ തിരിച്ചറിയുമായിരുന്നുവോ എന്ന് നിശ്ചയമില്ല. അറിഞ്ഞാലും അതു ഭാവിയ്ക്കുമായിരുന്നുവോ എന്നും അറിയില്ല.

പക്ഷെ, മാഷ് കണ്ടു പിടിച്ചുവല്ലോ.

കള്ളപ്പേരും മുഖത്തിന്റെ ഇടതു വശം മാത്രം വെളിപ്പെടുത്തുന്ന വസ്ത്രധാരണവും ഇടയ്ക്കിടെയുള്ള വീടുമാറ്റങ്ങളും ഒരു നാണവുമില്ലാതെ പറയുന്ന നുണകളുമായാൽ ഈ ജീവിതമായി. സ്വയം മെനയുന്ന കള്ളക്കഥകൾ…… എന്റേതെന്നും എനിയ്ക്കുണ്ടെന്നും പറഞ്ഞു ഫലിപ്പിയ്ക്കുന്ന ബന്ധങ്ങൾ………….. എന്റെ സമാന്തര ജീവിതം.

“ഓ! ഇറ്റ് വാസ് എ ട്രാജഡി, ഒരു കിച്ചൻ ആക്സിഡന്റ്…സാരമില്ല. ഞാൻ റെക്കവർ ചെയ്തു. യാ! ഐ ഗോട്ട് മൈ ഹസ്ബൻഡ്സ് ഫുൾ സപ്പോർട്ട്. ദാ ഇപ്പോ ഇവിടെ വിട്ടിട്ട് പോയതേയുള്ളൂ. ഉടനെ വരും പിക് ചെയ്യാൻ….“.

ഇങ്ങനെയൊക്കെ മാഷോട് പറയുവാൻ കഴിയുമോ?.

അല്ലെങ്കിൽ എല്ലാം വെളിപ്പെടുത്തിക്കൊണ്ട് തൊലിയടർത്തി എറിയപ്പെട്ട ഈ ജീവിതത്തിന്റെ രക്തമൊലിയ്ക്കുന്ന അകക്കാമ്പ് പ്രദർശിപ്പിയ്ക്കാനാകുമോ? വേണ്ട.

അജിയും ശോഭയും പഠിയ്ക്കുമ്പോഴേ ഒന്നിച്ച് ജീവിയ്ക്കാൻ ആഗ്രഹിച്ചിരുന്നു. അവരുടെ വിവാഹം ആർഭാടത്തോടെ നടക്കുകയും ചെയ്തു.

‘അജിയ്ക്കും ശോഭയ്ക്കും സുഖം തന്നെയല്ലേ ?’ മാഷ് ചിരിച്ചു. ആ ചിരിയിൽ ഒരുപാട് വേദനകൾ ഒളിഞ്ഞിരിയ്ക്കുന്നതായി തോന്നി.

‘സുഖമാവണം. അവൻ സങ്കടം പറയാറില്ല. രോഗികളും ആശുപത്രിയുമായി കഴിയുന്നു.‘

‘എന്തു പറ്റി മാഷെ?…………‘

‘അവർ പിരിഞ്ഞു. മകൾ ശോഭയ്ക്കൊപ്പമാണ്.‘

‘അതു സങ്കടമായല്ലോ. ‘

‘നന്നായിയെന്നേ ഞാൻ പറയൂ. ഒരുമിച്ച് സന്തോഷമായി ജീവിയ്ക്കാൻ പറ്റുന്നില്ലെങ്കിൽ പിന്നെ‘……..മാഷ് നിറുത്തി.

‘അവർ വലിയ അടുപ്പത്തിലായിരുന്നുവല്ലോ…………’

‘ആയിരുന്നിരിയ്ക്കില്ല, കുട്ടീ. അടുപ്പം പോലെ തോന്നിപ്പിച്ച എന്തോ ഒന്നാവണം അന്നുണ്ടായത്. അവർക്കും മറ്റുള്ളവർക്കും ഈ എനിയ്ക്കു പോലും അത് മനസ്സിലായില്ല. അജിയുമായി പിരിഞ്ഞെങ്കിലും ശോഭ മോളെയും കൂട്ടി എന്നെയും ടീച്ചറെയും കാണാൻ വരാറുണ്ട്. വീട്ടിൽ കുറച്ച് ദിവസം താമസിയ്ക്കുകയും ചെയ്യാറുണ്ട്.‘

