പ്രിയ വായനക്കാരെ,

ഞങ്ങള്‍ സ്വന്തം ഡോമൈനിലേക്ക് മാറുന്നത് കാരണത്താലും മറ്റു ചില ഔദ്യോഗിക ആവശ്യങ്ങളാല്‍ ഉള്ള തിരക്ക് കാരണവും കഴിഞ്ഞ കുറച്ചു ദിവസങ്ങള്‍ ആയി പതിവു പംക്തികളും പുതിയ പോസ്റ്റുകളും പ്രസിദ്ധീകരിക്കാന്‍ സാധിച്ചില്ല . ഒക്ടോബര്‍ ഒന്നു മുതല്‍ ഞങ്ങള്‍ വീണ്ടുംസജീവമായി ബൂലോകത്ത് ഉണ്ടായിരിക്കുന്നതാണ് എന്ന് ഈഅവസരത്തില്‍ അറിയിക്കട്ടെ.

ഈ അടുത്തിടെ വന്ന ഒരു ബ്ലോഗ്‌ പോസ്റ്റിലേക്ക് ഏവരുടെയും ശ്രദ്ധ ക്ഷണിക്കുന്നു........

........മഹാരഥന്‍ എല്ലാവരെയും തൂക്കിലേറ്റും എന്നോ ജയില്‍ വാസം എനുഭവിക്കുമെന്നോ എന്നൊക്കെ പറഞ്ഞു പോസ്റ്റ്‌ ഇട്ടപ്പോള്‍ സത്യത്തില്‍ മേപ്പടിയന്റെ മനോനിലയെപ്പറ്റി ഓര്‍ത്ത്‌ സഹതാപം വന്നു. ഭാരതത്തിലെ ബ്ലോഗ് പൌരന്‍ ഉഗാണ്ടയില്‍ കുറ്റം ചെയ്താലും ഭാരതത്തില്‍ ട്രയല്‍ നടത്താമെങ്കിലും കൂടുതല്‍ വായിക്കാന്‍ ഇവിടെ ജ്ഞാനം ഉണ്ടായിരുന്നെങ്കില്‍ എന്ന് ആഗ്രഹിച്ചുപോകുന്നു. കാരണം ഈ സംഭവം കൊണ്ടുവന്ന പത്രം ഒരുപക്ഷെ കേസ്‌ കൊടുത്താല്‍ ഭീഷണിയുടെ കാര്യം (അതും കുറ്റം ആണ് നികൃഷ്ടജീവി..) ആശാന്‍ സമാധാനം പറയേണ്ടി വരും.
എന്തായാലും കളി തീര്‍ന്നിട്ടില്ല. ഒരുപക്ഷെ തുടങ്ങിയിട്ടേ ഉള്ളൂ.. ഇനി കളികള്‍ ചിലര്‍ പഠിക്കും.. ചിലരെ കളികള്‍ പഠിപ്പിക്കും.. കുറ്റം ചെയ്യുന്നവര്‍ മഹാന്മാരും അതിനെ ചൂണ്ടിക്കാണിക്കുന്നവനെ ക്രൂശിക്കുകയും ചെയ്യുന്നതാണോ ധര്‍മ്മം. മെഡിക്കല്‍ എത്തിക്സിന്റെയും മാനവികതയുടെയും പേരില്‍ കഴുതക്കരച്ചില്‍ നടത്തുന്നവര്‍ ഒരു ക്രിമിനലിന്റെ തട്ടിപ്പിന് കുടപിടിക്കുന്ന കാഴ്ചയാണ് കാണുന്നത്..........

കൂടുതല്‍ ഇവിടെ വായിക്കാം......

'വിന' യുടെ ഈ പോസ്റ്റ് കൂടി ഒന്നു കണ്ടു നോക്കൂ.....

നിയമനടപടി നേരിടാന്‍ ഞങ്ങള്‍ തയ്യാര്‍

കഴിഞ്ഞ രണ്ട് പോസ്റ്റുകളിലായി ചര്‍ച്ച ചെയ്ത ഒരു ഇന്റര്‍നെറ്റ് അധിഷ്ടിത ധന സമ്പാദന രീതിയെക്കുറിച്ച് ഞങ്ങളുടെ അവസാന നിഗമനങ്ങള്‍ അവതരിപ്പിക്കുന്നു.

മുഖ്യധാരാ മാധ്യമങ്ങളിലെ സ്കൂപ്പ് വാര്‍ത്തകളും അതിശയോക്തിപരമായ അന്വേഷണറിപ്പോര്‍ട്ടുകളും മാത്രം കണ്ടു ശീലിച്ച ഒരു സാധാരണ മലയാളിവായനക്കാരനെ സംബന്ധിച്ചിടത്തോളം നമ്മുടെ ബൂലോകം നടത്തിയ ഈ അന്വേഷണ റിപ്പോര്‍ട്ട്‌ വെറും “ഉഹാപോഹങ്ങള്‍ ”എന്ന നിലയിലേ കാണാനാവൂ എന്ന് മനസ്സിലാക്കുന്നു. പക്ഷേ സിയാബ് ഐ.എ.എസ് അന്വേഷണത്തിനു പിന്നിലെ കാര്യങ്ങൾ അങ്ങനെയല്ല. ഓരോരുത്തര്‍ക്കും തന്റേതായ മാര്‍ഗ്ഗങ്ങളില്‍ക്കൂടി സത്യം അന്വേഷിച്ചു കണ്ടുപിടിക്കുവാനും അത് പൊതുസമൂഹത്തെ ബാധിക്കുന്ന ഒരു കാര്യമാണെങ്കില്‍ ഒരു മാധ്യമത്തില്‍ കൂടി പുറത്തുകൊണ്ടുവരാനുമുള്ള സാമൂഹ്യപ്രതിബദ്ധതയുണ്ട് എന്ന് നമ്മുടെ ബൂലോകം കരുതുന്നു. ബ്ലോഗ് എന്ന മാധ്യമം നല്‍ കുന്ന സൌകര്യം അതിനായി ഉപയോഗിച്ചു എന്നുമാത്രം. ഇത് സിയാബ് എന്ന വ്യക്തിയുടെ സ്വകാര്യതകളിലേക്കുള്ള ഒരു കടന്നുകയറ്റമായിരുന്നില്ല. മറീച്ച് അദ്ദേഹം തന്നെ വരുത്തിവച്ച ചില തെറ്റിദ്ധാരണകളുടെ പിന്നിലേക്കുള്ള ഒരു അന്വേഷണമാണ് നമ്മുടെ ബൂലോകത്തെ ഈ വിവരങ്ങൾ കണ്ടെത്തുവാൻ സഹായിച്ചത്. മുഖ്യധാരാമാധ്യമങ്ങള്‍ പലതും പുറത്തുപറയുവാൻ താല്പര്യം കാണിക്കാത്ത കാര്യങ്ങള്‍ ബ്ലോഗ് എന്ന മാധ്യമത്തില്‍ കൂടി പുറത്തുവരാം എന്നാണ് ഞങ്ങളുടെ വിശാസം.


ബൂലോകര്‍ക്ക് സുപരിചിതയായ ഒരു ബ്ലോഗര്‍ക്ക് നേരിട്ട ഒരു വഞ്ചന കഥ അറിഞ്ഞപ്പോഴാണ് , വ്യക്തിപരമായ ചിലപരാമര്‍ശങ്ങളുണ്ടായിരുന്നിട്ടും ഈ വിഷയം നമ്മുടെ ബൂലോകം സ്വയമേവ ഏറ്റെടുക്കുന്നത്. ഇത് പൂര്‍ണ്ണമായും തട്ടിപ്പാണെന്ന് ബോദ്ധ്യപ്പെട്ട നിമിഷം തന്നെ ഇതിലുള്‍പ്പെട്ട സിയാബിനെ നിയമത്തിന്റെ വഴിക്ക് കൊണ്ടുവരാന്‍ ഞങ്ങള്‍ അഭ്യര്‍ത്ഥിച്ചതാണ്. എന്നാല്‍ കഷ്ടതയാര്‍ന്ന ജീവിത സാഹചര്യങ്ങളോട് മല്ലിട്ട് ഉന്നത കോളേജ്‌ വിദ്യഭ്യാസം വരെ എത്തി , മാന്യമായൊരു തൊഴിലിലും ഏര്‍പ്പെട്ടിരിക്കുന്ന ഈ വ്യക്തി എന്തെങ്കിലും നിവര്‍ത്തികേട് കൊണ്ടുള്ള കാരണങ്ങളാൽ പറഞ്ഞ കള്ളങ്ങളാണെങ്കില്‍ , അയാളെ നിയമത്തിന്റെ മുന്നിലേക്കും ശിക്ഷാ നടപടികളിലേക്കും അയക്കുന്നതില്‍ യോജിപ്പില്ലെന്നായിരുന്നു പണം നഷ്ടപ്പെട്ട ബ്ലോഗറുടെ നിലപാട്. അതിനാല്‍ തന്നെ കേസ് ഫയല്‍ ചെയ്യാന്‍ താത്പര്യമില്ലെന്ന് അവരറിയിച്ചു.

എന്നാല്‍ നമ്മുടെ ബൂലോകം ഈ വിഷയത്തെ അതീവ ഗൌരവമായാണ് വീക്ഷിച്ചത്. ബ്ലോഗര്‍മാരും അല്ലാത്തവരുമായ ഇന്റര്‍നെറ്റ് ഉപയോക്താക്കള്‍ക്ക് മേലില്‍ ഇത്തരം അബദ്ധങ്ങള്‍ പറ്റാതിരിക്കാനും, തട്ടിപ്പിനു വിധേയരാവാതിരിക്കാനുമായി ഈ വിഷയം വായനക്കാര്‍ മൊത്തം അറിഞ്ഞിരിക്കണമെന്ന് ഞങ്ങള്‍ക്ക് തോന്നി. അതിനായ് വ്യക്തിപരമായി പലരുടേയും സഹായം തേടുകയും അവ ലഭിക്കുകയും ചെയ്തു.

സിയാബിന്റെ ചില അടുത്ത സുഹൃത്തുക്കളുമായി ഫോണില്‍ ബന്ധപ്പെടുകയും ഞങ്ങളുടെ സംശയം ദൂരീകരിക്കണമെന്ന് അഭ്യര്‍ത്ഥിച്ചെങ്കിലും വേണ്ട രീതിയില്‍ സഹകരണം ലഭിച്ചില്ല. പിന്നീട് മെയില്‍ വഴി ബന്ധപ്പെട്ടു. അതിനും അനുകൂല മറുപടി ലഭിച്ചില്ല. സിയാബിനെ നേരില്‍ ബന്ധപ്പെടാന്‍ പലവുരു ഞങ്ങൾ ശ്രമിച്ചിട്ടും സാധിക്കാതെ വന്നതിനാല്‍ ചില രേഖകള്‍ പരസ്യപ്പെടുത്താന്‍ ഞങ്ങള്‍ നിര്‍ബന്ധിതരാവുകയായിരുന്നു. കൊച്ചിയിൽ നിന്ന് ഒരു ഓട്ടോ പിടിച്ചാൽ സിയാബിനെ കാണാൻ സാധിക്കില്ലേ എന്ന്‍ പലരും ചോദിച്ച ചോദ്യത്തിനുത്തരമാണിത്.

ഈ സാഹചര്യത്തിലാണ് ലഭിച്ച വിവരങ്ങള്‍ പരമാവധി സ്വകാര്യത സൂക്ഷിച്ചും പ്രസക്തഭാഗങ്ങള്‍ മാത്രം വെളിവാക്കിയും ഞങ്ങള്‍ പ്രസിദ്ധീകരിച്ചത്. ഓരോ ഘട്ടത്തിലും കൂടുതല്‍ സങ്കീര്‍ണ്ണതകളിലേക്ക് വിഷയം വഴുതിപ്പോകാതിരിക്കാന്‍ ഞങ്ങള്‍ ശ്രമിച്ചിരുന്നു. അത് കൊണ്ടു മാത്രമാണ് കമന്റ് മോഡറേഷന്‍ വച്ചിരുന്നത്. സിയാബിന്റെ സ്വകാര്യ ജീവിതത്തിലുള്ള ഞങ്ങള്‍ക്കറിയാവുന്ന ചില കാര്യങ്ങള്‍ ഒഴിവാക്കുന്നതിനു വേണ്ടിയായിരുന്നു അത്. ഞങ്ങളെ ചീത്ത വിളിച്ചു കൊണ്ടുള്ള കമന്റുകള്‍ ഞങ്ങള്‍ പ്രസിദ്ധീകരിച്ചിരുന്ന കാര്യം എല്ലാവരും ഓര്‍ക്കുമല്ലോ. എന്നിട്ട , വീണ്ടും വീണ്ടും നുണകള്‍ നിരത്തി സിയാബും, സിയാബിന്റെ സുഹൃത്തുക്കളും ഈ വിഷയം സങ്കീര്‍ണ്ണമാക്കുകയായിരുന്നു.