‘അജിയുടെ അച്ഛനായിട്ടും മാഷ്………… ശോഭയെ ഇപ്പോഴും ……….‘

‘ഭാര്യാഭർത്താക്കന്മാർക്ക് പരസ്പരം വെറുക്കാം, ചീത്ത വിളിയ്ക്കാം, തല തല്ലിപ്പൊട്ടിയ്ക്കാം, പിരിയാം……. എനിയ്ക്ക്……….. എന്റെ സ്റ്റുഡന്റ്സിനെ ഏതു കടലാസ്സിൽ ഒപ്പിട്ടാണ് ഞാൻ പിരിയുക?‘

മാഷ്ടെ വാക്കുകളിൽ ദയനീയമായ ഒരു കിതപ്പുണ്ടായിരുന്നു.

‘നമുക്ക് കഫറ്റേരിയയിൽ പോയി ഒരു കപ്പ് കാപ്പി കുടിയ്ക്കാം. വല്ലാത്ത ക്ഷീണം തോന്നുന്നു.‘ ഘന ഗംഭീരമായിരുന്ന ആ പഴയ ശബ്ദം ഇപ്പോൾ തളർന്നിരിയ്ക്കുന്നു.

കഫറ്റേരിയയിലേയ്ക്ക് അധികമില്ല. ഭാഗ്യം, ഇരിപ്പിടമുണ്ട്. അല്ലെങ്കിൽ ബുദ്ധിമുട്ടായിപ്പോയേനെ.

‘ഒരു മിക്സഡ് ജൂസ് മതി.‘ വെയിറ്റർ അടുത്ത് വന്നപ്പോഴേയ്ക്കും ഞാൻ വിളിച്ചു പറഞ്ഞു. സ്കാർഫ് നീങ്ങിപ്പോയ മുഖം കണ്ട് വെയിറ്റർ ഭയന്ന് വിറയ്ക്കുമെന്നെനിയ്ക്കുറപ്പായിരുന്നു. തിടുക്കത്തിൽ ആ തുണിക്കഷണം ശരിപ്പെടുത്തുമ്പോൾ ഞാൻ മാഷുടെ മുഖത്ത് നോക്കാൻ മടിച്ചു .

മാഷ് കാപ്പിയും ഒരു സ്ക്രാംബ്ല്ഡ് എഗ്ഗും ഓർഡർ ചെയ്തു. ആ മുട്ട വിഭവം എന്നെ….. ആക്രമിച്ച് കീഴ്പ്പെടുത്തുകയായിരുന്നു. തകർത്തെറിയുകയായിരുന്നു. പിച്ചിക്കീറുകയായിരുന്നു.

സിൽക്ക് കർട്ടനുകളുള്ള മനോഹരമായി അലങ്കരിച്ച ഡൈനിംഗ് റൂമിൽ, കുലീനയായ ഭാര്യയ്ക്ക് ചേരുന്ന വേഷവിതാനങ്ങളുമായി ഓർമ്മയുടെ, വേവുന്ന കാലങ്ങളിൽ……… പിഞ്ഞാണത്തിലെ വെണ്മയിൽ മൊരിഞ്ഞ മുത്തുകൾ പോലെ തുറിച്ചു നോക്കുന്ന ആ വിഭവം. ചില്ലു ഗ്ലാസുകളിൽ സൂര്യനലിഞ്ഞു ചേർന്ന് സ്വർണ വർണമായ ദ്രാവകം, അത് കൃത്യമായ ഇടവേളകളിൽ എരിവോടെ തൊണ്ടയിലൂടൊഴുകുമ്പോൾ….

ആദ്യം മടിയുണ്ടായിരുന്നു. ഒരു ഹിസ്റ്റീരിയക്കാരിയെപ്പോലെ ബഹളം വെച്ചിരുന്നു. ഒച്ചയുയരുമ്പോൾ, കൈകളുയരുമ്പോൾ മടിയും ഹിസ്റ്റീരിയയും കുറഞ്ഞു വന്നു. എന്നിട്ടും താടി വെച്ച ഒരു ബിസിനസ് പാർട്ണർ കോണിപ്പടിയിൽ വെച്ച് ചുണ്ടുകൾ കടിച്ചെടുത്ത ദിവസം ആവശ്യമില്ലാതെ കണ്ണീരൊഴുക്കുകയും ഡെറ്റോൾ കൊണ്ട് അനവധി പ്രാവശ്യം ചുണ്ടുകൾ കഴുകുകയും ചെയ്തു. അതൊക്കെ ഒരു പരിശീലനമായിരുന്നെന്ന് വെളിപ്പെട്ടത് ഭർത്താവ് വേറൊരാളെ മുറിയിൽ മറന്നു വെച്ചു പോയ രാത്രിയിലാണ്.

സ്വർണ നിറമുള്ള ദ്രാവകത്തിന് എല്ലാ പ്രതിഷേധത്തെയും തണുപ്പിയ്ക്കാൻ കഴിയുമായിരുന്നു. കൂർത്തു മൂർത്ത ചിന്തകളുടേയും പ്രതിഷേധത്തിന്റേയും ചോദ്യങ്ങളെ അലിയിപ്പിച്ചു കളയാനാകുമായിരുന്നു. എല്ലാം അനുസരിയ്ക്കുന്ന ഭാര്യയെ വേണ്ടാത്ത ഭർത്താവ് ഈ ലോകത്തിലില്ലെന്നതു പോലെ, വേറെയും പരമമാ‍യ സത്യങ്ങളുണ്ടെന്ന് ഞാൻ പതുക്കെപ്പതുക്കെ മനസ്സിലാക്കി.

സോപ്പു തേച്ചുള്ള ഒരു നല്ല കുളിയ്ക്കോ ആശുപത്രി ടേബിളിലെ കാലുകളുയർത്തിവെച്ചുള്ള നാണം കെട്ട കിടപ്പിനോ മാറ്റാൻ പറ്റാത്ത ഒരു അഴുക്കും പുരുഷന് പെണ്ണിൽ ഏൽ‌പ്പിയ്ക്കാൻ കഴിയില്ലെന്ന തിരിച്ചറിവായിരുന്നു ഞാൻ കണ്ടുപിടിച്ച ഏറ്റവും വലിയ സത്യം. അതറിഞ്ഞപ്പോൾ മുതൽ ഞാൻ ദാഹാർത്തയായി കാത്തിരുന്നു. സ്വർണ നിറമുള്ളതും കാപ്പിയുടെ നിറമുള്ളതും ഒരു നിറവുമില്ലാത്തതുമായ അനവധി ദ്രാവകങ്ങൾ കോരിയൊഴിച്ചിട്ടും എന്റെ ദാഹം ശമിച്ചില്ല. പുരുഷന്മാരുടെ ഗന്ധവും ഒരു ദിവസം വളർച്ചയെത്തിയ താടിരോമങ്ങളും എന്നെ മത്തുപിടിപ്പിയ്ക്കുകയും ഇക്കിളിപ്പെടുത്തുകയും ചെയ്തു. പലപ്പോഴും എനിയ്ക്ക് വലിച്ചെടുക്കാൻ മാത്രം ഒന്നുമില്ല പുരുഷനിലെന്നറിഞ്ഞ്, വലിയ ചട്ടക്കൂടിൽ കാണപ്പെടുന്ന ആ പഴന്തുണിക്കഷണങ്ങളോട് സഹതപിച്ചു. നീ എന്റെയൊരു വെറും കളിപ്പാട്ടമാണെന്ന് പറഞ്ഞും പറയാതെയും, പല ശരീരങ്ങളുമായി കൌശലക്കാരിയായ ഒരു മന്ത്രവാദിനിയായി കളിച്ചു രസിച്ചു.