ആദ്യ വാര്‍ത്ത പ്രസിദ്ധീകരിച്ചപ്പോള്‍ മേരിലില്ലി, അരുണ്‍ ചുള്ളിക്കല്‍ തുടങ്ങിയവർ പങ്കുവച്ച ആശങ്കകളും, പ്രതികരണങ്ങളും ഞങ്ങള്‍ക്ക് മനസ്സിലാകുന്നുണ്ട്. സിയാബ് അവരെ ധരിപ്പിച്ചിരുന്നതുപോലെ തനിക്ക് ക്യാന്‍സര്‍ ആണെന്ന കാര്യം താന്താങ്ങള്‍ക്ക് മാത്രം അറിയാവുന്ന ഒരു കാര്യമാണെന്ന തെറ്റിധാരണയാണ അവരെക്കൊണ്ട് അങ്ങനെ പറയിപ്പിച്ചത്. എന്നാല്‍ അത് ഒരു തെറ്റിദ്ധാരണ മാത്രമാണ്. സിയാബ് ക്യാന്‍സര്‍ പേഷ്യന്റാണെന്ന് അയാളെ അറിയാവുന്ന ഭൂരിഭാഗം പേരോടും പറഞ്ഞിട്ടുണ്ടെന്നാണ് ഞങ്ങള്‍ക്ക് മനസ്സിലാക്കാനായത്.

ഇനി പലരും ഞങ്ങളോട് കമന്റിലൂടെയും മെയിലിലൂടെയും ആവശ്യപ്പെട്ട ഒരു കാര്യമുണ്ട്. സിയാബിനെ നിയമത്തിന്റെ മുന്നിലെത്തിക്കണമെന്നതാണ് അത്. എന്നാല്‍ ഒരു പത്രം എന്ന നിലയില്‍ ശരിയായ വസ്തുതകള്‍ അന്വേഷിച്ചു വായനക്കാരുടെ മുന്നില്‍ അവതരിപ്പിക്കുക എന്നതാണ് ഞങ്ങളുടെ കര്‍ത്തവ്യം . കാരണം ബ്ലോഗ്‌ എന്ന മാധ്യമം ഇത്തരം പണ സമ്പാധനത്തിന് വേണ്ടി ചൂഷണം ചെയ്യപ്പെടുന്നു എന്നറിയുമ്പോള്‍ മറ്റുള്ള ബ്ലോഗേഴ്സ് ചതിയില്‍ പ്പെടുന്നത് കാണാതിരിക്കാന്‍ ഞങ്ങള്‍ക്കാവില്ല. ഞങ്ങളുടെ അറിവില്‍ ഇത് വരെ നാലോളം ബ്ലോഗ്ഗേഴ്സ് പണം നല്‍കിക്കഴിഞ്ഞു.

പലരും ഞങ്ങളില്‍ നിന്നും ആവശ്യപ്പെട്ട ഉത്തരങ്ങള്‍ ഇവിടെ അറിയിക്കട്ടെ.......ഇവ സിയാബിനു പണം നല്കിയ ബ്ലോഗറുടെ നിര്‍ദ്ദേശ പ്രകാരമാണ് ഞങ്ങള്‍ പ്രദിപാദിക്കുന്നതു.

@ കൂടുതല്‍ പരാതിക്ക് പോകാത്തത് സിയാബിനെ കൂടുതല്‍ കുഴപ്പങ്ങളിലേക്ക് വലിച്ചിഴക്കാതിരിക്കാനാണ്.

@ പ്രവാസി ബ്ലോഗര്‍ നല്കിയ പൈസ തിരികെത്തരാം എന്നു പറഞ്ഞു സിയാബിന്റെ എസ്.എം.എസ് രണ്ടു തവണ കഴിഞ്ഞ ദിവസം ആ ബ്ലോഗര്‍ക്ക് ലഭിച്ചു . അതിനു അവര്‍ നേരിട്ടു പ്രതികരിച്ചിട്ടില്ല. കാരണം ആ പൈസ സിയാബ് പറയും പോലെ കടമായി കൊടുത്തതല്ല. അവനെ (കഥകള്‍ വിശ്വസിച്ച്)സഹായിക്കാനായി കൊടുത്തുപോയതാണ്. സിയാബിന് ശരിക്കും അസുഖം ഉണ്ടെന്ന് ആര്‍ക്കെങ്കിലും തെളിയിക്കാനായാല്‍ ( മോണയില്‍ ക്യാന്‍സര്‍ ഇല്ല എന്ന് 100% ഞങ്ങള്‍ക്ക് ഉറപ്പാണ്) ആ പണം സിയാബിനുള്ളതു തന്നെയാണ്.

@ താന്‍ , അര്‍ഹതപ്പെടാത്ത വഴിയിലൂടെ സമ്പാദിച്ച പണം സിയാബിന് തിരിച്ചു തരാന്‍ ആഗ്രഹം ഉണ്ടെങ്കില്‍ , ബ്ലോഗ് കൂട്ടായ്മയുടെ സഹായ ഹസ്തമായ ബൂലോഗ കാരുണ്യത്തിന്റെ കേരളത്തിലുള്ള പ്രതിനിധി കളുടെ കയ്യില്‍ 'നമ്മുടെ ബൂലോകം' പത്രത്തിന്റെ സാന്നിദ്ധ്യത്തില്‍ ' മുസ്തഫ' യുടെ വീട് പണിക്കായുള്ള ഫണ്ടിലെക്കോ മറ്റു ജീവ കാരുണ്യ പ്രവര്‍ത്തനത്തിലെക്കോ നല്‍കിയാല്‍ മതിയാകും.

@ കൊടുത്ത സഹായം എന്തിനു ഉമ്മച്ചീ വിളിച്ചു പറഞ്ഞു എന്ന് ചിലര്‍ ചോദിച്ചുവല്ലോ. ലളിതമാണ് അതിന്റെ ഉത്തരം - അര്‍ഹതപ്പെട്ട ഒരാള്‍ക്കല്ല സംഭാവന ലഭിച്ചത് എന്ന തിരിച്ചറിവ്.
ചോദ്യങ്ങള്‍ക്ക് വ്യക്തമായി മറുപടീ പറയാത്ത സിയാബിന്റെ രീതികള്‍ ,വ്യാജമായ സി.ആര്‍ .നമ്പര്‍ കൊടുക്കല്‍ ,

ഡോക്‍ടറുടെ ശരിയായ പേര് കൊടുക്കാതെയുള്ള ഒഴിഞ്ഞ് മാറ്റം,

ആദ്യ മൂന്നു ഘട്ടം പണം അയച്ചതിന് ശേഷം അവ കിട്ടി എന്നറിയിച്ചു SMS വന്നിരുന്നു. എന്നാല്‍ പിന്നീട് രോഗ വിവരം തിരക്കുമ്പോള്‍ ഫോണിലോ മെയിലിലോ ബന്ധപ്പെടാതെ വിട്ടു നിന്നത്,

" LEAVE ME ALONE " എന്ന SMS മറുപടിയായി അയക്കുന്നത് ,

തനിക്ക് തന്ന മെയില്‍ ഐ ഡി മാറ്റി പണം നല്കിയ ബ്ലോഗറുടെ സുഹൃത്ത് വലയത്തിലുള്ളവരെ ആ സമയത്തും ബന്ധപ്പെട്ട് കൊണ്ടിരുന്നത് ....... തുടങ്ങിയ കാര്യങ്ങള്‍ ആ തിരിച്ചറിവിലേക്ക് മുതല്‍ക്കൂട്ടായി.

കൂടുതല്‍ ആളുകള്‍ ഈ രീതിയിലെ ചതിക്കുഴികളില്‍ വീഴാതിരിക്കാനും വേണ്ടി യാണ് ഈ വിവരം പുറത്തറിയിക്കാന്‍ ശ്രമിച്ചത്.

@ ഉമ്മച്ചി ഈ ആവശ്യത്തിനായി മറ്റു ചില ബ്ലോഗര്‍മാരില്‍ നിന്നും സമാഹരിച്ച ഇരുപതിനായിരത്തോളം രൂപ വീണ്ടും അയക്കുവാന്‍ തുടങ്ങുമ്പോള്‍ ആണ് സംശയ നിവാരണത്തിനായി സുഹൃദ് വലയത്തിലുള്ള

മറ്റു ചില ബ്ലോഗ്ഗേഴ്സിനെ സമീപിച്ചത്. തുടര്‍ന്ന് അവര്‍ നമ്മുടെ ബൂലോകം പത്രവുമായി ചേര്ന്നു നടത്തിയ അന്വേഷണത്തില്‍ ആണ് യാഥാര്‍ത്ഥ്യം വെളിപ്പെട്ടത്.


അങ്ങനെ കുറെ നാള്‍ നീണ്ട അന്വേഷണത്തിനും വേണ്ട തെളിവുകള്‍ ലഭ്യമാക്കിയതിനും ശേഷം മാത്രമാണ്
ഞങ്ങള്‍ ആദ്യ പോസ്റ്റ് പ്രസിദ്ധീകരിക്കുന്നത്. ക്രിയാത്മകമായ ചര്‍ച്ചകള്‍ ഈ വിഷയത്തില്‍ ലഭ്യമാക്കിയതിന് നമ്മുടെ ബൂലോകം വായനക്കാരോട് നന്ദി പറയുന്നു.


ഈ സാഹചര്യത്തില്‍ ഇതുവരെ നടന്ന ചര്‍ച്ചകളുടെ വെളിച്ചത്തില്‍ ഞങ്ങളെത്തിയ നിഗമനങ്ങള്‍ ഇവയാണ്.


1.സിയാബിന് ഐ.എ.എസ് ഇല്ല.

2.സിയാബ് പ്രചരിപ്പിക്കുന്നതുപോലെ 62 ശതമാനം (അല്ലെങ്കില്‍ തേഡ് സ്റ്റേജ്) ഓറല്‍ ക്യാന്‍സര്‍ ഇല്ല

3.സിയാബ് ഇതുവരെ നല്‍കിയ ചികിത്സാ വിവരങ്ങള്‍ എല്ലാം തെറ്റായിരുന്നു.

4.ഐ.എ.എസ് ഉണ്ടെന്നും, അത് പോകുമെന്നതിനാലാണ് രോഗം ഉണ്ടെന്ന് പുറത്ത് പറയാത്തത് എന്നും തെറ്റിദ്ധരിപ്പിച്ചത് വഞ്ചനയാണ്.

5.ബ്ലോഗില്‍ ഇനി ആര്‍ക്കും ഇത്തരം ചതി പറ്റാതിരിക്കാനാണ് ഈ പോസ്റ്റ് ഞങ്ങള്‍ പ്രസിദ്ധീകരിച്ചത്.

6.വ്യക്തിപരമായി ഈ പോസ്റ്റിന്റെ ഉത്തരവാദിത്വം ഈ ബ്ലോഗ് കൈകാര്യം ചെയ്യുന്നവര്‍ ഏല്‍ക്കുന്നു.



തികച്ചും വ്യക്തിപരമായ ചില വിഷയങ്ങള്‍ ബ്ലോഗ് പോലെയുള്ള പൊതുമാദ്ധ്യമങ്ങളില്‍ വരുമ്പോള്‍ , ഒരു പൊതു സമൂഹത്തെ ബാധിക്കുന്ന ഒരു വിഷയം എന്ന രീതിയിലാണ് ഞങ്ങള്‍ ഇതിനെ സമീപിച്ചത്. ഇതിന് ഞങ്ങള്‍ കോടതിയോ എന്ന് ചോദിക്കുന്നവരോട് മറ്റൊന്നും പറയാനില്ല. ഇതിലുള്‍പ്പെട്ട വ്യക്തി ആരുതന്നെയായാലും ഞങ്ങള്‍ ഇതു തന്നെ ചെയ്യുമായിരുന്നു.നിര്‍ഭാഗ്യവശാല്‍ കൈപ്പേറിയ ജീവിതാനുഭവങ്ങള്‍ കൈമുതലായുള്ള ഒരു ചെറുപ്പക്കാരനാണ് ഇത്തരത്തില്‍ ഒരു തട്ടിപ്പ് നടത്തിയതെന്നത് നിങ്ങളെ ഓരോരുത്തരേയും പോലെ ഞങ്ങളേയും വിഷമിപ്പിച്ചിരുന്നു.