ആ അറിവുകൾക്കൊപ്പം കണ്ണു കുത്തിത്തുരന്ന് ഞാൻ കണ്ണീരിനെ വറ്റിച്ചു കളഞ്ഞു. കണ്ണ് ചുവക്കുവോളവും ശ്വാസം മുട്ടുവോളവും മൂത്രം കിനിയുവോളവും പൊട്ടിച്ചിരിയ്ക്കാൻ പഠിച്ചു. മനസ്സെന്ന വാക്കിന്റെ അർത്ഥം കരിമ്പാറക്കെട്ടെന്നായിത്തീർന്നു

എന്റെ മാറ്റം കണ്ട് അദ്ദേഹം അമ്പരന്നു പോയി. പലപ്പോഴും “മിടുക്കി, മിടുക്കി“ എന്ന് അഭിനന്ദിച്ചു. ജീവിതവും മാറുകയായിരുന്നു. അദ്ദേഹം ആശിച്ച പ്രോജക്ടുകളും പിന്നെ പണവും പ്രതാപവും അതിന്റെ സർവ പ്രൌഡിയോടും കൂടി ജീവിതത്തെ ആശ്ലേഷിച്ചു.

മനസ്സിന്റെ തഴുതിട്ട ഉരുക്കു വാതിൽ ഇടിച്ചു തകർത്തത്, കരിമ്പാറക്കെട്ടിലെ നീരുറവയെ ചാലിട്ടൊഴുക്കിയത് മനോജായിരുന്നു. സത്യത്തിൽ അയാൾ മാത്രമാണ് ഞാൻ അതി കഠിനമായി സ്നേഹിയ്ക്കുകയും നെഞ്ചിൽ തലവെച്ചുറങ്ങാൻ ആഗ്രഹിയ്ക്കുകയും ചിലപ്പോഴെങ്കിലും വെറുക്കുകയും ശപിയ്ക്കുകയും ചെയ്തിട്ടുള്ള ഒരേയൊരു പുരുഷൻ.

എന്നെ നിസ്സഹായയാക്കിയവൻ. എന്നാലും മൃദുലമായി സ്നേഹത്തോടെ അലിവോടെ കരുണയോടെ കണ്ണുകൾകൊണ്ട് തലോടിയവൻ.

അയാൾ വിളിച്ചിരുന്നെങ്കിൽ കൂടെപ്പോകുമായിരുന്നുവോ എന്ന് പിന്നീട് ഞാൻ പലവട്ടം ആലോചിച്ചിട്ടുണ്ട്.

തണുത്തുറഞ്ഞ ഒരു രാത്രിയിൽ ഗ്ലാസ്സിലുരുകിയൊഴുകിയ സ്വർണം മുഴുവൻ വലിച്ചു കുടിച്ച ശേഷം, അയാൾ എന്റെ ഭർത്താവിന്റെ കരണത്തടിച്ചു.. “ ‘നാണം കെട്ടവനെ, കൂട്ടിക്കൊടുപ്പുകാരാ’“ എന്നലറി. ആ നിമിഷത്തിൽ ഞാൻ തളർന്നു പോയി. എന്റെ അഹന്ത അസ്തമിച്ചു. ഞാൻ എന്നെ വിളിയ്ക്കാൻ ഭയപ്പെടുന്ന ആ വാക്ക് എന്റെ വായിൽ വഴുവഴുപ്പോടെ ഇഴഞ്ഞു. ഭീമാകാരം പൂണ്ട ഒരു സർപ്പമായി അതെന്നെ ആഞ്ഞുകൊത്തി, ആ വിഷത്തീന്റെ കാളിമയിൽ ഞാൻ നീലിച്ചു.

ഞാനോടിച്ചെന്ന് മനോജിന്റെ കാൽക്കൽ ഒരു പട്ടിയെപ്പോലെ ചുരുണ്ടു കിടന്നു ഉച്ചത്തിൽ മോങ്ങി…“എന്നെ കൊണ്ടു പോകൂ”“ എന്ന് ആ കാലുകളെ കെട്ടിപ്പിടിച്ച് യാചിച്ചു.

അയാൾ ചീറി. “” നിന്നെ വിറ്റ് മതിയായില്ല, ഇനിയും സാമ്രാജ്യം വളർത്താനുണ്ട്, നിന്റെ ഭർത്താവിന്. നിനക്ക് പോയി ചത്തു കൂടെ പിശാചേ?” “

ഞാൻ നിവർന്നിരുന്നു. അപ്പോൾ നിറഞ്ഞൊഴുകുന്ന കണ്ണുകളോടെ അയാൾ എന്നെ നോക്കി,. ഈ ഭൂലോകത്തിൽ ഇതുവരെ രൂപമെടുത്തിട്ടുള്ള സമസ്ത സ്നേഹവും അതിരുകളില്ലാത്ത അലിവും മാത്രമായിരുന്നു അവയിൽ. അതിനു ശേഷമാവണം ഈ ലോകത്താർക്കും അലിവും സ്നേഹവും ലഭ്യമല്ലാതാ‍യിത്തീർന്നത്. കാരണം അതു മുഴുവൻ മനോജിന്റെ ഒഴുകുന്ന ആ കണ്ണുകളിലുണ്ടായിരുന്നുവല്ലൊ. എന്റെ ഭർത്താവ് ഒരു കൊടുങ്കാറ്റു പോലെ അതിവേഗം മുറി വിട്ടു പോയപ്പോൾ മനോജും അദ്ദേഹത്തെ പിന്തുടർന്നു.

പിറ്റേന്ന് രാവിലെ മുഷിഞ്ഞ വസ്ത്രങ്ങളോടെയും കലങ്ങിയ കണ്ണുകളോടെയും ഞാൻ മനോജിന്റെ ഫ്ലാറ്റിൽ പോയി അയാളെ കാണാൻ ശ്രമിച്ചു. നഗരത്തിലെ സാമാന്യം ഭേദപ്പെട്ട ഒരു തെരുവിലായിരുന്നു അയാൾ താമസിച്ചിരുന്നത്. ഒരു ഭ്രാന്തിയെപ്പോലെ ആ വാതിലിൽ ഇടിച്ചു നിലവിളിച്ചിട്ടും അയാൾ വാതിൽ തുറന്നതേയില്ല. അയൽ‌പ്പക്കക്കാർ ശ്രദ്ധിയ്ക്കുന്നതു വരെയും, എന്റെ ഭർത്താവ് കഠിനമായ കോപത്തോടെ വന്നെത്തുന്നതു വരെയും ഞാനവിടെ കുത്തിയിരുന്നുവെങ്കിലും അയാൾ പുറത്തു വരാൻ കൂട്ടാക്കിയില്ല.

പുരുഷന്മാർ ഇങ്ങനെയാണ്. ആരാണവരെ സ്നേഹിയ്ക്കുന്നതെന്ന് അവർക്കറിയാൻ കഴിയുകയില്ല. കത്തുന്നതും നീറിപ്പിടിയ്ക്കുന്നതുമായ സ്നേഹം അവരെ ഭയപ്പെടുത്തും. അപ്പോൾ അവർ ജാതി, മതം, കുടുംബ മഹിമ, ചാരിത്ര്യം, പണം, വിദ്യാഭ്യാസം, ജോലി, നിറം, മുടി, അമ്മ, പെങ്ങൾ എന്നു തുടങ്ങിയ കാക്കത്തൊള്ളായിരം പരിചകൾകൊണ്ട് സ്നേഹത്തെ പ്രതിരോധിയ്ക്കും. പിന്നീട് പരിചകൾക്കുള്ളിൽ ഒതുങ്ങിക്കഴിയുമ്പോഴാവട്ടെ കത്തുന്ന ആ സ്നേഹത്തെ തിരഞ്ഞ് ഒരു ജന്മം മുഴുവൻ ഇരുട്ടിൽ പരതി നടക്കും. ലോകത്തോടു മുഴുവൻ പല പല കാരണങ്ങൾ നിരത്തി പരാതിപ്പെടും.

തിരുമ്മിത്തിരുമ്മി പിഞ്ഞി മുഷിഞ്ഞ ഒരു കോട്ടൺ സാരിയും ധരിച്ച് അയാൾക്കൊപ്പം ഏതു ചെളിയിലും ഞാൻ ആഹ്ലാദത്തോടെ ജീവിയ്ക്കുമായിരുന്നു.