പക്ഷെ ഒന്നോര്‍ക്കുക, സത്യത്തിന്റെ മുഖം ചിലപ്പോള്‍ വികൃതവും ഭയാനകവുമായിരിക്കും.

ഇപ്പോള്‍ ‍, ഏകദേശം സത്യം എല്ലാവര്‍ക്കും മനസ്സിലായിക്കാണും എന്നു ഞങ്ങൾ വിശ്വസിക്കുന്നു. സിയാബിന്റെ പക്ഷം ഏറ്റു പിടിച്ചു സംസാരിച്ചവര്‍ രേഖകള്‍ കാണിക്കാമെന്നു പറഞ്ഞ് പോയെങ്കിലും അങ്ങനെയൊന്നും ഉണ്ടായില്ല. ജോലി പോയാലുള്ള ജീവിത പ്രശ്നം ഓര്‍ത്ത്‌ ഞങ്ങള്‍ മറൈന്‍ ബിസ് എന്ന സ്ഥാപനത്തിലേക്ക് മാത്രം അന്വേഷണം വ്യാപിപ്പിച്ചിരുന്നില്ല. എന്നാല്‍ മറ്റുള്ളവര്‍ ആധികാരികമായി ചില വസ്തുതകള്‍ പറയുകയും , ചില വ്യക്തികളെ ഈ പ്രശ്നത്തിലേക്ക് എടുത്തിടുകയും ചെയ്തപ്പോള്‍ സംശയ നിവാരണത്തിനായി മറൈന്‍ ബിസ്സുമായി ബന്ധപ്പെട്ടത് പറഞ്ഞു ചെയ്യിച്ചതാണെന്നു എല്ലാ വായനക്കാരും മനസ്സിലാക്കിക്കാണുമല്ലോ.


എന്നാല്‍ ‍, ഈ അവസരം ഈ പത്രത്തിന്റെ അടച്ചു പൂട്ടലിനു കൂടി കാരണം ആക്കാം എന്ന ഉദ്ദേശത്തോടുകൂടി ഞങ്ങളോട് വിദ്വേഷമുള്ള ചില ബ്ലോഗേഴ്സ് മുന്‍കയ്യെടുത്തു ഈ പ്രശ്നം പരമാവധി മലീമസമാക്കുന്നതിനു വേണ്ടി ഇപ്പോഴും പ്രവര്‍ത്തിച്ചു കൊണ്ടിരിക്കുകയാണ്. അങ്ങനെ ബ്ലോഗിന്റെ നാലതിരുകളില്‍ മാത്രം ഒതുങ്ങി നിന്ന ഈ വിഷയം പുറം ലോകം അറിയുന്നതിനുള്ള സകല സാധ്യതകളും ഇവര്‍ തന്ത്രപൂര്‍വ്വം മെനയുന്നുണ്ട്. പുറം ലോകത്തെ അറിയിച്ചു സിയാബിന്റെ ഇനിയുള്ള വ്യക്തി ജീവിതത്തെ ബാധിക്കുന്ന തരത്തിലുള്ള പ്രവര്‍ത്തനങ്ങള്‍ സിയാബിനോടുള്ള സിമ്പതി കൊണ്ടല്ല , മറിച്ചു, ഈ പത്രം പൂട്ടിക്കുക എന്ന ലക്ഷ്യം ലാക്കാക്കി മാത്രം ആണ്. ഞങ്ങള്‍ക്കെതിരെ നിയമനടപടികള്‍ വേണമെന്ന് മുറവിളി കൂട്ടുന്നവരോട് സഹതാപം മാത്രമേയുള്ളൂ. ആര്‍ക്കെങ്കിലും അങ്ങനെ ചെയ്യണമെന്നുണ്ടെങ്കില്‍ ഞങ്ങള്‍ ഇവിടെത്തന്നെ കാണുമെന്ന് ആദ്യമേ തന്നെ സൂചിപ്പിച്ചിരുന്നത് ഓര്‍ക്കുമല്ലോ ?

ഈ വിഷയത്തിലെ വ്യക്തിപരമായ പരാമര്‍ശങ്ങള്‍ക്ക് ഞങ്ങ‍ളുടെ ഉത്തരവാദിത്വം സ്വയം ബോദ്ധ്യപ്പെട്ടും കൊണ്ട്, ഇതിലെ പൊതു ചര്‍ച്ച ഇവിടെ അവസാനിപ്പിക്കുകയും ഈ വിഷയത്തിലുള്ള കമന്റ് ഓപ്ഷന്‍ ക്ലോസ് ചെയ്യുകയും ചെയ്യുന്നു. നിങ്ങള്‍ക്ക് ഞങ്ങളോടും പണം നഷ്ടപ്പെട്ട പ്രവാസി ബ്ലോഗ്ഗറിനോടും പറയാനുള്ള കാര്യങ്ങള്‍ ഇനി nammudeboolokam@gmail.com എന്ന മെയിലില്‍ അയക്കാം. 

(തുടർന്ന് വായിക്കാൻ ഇവിടെ ക്ലിക്ക് ചെയ്യുക)

താരജാടയില്ലാത്ത പൊങ്ങന്‍

1. സര്‍ പൊങ്ങ്സ് നമസ്കാരം. ഒന്ന് ചോദിച്ചോട്ടെ, ഈ സര്‍ പദവി എങ്ങനെ കിട്ടി.

നമസ്കാരം. വിശ്വാസവും അവിശ്വാസവും തമ്മില്‍ വെറും ‘അ’യുടെ അകലം മാത്രമേയുള്ളുവെന്ന് അറിയാമല്ലോ? എനിക്ക് ‘സര്‍‘ പദവി എങ്ങനെ ലഭിച്ചുവെന്ന് ആത്മാര്‍ത്ഥമായി ഞാന്‍ പറഞ്ഞാല്‍ നിങ്ങളൊരുപക്ഷേ നിങ്ങളുടെ വിശ്വാസത്തില്‍ ‘അ’കാരം ചേര്‍ത്തേ അത് കേള്‍ക്കാന്‍ തയ്യാറാവുകയുള്ളു. എങ്കിലും പറയാം. 1975-ന്റെ ആദ്യമാസങ്ങളിലോ മറ്റോ ആണ് ഇംഗ്ലണ്ടിലെ രാഞ്ജിയായിരുന്ന ‘എലിസബത്ത് രണ്ടാമത്തേവള്‍’ ഒരു വെളിപാടുണ്ടായി. മധ്യതിരുവിതാംകൂറിലുള്ള പുത്തൂര്‍ കുടുംബാംഗമായ ശ്രീ.ശിവരാമന്‍ നായരുടെ കടിഞ്ഞൂല്‍ പുത്രന് ‘സര്‍’ പദവി നല്‍കി ആദരിക്കണം എന്നതായിരുന്നു ആ വെളിപാട്. അതിന്‍പ്രകാരം രാഞ്ജി പ്രത്യേകദൂതന്‍ മുഖേന ഒരു ‘സര്‍‘ പദവി ശിവരാമന്‍ നായരുടെ അടുത്തെത്തിച്ചെങ്കിലും തദവസരത്തില്‍ അദ്ദേഹം വിവാഹിതനാവാതിരുന്നതുകൊണ്ടും, പുറമ്പോക്കില്‍ കൃഷി ഇറക്കി ഒരു കടിഞ്ഞൂല്‍ പുത്രനെ വിളയിച്ചെടുക്കുകയും ചെയ്യാതിരുന്നതുകൊണ്ട് ആ ‘സര്‍’ പദവി ദൂതന് ചിലവാക്കാനായില്ല. അങ്ങനെ തിരിച്ചുകൊണ്ടുപോയ ‘സര്‍’ പദവിയാണ് പിന്നീട് 1975 മാര്‍ച്ച് 9-ആം തീയതി ‘ചാര്‍ളി ചാപ്ലിന്‍’ എന്നോ മറ്റോ പേരായാ ഒരു ‘സിനിമാ നടന്’ നല്‍കിയത്.

എന്നാല്‍ അതിശയമെന്ന് പറയട്ടെ, ശിവരാമന്‍ നായരുടെ കടിഞ്ഞൂല്‍ പുത്രനായി ജനിച്ച ഈയുള്ളവന്റെ സ്വപ്നത്തില്‍ ഏതാനും മാസങ്ങള്‍ക്ക് മുന്‍പ് ‘സര്‍ സി.പി.രാമസ്വാമി അയ്യരും സര്‍ ചാര്‍ളി ചാപ്ലിനും’ പ്രത്യക്ഷപ്പെടുകയൂണ്ടായി. ഇരുവര്‍ക്കും ഒരേ ആവശ്യം അവരുടെ ‘സര്‍’ പദവി ഞാന്‍ സ്വീകരിക്കണമെന്ന്. ചത്തവര്‍ക്കെന്തിനാണ് ‘സര്‍‘ പദവി എന്നും അവര്‍ ആരാഞ്ഞു. അവരുടെ നിര്‍ബന്ധത്തിന് ഞാന്‍ വഴങ്ങേണ്ടി വന്നെങ്കിലും സി.പി യുടെ സര്‍ പദവി ഞാന്‍ സ്വീകരിച്ചില്ല. അഭിനവ കെ.സി.എസ് മണി ഇനിയും വെട്ടുകത്തി എടുത്താലോ എന്ന ചിന്ത മാത്രമാണ് ആ തിരസ്കരിക്കലിനു പിന്നില്‍ . അങ്ങനെ ചാപ്ലിന്‍ സമ്മാനിച്ച ‘സര്‍’ പദവിയാണ് പോങ്ങ്സിന്റെ മുന്നില്‍ വന്നതെന്ന് ചുരുക്കം.

2. ബ്ലോഗില്‍ വരാനുണ്ടായ സാഹചര്യം ഒന്ന് പറയാമോ?

പ്രത്യേകിച്ച് എതെങ്കിലും വിധത്തിലുള്ള സാഹചര്യത്തിന്റെ സമ്മര്‍ദ്ധം കൊണ്ട് ബ്ലോഗില്‍ എത്തിയവനല്ല ഞാന്‍. എന്നാല്‍ ബ്ലോഗിനെപ്പറ്റി ആദ്യമെന്നോട് പറയുന്നത് ‘വെബ്‌ലോകം’ എന്ന പോര്‍ട്ടലിലെ വെബ് ജേര്‍ണലിസ്റ്റായി ജോലിചെയ്യുന്ന ശ്രീ.പ്രതാപചന്ദ്രന്‍ എന്ന പ്രതാപേട്ടനാണ്. മലയാലത്തിലെഴുതാനുള്ള ഗുട്ടന്‍സ് പറഞ്ഞുതന്നതും അദ്ദേഹമാണെന്ന് നന്ദിയോടെ ഞാനിപ്പോള്‍ ഓര്‍ക്കുന്നു. (വേണമെങ്കില്‍ ബ്ലോഗ് വായനക്കാരുടെ കടുത്ത ദൌര്‍ഭാഗ്യം ഒന്നുകൊണ്ടുമാത്രമാവും പ്രതാപേട്ടന് ഇങ്ങനൊരു തോന്നലുണ്ടായതെന്നും അനുമാനിക്കാം.)

3. ഹെവി വെയിറ്റ് ബ്ലോഗര്‍ എന്ന പട്ടം ആര്‍ക്കും കൊടുക്കില്ലെന്ന വാശിയിലാണ് ഒന്നേകാല്‍ കിന്റല്‍ ഭാരം നിലനിര്‍ത്തുന്നതെന്ന അപവാദത്തോട് എങ്ങനെ പ്രതികരിക്കുന്നു. ?

സത്യത്തില്‍ ഏത് മനുഷ്യനാണ് മറ്റൊരുവനോട് വാശിയില്ലാത്തത്? പ്രകടിപ്പിച്ചാലും ഇല്ലെങ്കിലും ഏവരുടെയും ഉള്ളില്‍ അതുണ്ട്. എന്റെ ഉള്ളിലും അത്തരമൊരു വാശി തീര്‍ച്ചയായുമുണ്ട്. എന്നാല്‍ അത് താങ്കള്‍ സൂചിപ്പിച്ചപോലെ തന്നെ ശരീരഭാരത്തിന്റെ കാര്യത്തില്‍ മാത്രമേയുള്ളു. പ്രതിഭ, ജനപ്രീതി തുടങ്ങിയവയിലൊക്കെ മറ്റാരെയും കീഴ്പ്പെടുത്താനാവില്ലെന്ന തിരിച്ചറിവാണ് ഇത്തരമൊരു വാശിക്കു പിന്നില്‍. അതുകൊണ്ട് ‘ശരീരഭാരത്തിന്റെ കാര്യത്തില്‍ ‘ ബൂലോഗത്തെ വിശാലമനസ്കനായ നാം ‘തൈസിലടിച്ച്’ വെല്ലുവിളിക്കുന്നു. ആരുണ്ടെന്നെ മലര്‍ത്തിയടിക്കാന്‍? :)

4. ഇഷ്ടപ്പെട്ട ഭക്ഷണം എന്താണ്.. താങ്കള്‍ക്ക് പാചകം അറിയാമോ?