മനോജിന്റെ ഫ്ലാറ്റ് സ്ഥിതി ചെയ്യുന്ന കെട്ടിട സമുച്ചയത്തിൽ നിന്ന് എന്നെ നിർബന്ധിച്ച് കാറിൽ കയറ്റിയപ്പോൾ കോപം കൊണ്ട് അദ്ദേഹം ഒരു ഭ്രാന്തനായിത്തീർന്നിരുന്നു. എനിയ്ക്കപ്പോൾ അലറിച്ചിരിയ്ക്കാൻ കഴിഞ്ഞു. എന്നിൽ ഒന്നുമില്ലാതിരുന്നിട്ടും അദ്ദേഹം എന്റെ മുൻപിൽ ഒരു പുഴുവിനെപ്പോലെ നിസ്സാരനായിത്തീർന്നുവെന്ന് എനിയ്ക്ക് തോന്നി.

വീട്ടിൽച്ചെന്ന് ഞാനൊരു ഡ്രിങ്ക് ഫിക്സ് ചെയ്യുമ്പോഴായിരുന്നു, അദ്ദേഹം എന്നോട് ചർച്ച ചെയ്യാൻ മുതിർന്നത്. എന്നെ കുറ്റപ്പെടുത്താൻ ശ്രമിച്ചത്, നിലയും വിലയും മറന്ന് പെരുമാറരുതെന്ന് ഉപദേശിച്ചത്. ഡ്രിങ്കിനൊപ്പമുള്ള സ്ക്രാംബ്ൾഡ് എഗ്ഗെന്ന ഉപദംശമായി മാറാൻ ഞാൻ കോഴിമുട്ടകളെ ഒന്നൊന്നായി പാനിലേയ്ക്ക് പൊട്ടിച്ചൊഴിച്ചു പൊള്ളിച്ചുകൊണ്ടിരുന്നു.

തർക്കമൊഴിവാക്കണമെന്ന് ആഗ്രഹമുണ്ടായിരുന്നുവെങ്കിലും എനിയ്ക്ക് സഹിയ്ക്കാൻ കഴിഞ്ഞില്ല. മനോഹരമായി വസ്ത്രം ധരിച്ച, വിലകൂടിയ സിഗരറ്റ് പുകയ്ക്കുന്ന ആ പുരുഷ ശരീരത്തെ ഒരു യക്ഷിയെപ്പോലെ വലിച്ചു കുടിയ്ക്കണമെന്നും എല്ലുകൾ കടിച്ചു പൊട്ടിയ്ക്കണമെന്നും ഞാൻ ആഗ്രഹിച്ചു. ആ രക്തം കൊണ്ട് കുതിർന്ന എന്റെ ചുണ്ടുകളുടെ മോഹിപ്പിയ്ക്കുന്ന വർണ്ണം ലോകത്തൊരു ലിപ്സ്റ്റിക്കിനും ലഭിയ്ക്കുകയില്ല.

എനിയ്ക്ക് രാക്ഷസീയമായ കരുത്തുണ്ടായി. പക്ഷെ, അടുത്ത നിമിഷം അടുപ്പിൽ നിന്നും പറന്നുയർന്ന പാതി വെന്ത കോഴിമുട്ടകൾ എന്റെ കണ്ണിലമർന്നു. തൊലി കരിയുമ്പോഴുള്ള ചെടിപ്പിയ്ക്കുന്ന മണം എല്ലായിടത്തും വ്യാപിച്ചു. കവിളിലെ പച്ച മാംസത്തിൽ ചുട്ടു പഴുത്തൊരു പാത്രം അമർന്നാലെങ്ങനെയിരിയ്ക്കുമന്നറിയാമോ?

ആ വേദനയും പിടച്ചിലും…………. തൊണ്ട പൊട്ടുന്ന കരച്ചിൽ………… ശരീരമാകെ ആളിപ്പടരുന്ന കഠിന വേദനയുടെ കൈകൾ……….. കത്തുന്ന സിഗരറ്റിന്റെ കഷ്ണം മുടിയിഴകളിൽ പരതിയപ്പോൾ പൂമണമുള്ള കറുത്ത പട്ടു നാരുകൾ വെന്തടർന്നു. തീയ്ക്കെന്തൊരു ചൂടും നീറ്റവുമാണെന്നോ! ആ ചൂടിൽ തലച്ചോറും നെഞ്ചിൻ കൂടും ലക്ഷം നുറുങ്ങുകളായി പൊട്ടിത്തകരും.