ഇഷ്ടപ്പെട്ട ഭക്ഷണം എന്നുകേട്ടപ്പോള്‍ തന്നെ മനസ്സില്‍ നിരവധി വിഭവങ്ങള്‍ നിരന്നു. ഇന്നതെന്ന് പറയാനാവുന്നില്ല. എന്റെ വാചകത്തോളം നന്നല്ല പാചകമെങ്കിലും അത്യാവശ്യഘട്ടങ്ങളില്‍ നളനുമാകാറുണ്ട്.

5. എന്തിനെക്കുറിച്ചും എഴുതും എന്നതാണ് താങ്കളുടെ പ്രത്യേകത.. പക്ഷെ എന്തെഴുതാനാണ് കൂടുതല്‍ താല്പര്യം.. ?

‘എന്തുമെഴുതും പോങ്ങു’ എന്നൊരു ഇമേജ് ഉണ്ടാക്കാനൊന്നും ഞാന്‍ ശ്രമിച്ചിട്ടില്ല. മനസ്സില്‍ തോന്നുന്നത് യാതൊരു മുന്നൊരുക്കങ്ങളുമില്ലാതെ തോന്നുന്നപോലെ എഴുതി വിടുന്നു. ചിലത് അബദ്ധവശാല്‍ നന്നാവും. ചിലത് ബോറാവും. നന്നായാലും ബോറായാലും എഴുതുക എന്നത് ആനന്ദം നല്‍കുന്നു. ഭോഗം പോലെയും സ്വയംഭോഗം പോലെയും ആസ്വദിച്ചുചെയ്യുന്ന ഒരു ക്രിയയാണ് എഴുത്തും.

6. ബ്ലോഗ്‌ കൂട്ടായ്മ/മീറ്റുകള്‍ എന്നിവയെപ്പറ്റി എന്തുപറയുന്നു. ?

അസന്മാര്‍ഗിക / സാമൂഹ്യ വിരുദ്ധ / ഭീകരവാദ പ്രവര്‍ത്തനങ്ങള്‍ക്കുവേണ്ടിയല്ലാത്ത ഏത് കൂട്ടുകെട്ടുകളും കൂടിച്ചേരലുകളും നല്ലതുതന്നെയല്ലേ? പരസ്പരം പരിചയപ്പെടാനും ചങ്ങാത്തവും സ്നേഹവുമൊക്കെ വളര്‍ത്താനുമെല്ലാം ഒത്തുചേരലുകള്‍ സഹായിക്കുമെന്നാണ് എന്റെ വിശ്വാസം.

7. താങ്കളുടെ ഭാര്യ താങ്കളുടെ ബ്ലോഗ്‌ വായിക്കാറുണ്ടോ.. എന്താണ് ഭാര്യയുടെ പ്രതികരണം ?

ഇല്ലെന്നാണ് എന്റെ ബലമായ വിശ്വാസം. കാരണം ആദരവ് കലര്‍ന്ന ഒരു സ്നേഹം ഇപ്പോഴും എനിക്കവളില്‍ നിന്നും ലഭിക്കുന്നുണ്ട്.

8 .പേരില്‍ തന്നെ ലഹരിയുള്ള താങ്കള്‍ എഴുത്തിനെ ലഹരിയായി കാണാറുണ്ടോ?

തീര്‍ച്ചയായും. എഴുത്ത് ലഹരി തന്നെയാണ്. നല്ല ‘ലഹരി’യിലും എഴുതാറുണ്ട്.

9 .ബ്ലോഗ്‌ വിവാദങ്ങളോട് എങ്ങനെ പ്രതികരിക്കുന്നു.. ?

വാദമുള്ളിടത്ത് സ്വാഭാവികമായും വിവാദങ്ങളുമുണ്ടാവും. ഇഷ്ടമില്ലാത്ത അച്ഛി തൊട്ടതെല്ലാം കുറ്റം’ എന്ന രീതിയില്‍ വ്യക്തി വിരോധം തീര്‍ക്കാനായി സൃഷ്ടിക്കുന്ന വിവാദങ്ങള്‍ നല്ലതെന്ന് പറയാനാവില്ല. പ്രശസ്തിയിലേയ്ക്കുള്ള കുറുക്കുവഴിയായും വിവാദങ്ങളെ കാണരുത്.

10. ഇഷ്ടപ്പെട്ട എഴുത്തുകാരന്‍ ആര് (ബ്ലോഗ്‌ തന്നെ ആവണം എന്നില്ല. അച്ചടി മാധ്യമത്തിലും ആവാം) ?

ഇന്നലെവരെ എഴുതിയിരുന്നവരെയും ഇന്ന് എഴുതുന്നവരെയും നാളെ എഴുതാനിരിക്കുന്നവരെയും എനിക്കിഷ്ടമാണ്. അല്ലാതെ പോള്‍ വെര്‍ലൈയ്ന്‍, ജൊനാഥന്‍ ഫ്രാന്‍സെന്‍, ഫെര്‍ണാണ്ടോ പെസോവ, ഇവാന്‍ സെര്‍ജിയേവിച്ച് എന്നൊക്കെ പറയാന്‍ ഞാന്‍ സിനിമാ നടനോ അല്ലെങ്കില്‍ നടിയോ അതുമല്ലെങ്കില്‍ ബുദ്ധിജീവിയോ ഒന്നുമല്ലല്ലോ.( മേപ്പടി ഞാന്‍ കുറിച്ച പേരുകള്‍ എഴുത്തുകാരുടെ തന്നെ?!!)

11. ഒന്ന് രണ്ടു പോസ്റ്റുകള്‍ ഡിലീറ്റ്‌ ചെയ്തല്ലോ. പോസ്റ്റുകള്‍ എഴുതി കഴിഞ്ഞാല്‍ വായനക്കാരുടെ ആണെന്ന് അറിയാമല്ലോ. പോസ്റ്റുകള്‍ ഡിലീറ്റ്‌ ചെയ്യേണ്ടതിന്റെ ആവശ്യമെന്താണ്.

രണ്ടിലേറെ പോസ്റ്റുകള്‍ ഡിലീറ്റ് ചെയ്യേണ്ടി വന്നിട്ടുണ്ട്. എഴുത്തുകാരനും പ്രസാധകനും ഒരേ ആള്‍തന്നെ ആവുന്നു എന്നതാണല്ലോ നമ്മുടെ മാധ്യമത്തിന്റെ ഏറ്റവും വലിയ പ്രത്യേകത. എന്നാല്‍ ഞാന്‍ എന്ന എഴുത്തുകാരനെ ചിലപ്പോള്‍ എന്നിലെ പ്രസാധകന്‍ വഞ്ചിക്കാറുണ്ട്. കൊള്ളാം എന്ന് തോന്നി പോസ്റ്റ് ചെയ്തതിനുശേഷമാവും ‘പ്രസാധകന്റെ’ തലയില്‍ നിലാവെളിച്ചം വീഴുക. അപ്പോള്‍ ഡിലീറ്റ് ചെയ്യാന്‍ തോന്നും. നിലവാരം നോക്കി ഡിലീറ്റ് ചെയ്യാന്‍ നിന്നാല്‍ എന്റെ ബ്ലോഗ് തന്നെയാവും ഡിലീറ്റ് ചെയ്യേണ്ടിവരിക എന്ന ബോധവും എനിക്കുണ്ട്. എങ്കിലും ഞാനതിന് മുതിര്‍ന്നിട്ടില്ല. എന്നിലെ വായനക്കാരനെ തൃപ്തിപ്പെടുത്താന്‍ ഞാനെന്ന ബ്ലോഗെഴുത്തുകാരന് കഴിഞ്ഞിട്ടില്ല എന്നതും എന്നെ വിഷമിപ്പിക്കുന്നുണ്ട്.

12. അനീതിയ്ക്തെതിരെയും തിന്മകള്‍ക്കെതിരെയും ബ്ലോഗിലൂടെ പ്രതികരിക്കുന്ന പോങ്ങുമൂടനെ എല്ലാവര്‍ക്കും പരിചയമുണ്ട്. ജീവിതത്തിലും അങ്ങനെ തന്നെയാണോ?

അനീതികള്‍ക്കും തിന്മകള്‍ക്കുമെതിരെ പോരാടുന്ന ഒരു കഥാപാത്രത്തെ അവതരിപ്പിയ്ക്കുന്ന നടന്‍ വ്യക്തി ജീവിതത്തില്‍ അങ്ങനെയാവുമോ? ‘പോങ്ങുമ്മൂട‘ന്റെ നന്മ ഒരിക്കലും ഹരിയ്ക്ക് അവകാശപ്പെടാനില്ല. എങ്കിലും ഇന്ത്യന്‍ പ്രസിഡന്റിനെയും എന്റെ മുന്നില്‍ കൈനീട്ടി ഭിക്ഷയാചിച്ചുവരുന്ന ഒരു യാചകനെയും ഒരുപോലെ ബഹുമാനിക്കുവാനും സ്നേഹിക്കാനും എനിക്കാവുന്നുണ്ടെന്നത് എന്നെ സന്തോഷിപ്പിക്കുന്നു. സത്യമായും. കനത്ത ആസനം താങ്ങുന്നവനാവില്ല ഞാന്‍.

13. താങ്കളുമായി നേരിട്ട് സംവദിച്ച എല്ലാവരുടെയും അഭിപ്രായത്തില്‍ താരജാടയില്ലാത്ത താങ്കളുടെ സൌഹൃദപരമായ പെരുമാറ്റത്തെ പറ്റി പറയാറുണ്ട്‌. എന്നാല്‍ ചിലരൊക്കെ ആള്‍ പൊങ്ങന്‍ (പൊങ്ങച്ചക്കാരന്‍) ആണെന്നും പറയാറുണ്ട്‌. താങ്കള്‍ എന്ത് പറയുന്നു ?

ഞാന്‍ തന്നെ എന്നെ വിലയിരുത്തുന്നതില്‍ കാര്യമില്ല. എങ്കിലും ഈ നിമിഷം വരെ ഏവരോടും കഴിവതും മാന്യമായി പെരുമാറാന്‍ ശ്രമിക്കുകയും ആഗ്രഹിക്കുകയും ചെയ്യുന്ന ഒരാളാണ് ഞാനെന്ന് തോന്നുന്നു. എന്നാല്‍ അതൊരു കപടവിനയമായി കാണുന്നവരും കണ്ടേക്കാം. എന്നെ അടുത്തറിയുന്നവര്‍ പറയുന്ന കാര്യം ‘നീ ഈ അപകര്‍ഷതാബോധം കളയൂ’ എന്നാണ്. അപകര്‍ഷതയും അഹങ്കാരവും എങ്ങനെ ഒരാളില്‍ ഒരുമിച്ച് വാഴും. ഞാന്‍ അഹങ്കാരിയല്ല. ആവുകയുമില്ല്ല. കാരണം ഒരിടത്തും മുന്‍പനാവാന്‍ അല്ലെങ്കില്‍ വിജയിയാവാന്‍ ഞാന്‍ ആഗ്രഹിക്കാറില്ല.

ഞാന്‍ പൊങ്ങച്ചക്കാരനാണെന്ന് എന്നെ അടുത്തരിയുന്നവരില്‍ ആരും പറയുമെന്ന് തോന്നുന്നില്ല. ഇനി അങ്ങനെ പറഞ്ഞാലും സങ്കടമില്ല. നമ്മള്‍ മുയലിനെ വെട്ടിക്കൊന്ന് തിന്നുന്നത് മുയല്‍ നമ്മുടെ തള്ളയ്ക്ക് വിളിച്ചിട്ടോ അതിനോടുള്ള പൂര്‍വ്വവൈരാഗ്യം കൊണ്ടോ ഒന്നുമല്ലല്ലോ. മുയലിറച്ചിയോടുള്ള കൊതിയും അതിന്റെ സ്വാദും മാത്രം. എന്നെ ചീത്ത പറയുന്നവര്‍ ആരെങ്കിലുമുണ്ടെങ്കില്‍ അതവര്‍ ചെയ്യുന്നത് എന്നോടുള്ള വിരോധം കൊണ്ടല്ലെന്ന് ചുരുക്കം.

14. ബ്ലോഗില്‍ വന്നതുകൊണ്ട് എന്ത് നേട്ടം ഉണ്ടായി എന്ന് പറയാമോ?

ഏതാനും ആഴ്ചകള്‍ക്കുമുന്‍പ് എന്റെ മൊട്ടേട്ടന്‍ ( നട്ടപ്പിരാന്തന്‍ ) എന്നോട് പറയുകയുണ്ടായി. മേലില്‍ ഞാന്‍ രാഷ്ട്രീയ പോസ്റ്റുകള്‍ പ്രത്യേകിച്ച് ഇടതുപക്ഷ രാഷ്ട്രീയത്തെ പരാമര്‍ശിച്ചുള്ള പോസ്റ്റുകള്‍ ഇനി കുറിക്കാന്‍ പാടില്ലെന്ന്. ഞാന്‍ തിരുവനന്തപുരത്ത് കുടുംബസമേതം താമസിക്കുകയാല്‍ എങ്കിക്കെന്തെങ്കിലും ദോഷകരമായി എനിക്ക് സംഭവിച്ചാലോ എന്ന ഉല്‍ക്കണ്ഠയും അദ്ദേഹം പ്രകടിപ്പിച്ചു. ഈ സ്നേഹം എനിക്ക് ലഭ്യമായത് ഞാനും ഒരു ബൂലോഗവാസിയാണെന്നതുകൊണ്ടല്ലെ? അതുപോലെ നൂറുകണക്കിന് സ്നേഹിതര്‍. എല്ലാം ബ്ലോഗ് നല്‍കിയ ഭാഗ്യം. എല്ലാവര്‍ക്കും നന്ദി.

15. പുതുതായി ബ്ലോഗില്‍ വന്നവര്‍ക്കും വരാന്‍ താല്പര്യം ഉള്ളവര്‍ക്കും എന്ത് ഉപദേശമാണ് നല്‍കാനുള്ളത്?

ഉപദേശം നല്‍കാന്‍മാത്രമുള്ള യോഗ്യത എനിക്കുണ്ടായെന്ന് വിശ്വസിക്കുന്നില്ല. മാത്രവുമല്ല ഉപദേശമെന്നത് ഒരു പരിധിവരെ ഉപദ്രവമായാണ് ഞാന്‍ കാണുന്നത്. ഉപദേശം കൊണ്ട് ആരെങ്കിലും നന്നാവുമായിരുന്നെങ്കില്‍ ഞാന്‍ എന്നേ നന്നായേനേ?!

പിന്നെ, ഒരുവിധം നന്നായി എഴുതാനാവുമെന്ന് സ്വയം വിശ്വസിക്കുന്നവരെങ്കിലും എഴുത്തിനെ ഗൌരവമായി കണ്ടെങ്കിലെന്ന് ആഗ്രഹിക്കുന്നു. എഴുത്തുകാരന് ഏറ്റവും സ്വാതന്ത്ര്യം നല്‍കുന്ന മാധ്യമമാണ് ബ്ലോഗ്. അത് പരമാവധി ചൂഷണം ചെയ്യുക. ബൂലോഗത്ത് പൊട്ടിച്ചിരിയുടെ ഇടിമുഴക്കം മാത്രമല്ല കേള്‍പ്പിക്കേണ്ടത്.

ഇനിയും ഉപദേശം വേണമെന്നോ? എങ്കില്‍ പിടിച്ചോ. ആരും ആരുടെയും ഉപദേശം കേള്‍ക്കേണ്ടതില്ലെന്നാണ് എന്റെ ഉപദേശം. നന്ദി.





നമ്മുടെ ബൂലോകം : സര്‍ , പൊങ്ങ്സ്.... ഇത്രയും നേരം ഞങ്ങളിലൂടെ ബൂലോകത്ത് സംസാരിച്ചതിന് നന്ദി. ഇതാ ഞങ്ങളുടെ ഒരു ചെറിയ ഉപഹാരം. സ്വീകരിച്ചാലും.




ചിതങ്ങള്‍ക്ക് കടപ്പാട്‌ : സുനില്‍ പണിക്കര്‍
സജീവ്‌ ബാലകൃഷ്ണന്‍
ഹരീഷ് തൊടുപുഴ

സുകന്യയുടെ കവിത

സുകന്യയുടെ 'കവിത'

ഗോപാലേട്ടന്‍റെ മകളും, ചെത്തുകാരന്‍ ദാമോദരന്‍റെ കൂടെ ഓടി പോയതുമായ, ആ ഇരുപതുകാരിയുടെ പേര്‌ കവിത എന്ന് ആയിരുന്നു.കിട്ടാത്ത മുന്തിരിക്ക് പുളി ഉള്ളതിനാലാവാം, ആ കവിതയെ എനിക്ക് ഇഷ്ടമല്ല.എന്നാല്‍ ചങ്ങമ്പുഴയുടെ, മധുസൂദനന്‍ നായരുടെ ഭാവനകളില്‍ വിടര്‍ന്ന, മലയാള ഭാഷയെ മനോഹരമാക്കുന്ന ചില 'കവിതകള്‍' എനിക്ക് ഇഷ്ടമാണ്.

വായിച്ച് മനസിലാക്കാനുള്ള വിവരം കുറവാണെങ്കിലും, ചില ബ്ലോഗുകളിലെ കവിതകള്‍ തേടി പിടിച്ച് വായിക്കാറുണ്ട്.അത്തരത്തില്‍ ഒരു ബ്ലോഗാണ്‌ സുകന്യയുടെ ബ്ലോഗ്..

കവിത

തന്നെ കുറിച്ച് സുകന്യ പറയുന്നത് കുറെ ഇഷ്ടങ്ങളാണ്.അവയും കവിത പോലെ മനോഹരം.അത് ഇങ്ങനെയാണ്..

"അവള്‍ക്കേറ്റം ഇഷ്ടം കണ്ണനെയാണ്. കൈ നിറയെ വെണ്ണ കൊടുത്തിട്ടും പരിഭവിച്ചു നില്‍ക്കുന്ന കണ്ണനെ. അച്ഛനെയാണിഷ്ടമെന്നു പറയേണ്ടതില്ലല്ലോ. വേദനയാണെന്നും പറയാം. അമ്മ, ഇത്ര ധീരയായ സ്ത്രീ വേറെ ഉണ്ടോ? അമ്മയും തീരാവേദന തന്നെ എങ്കിലും അവള്‍ക്കിന്നൊരു അമ്മ ഉണ്ട്, ആശ്വസിക്കുന്നു അവളതില്‍. ദേവാസുരന്‍, തീര്‍ച്ചയായും അവളിഷ്ടപ്പെട്ടതല്ലേ, അന്യായവും ന്യായമായി നേടിക്കൊടുക്കും. സഹോദരികള്‍, ഭാഗ്യം അവളെപോലെയല്ല. സുഹൃത്തുക്കള്‍ അവള്‍ ഏറ്റവും അടുത്തിരിക്കുന്നതവരോടാണ്. അവളുടെ കുട്ടികള്‍, ഇങ്ങോട്ട് ഇഷ്ടം ഉണ്ടോ എന്ന് നോക്കാതെ അവള്‍ ഇഷ്ടപ്പെടുന്നവര്‍. ഹിമവാനെ ഇഷ്ടമാണ്, പോകാന്‍ കഴിയുമോ എന്നറിയില്ലയെങ്കിലും അവളുടെ സ്വപ്നമാണാ ഭൂമി. പുഴ മറ്റൊരിഷ്ടമാണ്, ആ സൗഹൃദവും നഷ്ടപ്പെട്ടുക്കൊണ്ടിക്കുകയല്ലേ. മഴ, ആര്‍ക്കാണ് ഇഷ്ടമല്ലാത്തത് ? കടല്‍, ആര്‍ത്തു വരുന്ന തിരമാല പോലെ ഒരിഷ്ടം. ആകാശവും നക്ഷത്രങ്ങളും അനന്തമായ ഇഷ്ടങ്ങള്‍."

തന്‍റെ ബ്ലോഗില്‍ വരുന്ന വായനക്കാരെ, അഹങ്കാരം ലേശമില്ലാതെയാണ്‌ സുകന്യ സ്വാഗതം ചെയ്യുന്നത്.അതിനു ആ ബ്ലോഗറുടെ ഈ വരികള്‍ സാക്ഷി..

"ഒക്കെ സംഭവിക്കുന്നതാണ്.
ഒന്നും എന്റെ കഴിവല്ല.
ഒരുപാട്‌ ആനന്ദിക്കുന്നു, പക്ഷെ...
സ്നേഹത്തോടെ, സുകന്യ."

നല്ല കവിതകള്‍ ഇഷ്ടപ്പെടുന്ന ഏവര്‍ക്കും ഈ ബ്ലോഗും ഇഷ്ടമാകുമെന്ന് കരുതുന്നു.2009 സെപ്റ്റംബര്‍ 7 നു പോസ്റ്റ് ചെയ്ത പൂത്തുമ്പി എന്ന കവിതയിലെ ഈ വരികള്‍ ശ്രദ്ധിക്കൂ..

"കല്ലെടുത്താടാന്‍ കൊതിക്കുന്ന തുമ്പിയെ
മധുചഷകംനിരത്തി ഞാന്‍ കാത്തിരിന്നു
വരുമെന്ന് മോഹിച്ചിരുന്നു, ഒരിക്കലുമാ തുമ്പി
വരില്ലെന്നറിഞ്ഞിട്ടും വെറുതെ"

കല്ലെടുക്കുന്ന തുമ്പിയെ പോലെ, കണ്ണില്‍ കാണുന്ന പോസ്റ്റെല്ലാം വായിക്കുന്ന, എന്നെ പോലെയുള്ള വായനക്കാര്‍, മധുരമായ കവിതകള്‍ നിറഞ്ഞ തന്‍റെ ബ്ലോഗ് നോക്കുന്നില്ലല്ലോ എന്ന വിഷമം ഈ വരികളിലില്ലന്ന വിശ്വാസത്തില്‍ പറയട്ടെ,
ഈ ബ്ലോഗ് കവിത പോലെ മനോഹരമാണ്.

അരുണ്‍ കായംകുളം

ഇഷ്ടദാസന്മാര്‍

നോമ്പിനെക്കുറിച്ചെഴുതുക ... അതും നോമ്പ് കാരനായിരിക്കെ .. ഇങ്ങിനെ ഒരു അവസരം തന്ന "നമ്മുടെബൂലോകത്തിനു" നന്ദി പറഞ്ഞു കൊണ്ട് അല്പം നോമ്പ് വിശേഷങ്ങള്‍ എഴുതട്ടെ ...

വ്രതാനുഷ്ടാനം ആരോഗ്യത്തിനു നല്ലതാണ് എന്ന രീതിയില്‍ പലരും വിലയിരുത്താറുണ്ടെങ്കിലും ഇസ്ലാമിലെ വ്രതാനുഷ്ടാനം ആരോഗ്യപരം എന്നതിനേക്കാള്‍ വ്യക്തിത്വ സംസ്കരണത്തിനാണ് പ്രാധ്യാന്യം കൊടുക്കുന്നത് ..അഥവാ റംസാനിലെ വ്രതാനുഷ്ടാനത്തിലൂടെ ഒരാള്‍ നേടേണ്ടത് ക്ഷമയും , കാരുണ്യവും , ദാന ശീലവും , ആത്മ നിയന്ത്രണവും, സഹാനുഭൂതിയും, നന്ദി കാണിക്കലും , പശ്ചാത്താപവും അതിലൂടെ ലക്‌ഷ്യം വയ്ക്കുന്ന ദൈവ പ്രീതിയും ആണ് . റംസാന്‍ കഴിഞ്ഞാലും ജീവിതത്തില്‍ നിര്‍ബന്ധമായും നിലനില്‍ക്കേണ്ട ഇത്തരം ഗുണപരമായ കാര്യങ്ങള്‍ക്കുള്ള ഒരു പരിശീലന കാലം കൂടിയാണ് റംസാന്‍

നോമ്പ് നിര്‍ബന്ധമാക്കി ഖുറാന്‍ പറയുന്നത് കേള്‍ക്കൂ

"സത്യവിശ്വാസികളേ, നിങ്ങളുടെ മുമ്പുള്ളവരോട്‌ കല്‍പിച്ചിരുന്നത്‌ പോലെത്തന്നെ നിങ്ങള്‍ക്കും നോമ്പ്‌ നിര്‍ബന്ധമായി കല്‍പിക്കപ്പെട്ടിരിക്കുന്നു. നിങ്ങള്‍ ദോഷബാധയെ സൂക്ഷിക്കുവാന്‍ വേണ്ടിയത്രെ അത്‌. "(വി ഖു 2:183)

സമാനമായ ആശയം പ്രവാചക വചനങ്ങളിലും കാണാം ,

"ആരെങ്കിലും അനാവശ്യമായ വാക്കും പ്രവൃത്തിയും ഉപേക്ഷിക്കുന്നില്ലങ്കില്‍ അവര്‍ അന്ന പാനീയങ്ങള്‍ ഉപേക്ഷിക്കണമെന്ന് അല്ലാഹുവിന് യാതൊരു നിര്‍ബന്ധവുമില്ല ":( മുഹമ്മദ് നബി - സഹീഹുല്‍. ബുഖാരി 1770-)

ഇസ്ലാമിനെ മറ്റു ആരാധനകളുടെ കാര്യത്തിലും ഈയൊരു വ്യക്തി സംസ്കരണവും സാമൂഹിക നന്മയും കാണാം .തങ്ങളുടെ സമ്പത്തിനെ ശുദ്ധീകരിക്കാനുള്ള ഒരു മാര്‍ഗ്ഗം ആണ് സകാത്ത് (നിര്‍ബന്ധ ദാനം ) കൊടുക്കല്‍ എന്നും , നമസ്കാരം നിശ്ചയമായും തിന്മയെ തൊട്ടു തടയുന്നു എന്നും , പരോപകാര വസ്തുക്കള്‍ തടയുന്ന നമസ്കാരക്കാര്ക്ക് നാശം എന്നും വി .ഖുറാന്‍ അര്‍ത്ഥ ശങ്കക്ക് ഇടയില്ലാതെ തറപ്പിച്ചു പറയുന്നു .