അദ്ദേഹത്തിനു വിവാഹമോചനം അനുവദിച്ച ന്യായാധിപൻ ഈ മുഖം കണ്ട് ഭയന്നു വിളറി. ആത്മഹത്യാ പ്രവണതയുള്ള സ്ത്രീയ്ക്കൊപ്പം കഴിയാനാവില്ലെന്ന് അദ്ദേഹം വാദിച്ചപ്പോൾ, എന്റെ മുഖത്ത് നോക്കി തരിച്ചിരുന്ന ന്യായാധിപന് സമ്മതിയ്ക്കുകയേ മാർഗമുണ്ടായിരുന്നുള്ളൂ. ന്യായാധിപന്മാർ ഒരിയ്ക്കലും സാക്ഷികളായ സൂര്യന്മാരാകുന്നില്ല, അവരെന്നും കേൾപ്പിയ്ക്കുന്നത് കേൾക്കുന്നവരും കാണിയ്ക്കുന്നതു കാണുന്നവരും മാത്രമാകുന്നു.

റെയിൽപ്പാളത്തിൽ നിന്ന് എന്നെ രക്ഷപ്പെടുത്തിയെന്ന് അറിയിച്ച അദ്ദേഹത്തിന്റെ പുരുഷ സുഹൃത്തിനോട് കോടതി ഒരു വിശദീകരണവും ആവശ്യപ്പെട്ടില്ല. ഡിസൈനർ സാരികൾ ധരിച്ച് സുഗന്ധം പുരട്ടിയ സ്ത്രീ സുഹൃത്തുക്കൾ സഹതാപവും സ്നേഹവും നിറച്ച മിഴികളാൽ അദ്ദേഹത്തിനെ തലോടിക്കൊണ്ട് കോടതി മുറിയിൽ നിശബ്ദരായി നിന്നു.

വിധിയ്ക്ക് ശേഷം എന്റെയരികിൽ വന്ന് ഇടിമിന്നൽ പോലെ പുഞ്ചിരിച്ചുകൊണ്ട്, അവസാനമായി കാതിൽ ഈയം ഉരുക്കിയൊഴിയ്ക്കുവാൻ അദ്ദേഹം മറന്നില്ല. ‘നീ പൂപ്പൽ പിടിച്ച് ഒടുങ്ങും. ഒരു മനുഷ്യജീവിയും നിന്നെ ഇനി തൊടുകയില്ല. നിന്റെ മനോജു പോലും. ഇതാണെന്റെ പ്രതികാരം. ആൾ ദ ബെസ്റ്റ് ‘

വർഷങ്ങൾ കടന്നു പോയിരിയ്ക്കുന്നു.

കരിഞ്ഞടർന്ന മുഖവും തുറിച്ചുന്തി വികൃതമായ കാഴ്ചയില്ലാത്ത വലതു കണ്ണും പറ്റേ വെട്ടിയ തലമുടിയുമായി ഒരു സ്കാർഫിന്റെ തണലിലൊതുങ്ങിയ എന്റെ ജീവിതം………….. എങ്കിലും അദ്ദേഹത്തിന്റെ ആ കണക്കുകൂട്ടൽ ഓരോ തവണ തെറ്റിയ്ക്കാൻ കഴിഞ്ഞപ്പോഴും, ഞാൻ സമനില മറന്നവളെപ്പോലെ മനോജിനായി ദാഹിച്ചു.

കരിഞ്ഞ മുഖത്ത് ഒരു കഷ്ണം തുണിയിട്ടു കഴിഞ്ഞാൽ , “വാട്ടീസ് ബ്യൂട്ടി വെൻ ദ ലൈറ്റ് ഈസ് പുട്ട് ഓഫ്“ എന്ന് പുലമ്പുന്ന കവിയും, ഭാര്യ ഉപേക്ഷിച്ചു പോയ ഭർത്താവും, വിവാഹത്തിനു മുൻപ് കാമശാസ്ത്രം പഠിയ്ക്കാൻ വന്ന വരനും, “’ എന്റെ ഒരു കുഞ്ഞിനെ പെറ്റു താ’ “ എന്ന് കേഴുന്ന എഴുപതുകാരനും…..എല്ലാവരും ചില കാര്യങ്ങളിൽ ഒരു പോലെ പെരുമാറുമെന്ന് എനിയ്ക്ക് മനസ്സിലായി. ഒരു പേരോ മുഖമോ തലമുടിയോ മേൽ വിലാസമോ ഒന്നും പെണ്ണിന് ആവശ്യമില്ലെന്നും ഞാൻ കണ്ടുപിടിച്ചു.