പ്രഭാതം മുതല്‍ പ്രദോഷം വരെ അന്ന പാനീയങ്ങള്‍ ഉപേക്ഷിക്കുന്നതോടൊപ്പം അനാവശ്യമായ വാക്കും പ്രവൃത്തിയും ഉപേക്ഷിക്കുകയും ജീവിതത്തില്‍ വന്നു പോയ വീഴ്ചകളില്‍ മനം നൊന്തു പശ്ചാത്തപിക്കുകയും , ഇനി അത്തരം തെറ്റിലേക്ക് ഒരു മടക്കം ഇല്ലെന്നു പ്രതിജ്ഞ എടുക്കയും , വിശപ്പനുഭവിക്കുന്ന സഹ ജീവികളോടെ ഐക്യ ദാര്ഡ്യം പ്രഖ്യാപിക്കുകയും ദാന ധര്‍മ്മങ്ങളില്‍ കൂടുതല്‍ വ്യാപൃതരാകുകയും ചെയ്യുക എന്നതാണ് ചുരുക്കത്തില്‍ റംസാന്‍ കാലം . (റംസാന്‍ മാസത്തില്‍ പ്രവാചകന്‍ അങ്ങേയറ്റം ഉദാരശീലന്‍ ആകാറുണ്ടായിരുന്നു എന്ന് ഹദീസുകളില്‍ കാണാം )

വി. ഖുറാന്‍ അവതരിച്ച മാസം കൂടി ആണ് റംസാന്‍ , അതിനാല്‍ തന്നെ ഈ മാസത്തില്‍ കൂടുതല്‍ പുണ്യങ്ങള്‍ ചെയ്തു , ആത്മ നിയന്ത്രണത്തോട് കൂടി ,നോമ്പ് അനുഷ്ടിച്ചു അതിനു നന്ദി പറയുക കൂടിയാണ് വിശ്വാസികള്‍ .

ഇസ്ലാമിലെ ആരാധനകളുടെ മാനുഷിക മുഖം മനസ്സിലാക്കാന്‍ ഇതിനോട് ബന്ധപ്പെട്ട ഒരു സംഭവം ചുരുക്കി പറയട്ടെ , (സഹീഹുല്‍. ബുഖാരി 1800) .

പ്രവാചകന്റെ അടുത്ത് ഒരിക്കല്‍ ഒരാള്‍ വന്നു പറഞ്ഞു നോമ്പ് മുറിയുന്ന ഒരു പ്രവര്‍ത്തനം താന്‍ ചെയ്തു എന്ന് അറിയിച്ചു .. (അങ്ങിനെ ആരെങ്കിലും നോമ്പ് ഉപേക്ഷിച്ചാല്‍ പ്രായശ്ചിത്തം ചെയ്യണം എന്നുണ്ട് .)
പ്രവാചകന്‍ അയാളോട് ചോദിച്ചു
"നിങ്ങള്ക്ക് ഒരു അടിമയെ മോചിപ്പിക്കാന്‍ കഴിയുമോ ?" ,
അതിനു കഴിവില്ലെന്ന് അയാള്‍ മറുപടി പറഞ്ഞു ..
"എങ്കില്‍ രണ്ടു മാസം നോമ്പ് നോല്‍ക്കാന്‍ ..?
" അതിനും കഴിയില്ല"
അറുപതു ദാരിദ്രന്മാര്ക്ക് അന്നദാനം ചെയ്യാന്‍ ?"
ഇല്ലന്നു അപ്പോഴും അയാള്‍ മറുപടി പറഞ്ഞു
കുറച്ചു സമയം കഴിഞ്ഞു ആരോ കൊണ്ട് വന്ന ഒരു കുട്ട ഈത്തപ്പഴം എടുത്തു പ്രവാചകന്‍ അയാള്‍ക്ക്‌ കൊടുത്തു ,എന്നിട്ട് പറഞ്ഞു
"ഇത് എടുത്തു കൊണ്ട് പോയി ദാനം ചെയ്യൂ "
അത് വാങ്ങി അയാള്‍ പ്രവാചകനോട് പറഞ്ഞു " എന്നെക്കാള്‍ ദരിദ്രനായ ഒരാള്‍ക്കല്ലേ ഞാന്‍ ഇത് ദാനം ചെയ്യേണ്ടത് ? ദൈവമാണെ , മദീനയില്‍ എന്റെ കുടുംബത്തേക്കാള്‍ ദരിദ്രനായ ഒരു കുടുംബം വേറെയില്ല "

പ്രവാചകന്‍ ചിരിച്ചു , എന്നിട്ട് പറഞ്ഞു " ശരി, ഇത് നിന്റെ വീട്ടുകാര്‍ക്ക് തന്നെ കൊണ്ട് പോയി കൊടുക്കൂ"

.നോമ്പ് ഉപേക്ഷിച്ചാലുള്ള പ്രായശ്ചിത്തം നോക്കൂ . അടിമ മോചനവും , അറുപതു ദരിദ്രര്‍ക്ക് ഭക്ഷണം കൊടുക്കലും മറ്റും , എന്നിട്ടോ അതിനു കഴിയാത്ത ഒരാള്‍ക്ക്‌ ഒരു കുട്ട ഈത്തപ്പഴം സ്വന്തം കുടുംബത്തിനു കൊടുത്തു ആ നോമ്പ് പോയതിനു പ്രായശ്ചിത്തം ചെയ്യാന്‍ ഉപദേശം .. ഇത് വ്യക്തമാക്കുന്നത് ആരാധനകളില്‍ അടക്കം മനുഷ്യ നന്മക്കാണ് മുന്‍തൂക്കം എന്നതാണ് .. അഥവാ മനുഷ്യ നന്മയും വ്യക്തി സംസ്കരണവും ആണ് നോമ്പ് പോലുള്ള ആരാധനകളുടെ മുഖ്യ ലക്‌ഷ്യം എന്നര്‍ത്ഥം.

അല്ലാഹുവിനു ഏറ്റവും ഇഷ്ടം ആരെയാണെന്ന് ഒരിക്കല്‍ ഒരാള്‍ പ്രവാചകനോട് ചോദിച്ചപ്പോള്‍ മനുഷ്യര്‍ക്ക്‌ ഏറെ ഉപകാരപ്പെടുന്ന വ്യക്തി ആണ് അത് എന്നായിരുന്നു പ്രവാചകന്റെ മറുപടി .. ഇതായിരിക്കട്ടെ ഈ റംസാനിന്റെ സന്ദേശം

ആയിരം മാസങ്ങളേക്കാള്‍ പുണ്യം ഉള്ള രാവടങ്ങിയ നോമ്പ് ഏതാണ്ട് തീരാറായി .. ഒരു മാസം അന്ന പാനീയങ്ങള്‍ ഉപേക്ഷിച്ചു, ചീത്ത വിചാരങ്ങളും മറ്റു ദേഹേച്ഛകളും നിയന്ത്രിച്ചു നേടിയ വിജയത്തിന്റെ ഒരു ആഘോഷം ആണ് വരാനുള്ള പെരുന്നാള്‍ സുദിനം .. ആ ദിവസത്തില്‍ ഒരു വീട്ടിലും അടുപ്പ് പുകയാതിരിക്കരുത് എന്ന ഉദ്ദേശത്താല്‍് ഉള്ള ഒരു നിര്‍ബന്ധ കര്‍മ്മം ആണ് തലേ ദിവസം അരിയും മറ്റും ഫിതര്‍ സകാത്ത്‌ കൊടുക്കല്‍ .

വിശക്കുന്നവനോട് ഐക്യ ദാര്ഡ്യം പ്രഖ്യാപിച്ചു അവനു നന്മകള്‍ ചെയ്തു കൊടുത്തു , ഈ സുദിനത്തില്‍ , ജാതി മത വര്‍ണ്ണ വര്‍ഗ്ഗ വ്യത്യാസമില്ലാതെ എല്ലാവരെയും പങ്കെടുപ്പിച്ചു , ഒരു മനസ്സോടെ പെരുന്നാള്‍ ആഘോഷിക്കാന്‍ എല്ലാവക്കും കഴിയട്ടെ എന്ന് ആശംസിക്കുന്നു .... കൂടെ നിത്യ ജീവിതത്തില്‍ മനുഷ്യര്‍ക്ക്‌ ഏറെ ഉപകാരപ്പെട്ടു ദൈവത്തിന്റെ ഇഷ്ടദാസന്മാര്‍ ആയിത്തീരാന്‍ നാം പരിശ്രമിക്കുകയും ചെയ്യുക .

റംസാന്‍ , ഈദ്‌ ആശംസകളോടെ
നിങ്ങളുടെ സ്വന്തം
ഫൈസല്‍ കൊണ്ടോട്ടി

തട്ടിപ്പിന്റെ പുതുവഴികള്‍

പ്രിയ ബൂലോകരെ, നിങ്ങള്‍ കാട്ടിയ വിശ്വാസത്തിനു നന്ദി . ബ്ലോഗിലൂടെ ചില അരുതായ്മകള്‍ കണ്ടപ്പോള്‍ അത് അന്വേഷിച്ചു ചെന്ന ഞങ്ങള്‍ക്ക് മറ്റു ചില ഞെട്ടിപ്പിക്കുന്ന വിവരങ്ങള്‍ ലഭിക്കുകയുണ്ടായി. ബൂലോകരുടെ അറിവിലേക്കായി അത് ഇവിടെ അവതരിപ്പിക്കുന്നു.

രോഗം മനുഷ്യന്റ്റെ കൂടെപ്പിറപ്പാണ്.

രോഗ ബാധിതനായ സഹജീവിയെ സഹായിക്കാന്‍ സ്നേഹം ഹൃദയത്തില്‍ ബാക്കിയുള്ള ഏവരും തയ്യാറാവുകയും ചെയ്യും.അതില്‍ ഏറ്റവും ക്രൂരമായ ഒരു വിധിയാണ് ക്യാന്‍സര്‍ രോഗം. ഇതിന്റെ ദൈന്യതയെപ്പറ്റി ബോദ്ധ്യമുള്ളതിനാലാവാം നമ്മുടെ സമൂഹം ഈ രോഗത്തെ ഏറ്റവും കൂടിയ സഹതാപത്തോടെയാണ് കാണുന്നത്. ഈ സഹതാപം മുതലെടുക്കാന്‍ തയ്യാറായി നിരവധി തട്ടിപ്പുകള്‍ നാട്ടില്‍ നടക്കുന്നുമുണ്ട്.

അത്തരത്തില്‍ ഒന്നുകൂടി ഇതാ.

ആര്‍.സി.സിയിലെ ഡോക്ടര്‍ പ്രവീണ്‍ പൈ നല്‍കിയ വിവരങ്ങളാണിത്. ആര്‍.സി.സിയുടെ പേരില്‍ അച്ചടിക്കപ്പെട്ട നിരവധി വ്യാജ കാര്‍ഡുകള്‍ സംസ്ഥാനത്തുടനീളം വിതരണം നടക്കുന്നതായി ശ്രദ്ധയില്‍ പെട്ടിട്ടുണ്ടെന്ന് പബ്ലിക്ക് റിലേഷന്‍സ് ഓഫീസര്‍ അറിയിച്ചിരിക്കുന്നു. ഈ സാഹചര്യത്തില്‍ ആര്‍.സി.സിയുടെ കാര്‍ഡ് തെളിവായ് കാട്ടി സഹായത്തിനായ് ആരെങ്കിലും നിങ്ങളെ സമീപിക്കുന്ന പക്ഷം അതില്‍ രേഖപ്പെടുത്തപ്പെട്ട ഫയല്‍ നമ്പര്‍ ആര്‍.സി.സിയിലേക്ക് വിളിച്ച് അറിയിക്കണം. അതില്‍ വേണ്ട തുടര്‍ നടപടികള്‍ ഔദ്യോഗിക തലത്തില്‍ നടക്കുന്നതായിരിക്കു.

For all enquiries,contact the Public Relations Office,
RCC Trivandrum (Phone 0471 2522288).


(തുടർന്ന് വായിക്കാൻ ഇവിടെ ക്ലിക്ക് ചെയ്യുക.)

ബ്ലോഗ് ഒരു ധനാഗമ മാര്‍ഗ്ഗമോ ?

വായനക്കാരെ എല്ലാവരേയും ക്ഷമയുടെ മുള്‍മുനയില്‍ കുറേയധികം സമയം നിറുത്തേണ്ടി വന്നത് സിയാബിന്റെ ഭാഗം കേള്‍ക്കാന്‍ ഒരു അവസരം എല്ലാവര്‍ക്കും ഉണ്ടാകട്ടെ എന്ന് കരുതിയാണ്. അങ്ങനൊന്ന് ഉണ്ടാകില്ലെന്ന് അറിഞ്ഞുകൊണ്ടുതന്നെ ഞങ്ങള്‍ അല്‍പ്പം കാത്തിരിക്കുകയാണ് ചെയ്തത്. അതുകൊണ്ട് ഗുണമൊന്നും ഉണ്ടായില്ല.എന്ന് മാത്രമല്ല , സിയാബ്‌ ഓണ്‍ ലൈനില്‍ ഉണ്ടായിരുന്നതായി 'വിന' തെളിവ് നല്‍കുകയും ചെയ്തു.

ഇനി ഞങ്ങള്‍ വളരെ പ്രധാനമായ ആ വസ്തുതകളിലേക്ക് കടക്കുകയാണ് . ഇപ്രാവശ്യം ഞങ്ങള്‍ക്ക് സംശയങ്ങളോ, ആരോപണങ്ങളോ അല്ല വസ്തുതകള്‍ തന്നെയാണ് നിങ്ങള്‍ക്ക് മുന്നില്‍ നിരത്താനുള്ളത്. വിഷയത്തിലേക്ക് കടക്കാം.

1.സിയാബിന് ഐ.എ.എസ് ഇല്ല. അത് പകല്‍ പോലെ വാസ്തവമാണ്. അതിനെപ്പറ്റി മുന്‍ പോസ്റ്റില്‍ നിരത്തിയ തെളിവുകള്‍ തന്നെ ധാരാളമാണ്. മറിച്ച് ആര്‍ക്കെങ്കിലും തെളിയിക്കാനാകുമെങ്കില്‍ ഞങ്ങള്‍ അവരെ സ്വാഗതം ചെയ്യുന്നു,

2. ഐ.എ.എസ്സ് കിട്ടിയ ആളാണ്, ഐ.എ.എസ്സ് ന്റെ പടി വരെ എത്തിയ ആളാണ് എന്നൊക്കെയുള്ള പത്രവാര്‍ത്തകള്‍ സിയാബിനെ ഒരു താരമാക്കി. ഇതിനിടയില്‍ ആദ്യം മെഡിക്കല്‍ ടെസ്റ്റില്‍ തോറ്റെങ്കിലും അടുത്തവര്‍ഷം മെഡിക്കല്‍ പാസ്സായി എന്ന് സിയാബ് പ്രചരിപ്പിച്ചു. ശലോം മാസികയില്‍ വന്ന വാര്‍ത്തയും, വാര്‍ത്തകള്‍ മനസ്സിരുത്തി വായിക്കാത്ത നമ്മുടെയൊക്കെ വീഴ്ച്ചയും ഇക്കാര്യത്തില്‍ സിയാബിന് തുണയായി.നാട്ടിലും കോളേജിലുമൊക്കെ ഇക്കാലത്ത് സിയാബിന് ഇപ്പേരും പറഞ്ഞ് സ്വീകരണങ്ങള്‍ വരെ കൊടുക്കുകയുണ്ടായി. പല ബ്ലോഗര്‍മാര്‍ക്കും ചാറ്റിലൂടെ ഈ വിവരം കൈമാറിയിരുന്നു എന്നതിന്റെ തെളിവുകളും ചിലര്‍ ഇവിടെ പറഞ്ഞു.

3. തനിക്ക് രോഗമാണെന്നും, രോഗത്തിന്റെ ചികിത്സയിലേക്കായി സഹായം ആവശ്യമുണ്ടെന്നും പറഞ്ഞ് പലരേയും സിയാബ് സമീപിച്ചു. ഐ.എ.എസ് കിട്ടിയതിന്റെ തെളിവായ് പത്ര മാദ്ധ്യമങ്ങളില്‍ വന്ന വാര്‍ത്തകളും ഉപയോഗിച്ചു. അക്കൂട്ടത്തില്‍ ഒരാളാണ് പൊന്നാനി എം.ഇ.എസ്സ്. പ്രിന്‍സിപ്പാള്‍ പ്രൊഫസര്‍ ബേബി. സിയാബിന്റെ വാര്‍ത്ത വന്ന വനിതയുടെ കോപ്പിയുമായാണ് സിയാബ് തന്നെ കാണാന്‍ വന്നതെന്ന് പ്രിന്‍സിപ്പാള്‍ ഇപ്പോഴും ഓര്‍ക്കുന്നു. നിരവധി മത സംഘടകള്‍ സഹായിക്കാമെന്ന് പറഞ്ഞിട്ടുണ്ടെങ്കിലും സിയാബിന് അതില്‍ താത്പര്യമില്ലെന്ന്‍ പ്രിന്‍സിപ്പാളിനോട് പറഞ്ഞു. ബേബി സാര്‍ അദ്ദേഹത്തിന്റെ ഒരു സുഹൃത്തായ ഡോകറുടെ അടുത്തേക്ക് സിയാബിനെ പറഞ്ഞു വിടുന്നു. പരിശോധനയ്ക്ക് ശേഷം സിയാബിന് കാര്യമായ രോഗം ഒന്നും ഇല്ല എന്ന്‍ ഡോക്‍ടര്‍ ബേബി സാറിനോട് പറഞ്ഞു. കോളേജില്‍ നടന്ന ഒരു അലുമിനി ആഘോഷച്ചടങ്ങകളില്‍ സിയാബിനെ ഐ.എ.എസ് നേടിയ ആളെന്ന രീതിയില്‍ പരിചയെപ്പെടുത്തിയതും, തുടര്‍ന്ന് ആ വാര്‍ത്ത തെറ്റാണെന്ന് മലപ്പുറം എസ്.പി അറിയിച്ചതും , നിശചയിച്ചിരുന്ന മറ്റൊരു കരിയര്‍ ഗൈഡന്‍സ് പരിപാടിയുടെ നോട്ടീസില്‍ നിന്നും സിയാബിന്റെ പേര് നീക്കി പുതിയതായി നോട്ടീസ് അടിക്കേണ്ടി വന്ന കാര്യവും പ്രിന്‍സിപ്പാള്‍ വിഷമത്തോടെ പറഞ്ഞു.

4. സിയാബിന്റെ ലോകം പുരോഗമിച്ച് ഇന്റര്‍നെറ്റിലേക്കും ബ്ലോഗിലേക്കുമൊക്കെ വളര്‍ന്നപ്പോള്‍ ആദ്യകാലങ്ങളില്‍ ചെയ്തതുപോലെ തന്നെ സിയാബിനെപ്പറ്റിയുള്ള വാര്‍ത്തകള്‍ വന്ന പേപ്പര്‍ കട്ടിങ്ങുകള്‍ പലര്‍ക്കും മെയിലിലൂടെ അയച്ചുകൊടുത്ത് ഐ.എ.എസ്സ് കാരനാണെന്നുള്ള നിലയിലുള്ള ആദരവും, ബഹുമാനവും പിടിച്ചുപറ്റി സൌഹൃദങ്ങള്‍ വിപുലമാക്കുകയും കൂടുതല്‍ ആരാധകരെ സൃഷ്ടിക്കുകയും ചെയ്തു. ഇതിനിടയില്‍ അദ്ദേഹത്തിന്റെ ബ്ലോഗില്‍ വന്ന ജീവീതകഥ വായിച്ച് ആരാധന മൂത്ത ഒട്ടനവധി പേര് സ്വയം അദ്ദേഹത്തോട് അടുത്തു. കഷ്ടപ്പാട് നിറഞ്ഞ ലോകത്തുനിന്നും സ്വന്തം ശ്രമത്തില്‍ വളര്‍ന്നുവന്നതിന്റെ സഹാനുഭൂതി നിറഞ്ഞ കഥകളും പത്രവാര്‍ത്തകളും സിയാബിന്റെ ‘ജോലി‘ എളുപ്പമാക്കി.

5.ഇത്രയും കഷ്ടപ്പെട്ട് ജീവിത സാഹചര്യങ്ങളോട് പൊരുതിക്കയറി വന്ന ഒരാളോടുള്ള ബഹുമാനവും ആദരവുമൊക്കെ അനുകമ്പയായി മാറ്റിയെടുക്കാന്‍ രോഗിയാണെന്ന് രഹസ്യമായി പ്രചരിപ്പിച്ചിരുന്ന കള്ളക്കഥയിലൂടെ വളരെ എളുപ്പം സിയാബിനായി. ഇങ്ങനെയൊരു രോഗ ദുരന്തത്തെപ്പെറ്റി കേട്ടവരെല്ലാം പ്രത്യേകിച്ച് ഇന്റര്‍നെറ്റിലൂടെ പരിചയപ്പെട്ടവരില്‍ ചിലരെങ്കിലും സിയാബ് ചോദിക്കാതെ തന്നെ സിയാബിന് ധനസഹായം അങ്ങോട്ട് കയറി നല്‍കുകയും സിയാബ് അതെല്ലാം കൈപ്പറ്റുകയും ചെയ്തു. പണം തന്ന കാര്യമോ, രോഗ വിവരമോ മറ്റാരോടും പറയരുതെന്നും അത് പുറത്ത് പറഞ്ഞാല്‍ തന്റെ ഐ.എ.എസ്സിനെ ബാധിക്കും എന്നും പറഞ്ഞ് തട്ടിപ്പ് നിര്‍ബാധം തുടന്നുപോന്നു.

6.അടുത്ത പടിയായി തനിക്ക് മോണയില്‍ ക്യാന്‍സര്‍ ആണെന്നും, രോഗം മൂന്നാമത്തെ സ്റ്റേജിലേക്ക് കടന്നിരിക്കുകയാണെന്നും 62% വരെ പടര്‍ന്നുകഴിഞ്ഞെന്നും, ഐ.എ.എസ്സ് പരിശീലനത്തിന് ചേര്‍ന്നാല്‍ ഇക്കാരണം കൊണ്ട് തന്റെ സിവില്‍ സര്‍വ്വീസ് നഷ്ടമാകുമെന്നും അതുകൊണ്ട് താനിപ്പോള്‍ പഠിക്കാനെന്ന പേരില്‍ ലീവെടുത്തിരിക്കുകയാണെന്നും പഠനത്തിനൊപ്പം ചില ജോലികളുമൊക്കെയായി ചികിത്സയും മുന്നോട്ട് കൊണ്ടുപോകുകയാണെന്ന്‍ എല്ലാവരേയും തെറ്റിദ്ധരിപ്പിച്ചു. ജവഹര്‍ലാല്‍ നെഹ്രു യൂണിവേര്‍സിറ്റി, ലണ്ടന്‍ സ്കൂള്‍ ഓഫ് എക്കണോമിക്സ് എന്നീ പേരുകള്‍ പഠനത്തിന്റെ കാര്യം പറഞ്ഞ് നിരത്തി.