മനോജ് എന്നെങ്കിലുമൊരിയ്ക്കൽ എന്നെ കാണുവാൻ വരുമെന്ന് ഞാൻ കുറെക്കാലം വിചാരിച്ചുകൊണ്ടിരുന്നു. ആ നിറഞ്ഞൊഴുകുന്ന കണ്ണുകളെ മാത്രം ധ്യാനിച്ചുകൊണ്ട്….. ആ ധ്യാനം അയാളെ എന്നിലെത്തിയ്ക്കുമെന്ന്……..പിന്നെപ്പിന്നെ നീറുന്ന പുണ്ണുകളുടെ വേദന താങ്ങാനാവാതെയായപ്പോൾ അയാളെ ഞാൻ മറന്നു തുടങ്ങി.

 ‘ജൂസ് കുടിയ്ക്കുന്നില്ലേ? ഞാൻ കഴിച്ചു തീർത്തു” മാഷ്ടെ ശബ്ദം എന്നെ കഫറ്റേരിയയിലേ ബഹളത്തിലേയ്ക്ക് തിരിച്ച് കൊണ്ടു വന്നു.

വലതു ചുണ്ടിലെ കരിവാളിപ്പിനും വൈകൃതത്തിനുമിടയിലൂടെ ജൂസ് കവിഞ്ഞൊഴുകാതിരിയ്ക്കാൻ ശ്രദ്ധിച്ചുകൊണ്ട് ഞാൻ ഗ്ലാസ് ചുണ്ടോട് ചേർത്തു.

ബില്ല് കൊടുത്ത് എണീറ്റപ്പോൾ മാഷ് എന്റെ ചുമലിൽ ആ കൈ വെച്ചു.

‘അക്ഷരങ്ങളുടെ അനുഗ്രഹത്തെ മറന്നു കളയരുത്. കുട്ടിയറിഞ്ഞത്രയും പുണ്ണുകളുടെ നീറ്റൽ അധികമാരും അറിഞ്ഞിട്ടുണ്ടാവില്ല. ഇനി ബാക്കിയുള്ള കുറച്ചു സമയം ഈ ലോകത്തോട് സംസാരിയ്ക്കൂ. ഇത്രയും അനുഭവിച്ച ശേഷം ഈ ലോകത്തെ തരിമ്പും ഭയപ്പെടരുത്.’

തുറിച്ചുന്തി വികൃതമായ കണ്ണിലും അപ്പോൾ നനവു പൊടിഞ്ഞു.

ഇതാണ് എന്റെ പുസ്തകം…“പുണ്ണെഴുത്തുകൾ“. പല തരം മനുഷ്യ ജീവിതങ്ങൾ ഒരു പെണ്ണിനു നൽകിയ നീറുന്ന പുണ്ണുകളുടെ ഓർമ്മപ്പുസ്തകം. എങ്കിലും തുടയിടുക്കുകളേയും മുലമൊട്ടുകളെയും കാണുവാൻ മാത്രമായി ആരും ഈ പേജുകൾ മറിയ്ക്കരുത്.

ഒരേ സൂര്യന്റെ വെളിച്ചവും ചൂടും അനുഭവിയ്ക്കുന്ന ഒരു പെണ്ണും നിങ്ങളും തമ്മിലെ അന്തരമാണിതിലെ അക്ഷരങ്ങൾ. ഒരേ മഴ പെയ്യുന്ന വീട്ടു മുറ്റങ്ങളിലെ അകൽച്ചയാണിതിലെ വാക്കുകൾ. ഒരേ കാറ്റു വീശുന്ന കടൽക്കരകളിലെ ഉഷ്ണമാണിതിലെ തലക്കെട്ടുകൾ. ഒരേ പൂക്കൾ വിരിയുന്ന പൂന്തോട്ടങ്ങളിലെ നിറവ്യത്യാസമാണിതിലെ അധ്യായങ്ങൾ.

എച്മുകുട്ടി

*******************