7. ഇത്തരത്തില്‍ സാമ്പത്തിക തട്ടിപ്പിന് ഇരയായ ഒരു പ്രവാസി ബ്ലോഗര്‍ക്കാണ് സിയാബിനെപ്പറ്റി സംശയം ഉണ്ടാകുന്നത്. അവര്‍ നമ്മുടെ ബൂലോകവും, മറ്റ് സുഹൃത്തുക്കളുമായി ചേര്‍ന്ന നടത്തിയ അന്വേഷണമാണ് കഴിഞ്ഞ പോസ്റ്റില്‍ നമ്മുടെ ബൂലോകം ‍ പറഞ്ഞതടക്കമുള്ള ഞെട്ടിപ്പിക്കുന്ന വിവരങ്ങളിലേക്ക് കൊണ്ടെത്തിച്ചത്. (ഞങ്ങളത് സംശയങ്ങള്‍ എന്നെ രൂപത്തില്‍ അവതരിപ്പിച്ചത് വെളിയില്‍ നില്‍ക്കുന്ന സിയാബിന്റെ ആരാധകരും സുഹൃത്തുക്കളും അദ്ദേഹത്തെ അന്ധമായി വിശ്വസിക്കുന്നുണ്ട് എന്ന് മനസ്സിലാക്കിയതുകൊണ്ട് തന്നെയാണ്.)

8.തെളിവിലേക്കായി തല്‍ക്കാലം പ്രവാസി ബ്ലോഗര്‍ സിയാബുമായി നടത്തിയ ചാറ്റിന്റെ പ്രസക്ത ഭാഗങ്ങളും അവര്‍ സ്വന്തം ബാങ്കില്‍ നിന്നും സിയാബിന്റെ കുന്നംകുളം എസ്.ബി.ഐ. ബ്രാഞ്ചിലേക്ക് അയച്ച പണമിടപാടിന്റേയും രേഖകളിതാ താഴെയുണ്ട്. ഐ.എ.എസ് ലഭിച്ചു എന്ന് സിയാബ് അസന്നിഗ്ധമായി പറഞ്ഞിരിക്കുന്നത് ശ്രദ്ധിക്കുക. മഞ്ഞനിറത്തില്‍ അടയാളപ്പെടുത്തിയിരിക്കുന്നത് സിയാബിന്റെ അക്കൌണ്ടിലേക്ക് പണം അയച്ചതിന്റെ ഇടപാടുകളാണ്. സംശയം ഉള്ളവര്‍ക്ക് ആ അക്കൌണ്ടിന്റെ ആധികാരികത പ്രസ്തുത ബാങ്കില്‍ പരിശോധിക്കാവുന്നതാണ്. പക്ഷെ സിയാബ് ബാങ്കിലെ പേര് പറഞ്ഞപ്പോള്‍ ‘ഷിഹാബ് ‘ എന്നാണ് പറഞ്ഞത്. അതിന്റെ സത്യാവസ്ഥ മനസ്സിലാക്കാനായി പണമയക്കുന്നതിന് മുന്‍പ് പ്രവാസി ബ്ലോഗര്‍ ബാങ്കില്‍ അന്വേഷിച്ചപ്പോള്‍ പേരില്‍ വ്യത്യാസം ഉണ്ടെങ്കിലും അഡ്രസ്സ്..... കടവല്ലൂര്‍, വടക്കുമ്മുറി, പാടത്ത്‌ പീടിയേക്കല്‍ എന്നതുതന്നെയാണെന്ന് മനസ്സിലാക്കിയതുകൊണ്ട് പണം അയക്കുകയാനുണ്ടായത്. റെഡിയെഷന്‍ , ടെസ്റ്റുകള്‍, കീമോ തെറാപ്പി എന്നിവയ്ക്കുള്ള പണമാണ് പ്രവാസി ബ്ലോഗര്‍ സിയാബിന് അയച്ചുകൊണ്ടിരുന്നത്. പക്ഷെ, എത്ര ചോദിച്ചിട്ടും ചികിത്സിക്കുന്ന ഡോക്ടറുടെ ഫോണ്‍ നമ്പര്‍ കൊടുത്തില്ല. ട്രീറ്റ്‌ മെന്റ് കേസ് ഫയല്‍ അയച്ചു നല്‍കാം എന്ന് പറഞ്ഞതും കൊടുത്തില്ല . ചികില്‍ സയ്ക്കുള്ള മുഴുവന്‍ പണവും വാഗ്ദാനം ചെയ്തിരുന്നതായും പ്രവാസി ബ്ലോഗര്‍ നമ്മുടെ ബൂലോകത്തോട് പറഞ്ഞു .

ഈ വിഷയം ഞങ്ങള്‍ അവസാനിപ്പിച്ചതിനാല്‍ ചാറ്റ് ഹിസ്റ്ററി യും അക്കൗണ്ട്‌ വിവരങ്ങളും 6 -2 - 2010 മുതല്‍ ബ്ലര്‍ ചെയ്യുന്നു.

സിയാബിനെ സ്വന്തം മകനെയെന്നപോലെ കാണുകയും ഏറ്റവും നല്ല ചികിത്സ അദ്ദേഹത്തിന് കിട്ടാനുള്ള സൌകര്യങ്ങള്‍ ചെയ്തുകൊടുക്കുന്നതിലേക്കുമായി സിയാബിന്റെ ചികിത്സ നടക്കുന്നു എന്നു സിയാബ് പറയുന്ന തിരുവനന്തപുറം RCC (Regional Cancer Centre) യിലെ CR നമ്പര്‍ ചോദിച്ചപ്പോള്‍ സിയാബ് കൊടുത്ത നമ്പര്‍ 0913454 - C വ്യാജമായിരുന്നു. ആശുപത്രിയില്‍ അന്വേഷിച്ചപ്പോള്‍ അവിടെ ഇതുവരെ സിയാബ് എന്നോ ഷിഹാബ് എന്നോ പേരില്‍ ഒരു രോഗി റെഡിയെഷനോ കീമോ യോ നടത്തുന്നില്ല എന്നാണ് അറിയാന്‍ കഴിഞ്ഞത്. ഒരിക്കല്‍ക്കൂടെ സിയാബിനോട് CR നമ്പര്‍ വ്യക്തമായി ചോദിച്ചപ്പോള്‍ നമ്പര്‍ 0913454 - C തന്നെ എന്ന് സിയാബ് ആവര്‍ത്തിച്ചു. പക്ഷെ , അതിനു ശേഷം പ്രവാസി ബ്ലോഗരുമായുള്ള "കമ്മ്യൂനിക്കേഷന്‍ " സിയാബ്‌ തുടര്‍ന്നില്ല.......

തിരുവനന്തപുരത്ത് RCC യില്‍ സിയാബ് റേഡിയേഷന് പോകുന്നു എന്ന് പറഞ്ഞ ദിവസങ്ങളിലൊക്കെ അവിടെ അന്വേഷിക്കാന്‍ ആളെ ഏര്‍പ്പാടാക്കുന്ന രീതിയില്‍ സംശയങ്ങള്‍ വളര്‍ന്നുകൊണ്ടിരുന്നു. ഇക്കഴിഞ്ഞ ദിവസങ്ങളില്‍ സിയാബ് RCCയില്‍ റേഡിയേഷന് പോയിരിക്കുകയാണെന്ന് രോഗവിവരം അറിയുന്ന ആരാധകരെ പലരേയും ധരിപ്പിച്ചിരുന്നു. പക്ഷെ ഈ കഴിഞ്ഞ ദിവസങ്ങളില്‍ എന്നല്ല 2006 മുതല്‍ ഇങ്ങോട്ട് ഇതുവരെ സിയാബ് അല്ലെങ്കില്‍ ഷിഹാബ് എന്ന പേരില്‍ , അതുമല്ലെങ്കില്‍ മറ്റേതെങ്കിലും പേരില്‍ 20നും 30നും ഇടയില്‍ പ്രായമുള്ള ഒരു വ്യക്തി RCCയില്‍ , മോണയിലെ ക്യാന്‍സര്‍ ചികില്‍സക്കായി ചെന്നതായി റെക്കോഡുകള്‍ ഒന്നും ഇല്ലെന്ന് RCCയില്‍ പാലിയേറ്റീവ് കെയറില്‍ ജോലി ചെയ്യുന്ന ഡോക്‍ടര്‍ പ്രവീണ്‍ പൈ അദ്ദേഹത്തിന്റെ അന്വേഷണത്തിനുശേഷം നമ്മുടെ ബൂലോകത്തെ അറിയിക്കുകയുണ്ടായി.

ഡോക്‍ടര്‍ പ്രവീണ്‍ , എം.ഇ.എസ്സ് കോളേജ് പ്രിന്‍സിപ്പാള്‍ പ്രൊഫസര്‍ .ബേബി , കളക്‍ടര്‍ ബീന എന്നിവരുടെയെല്ലാം പേര് പറഞ്ഞുതന്നെ ഞങ്ങള്‍ ഇത്രയും കാര്യങ്ങള്‍ , പുറത്തുപറയുമ്പോള്‍ ഞങ്ങളീ വാര്‍ത്തയുടെ ഗുരുതരാവസ്ഥ എത്രത്തോളം ഉള്‍ക്കൊണ്ടിട്ടാണ് ഈ അന്വേഷണവുമായി സമയവും പണവുമൊക്കെ മുടക്കി മുന്നോട്ട് പോയതെന്ന് അല്‍പ്പമെങ്കിലും വിവേകബുദ്ധി ബാക്കിയുള്ളവര്‍ മനസ്സിലാക്കുമെന്ന് തന്നെയാണ് ഞങ്ങളുടെ വിശ്വാസം.

എം,ഇ,എസ്സ് കോളിലെ അന്വേഷണങ്ങളുടെ വിശദമായ വിവരങ്ങള്‍ ഞങ്ങളുടെ കയ്യില്‍ ഉണ്ട്. ഈ വാര്‍ത്ത അധികം വലിച്ചുനീട്ടി എഴുതാന്‍ ഉദ്ദേശിക്കാത്തതുകൊണ്ട് അതൊന്നും ഇവിടെ പറയുന്നില്ല. ആവശ്യം വരുന്ന പക്ഷം വിശദാംശങ്ങള്‍ നല്‍കുന്നതാണ്. അനില്‍ @ ബ്ലോഗാണ് എം.ഇ.എസ്സ്. കോളേജിലെത്തി നമ്മുടെ ബൂലോകത്തിന് വേണ്ടി ഈ അന്വേഷണം നടത്തിയത്. കോളേജിലെ മറ്റ് അദ്ധ്യാപകരില്‍ ചിലര്‍ അനില്‍ @ ബ്ലോഗിന്റെ സുഹൃത്തുക്കളാണ്. അവര്‍ പറഞ്ഞ കാര്യങ്ങളും സിയാബിനെതിരാണ്.

കൂടുതല്‍ തെളിവുകളും സിയാബിനെപ്പറ്റിയുള്ള വ്യക്തിപരമായ മറ്റ് ഒട്ടനവധി കാര്യങ്ങളും ഞങ്ങള്‍ക്കിപ്പോള്‍ അറിയാം. പക്ഷെ അതൊക്കെ വ്യക്തിജീവിതത്തിലേക്കുള്ള കടന്നുകയറ്റമാണെന്ന് അറിയുന്നതുകൊണ്ട് അതൊന്നും ഒരു കാരണവശാലും ഞങ്ങള്‍ പുറത്ത് പറയില്ല. കഷ്ടപ്പാടുകള്‍ക്കിടയില്‍ നിന്ന് സ്വപ്രയത്നം കൊണ്ട് പഠിച്ചു വന്ന സിയാബിനോട് മറ്റെല്ലാവര്‍ക്കുമെന്ന പോലെ തന്നെ ഞങ്ങളിലും അഭിമാനവും ആദരവുമൊക്കെ തന്നെയാണ് ഉണ്ടാക്കുന്നത്. പക്ഷെ ഈ ആദരവും സ്നേഹവും പൊതുജനത്തെ ചൂഷണം ചെയ്യാനുള്ള ലൈസന്‍സല്ല എന്ന് സിയാബ് തിരിച്ചറിയണം.

സിയാബിന് മോണയില്‍ ക്യാന്‍സര്‍ ഉണ്ട് എന്ന് തെളിയിക്കാനായാല്‍ സിയാബിന്റെ ചികിത്സയ്ക്കായി പണം സ്വരൂപിക്കാന്‍ മുന്‍ നിരയില്‍ തന്നെ ഞങ്ങളുണ്ടാകും. പക്ഷെ അത് ഞങ്ങള്‍ക്കും സിയാബിനു പണം നല്‍കിയ പ്രവാസി ബ്ലോഗര്‍ക്കും ബൊദ്ധ്യപ്പെട്ടെ മതിയാവൂ.

ഇതൊന്നും സിയാബിനോ അദ്ദേഹത്തിന്റെ ആരാധകര്‍ക്കോ അഭ്യുദയകാംക്ഷികള്‍ക്കോ കഴിയുന്നില്ലെങ്കില്‍ കുറഞ്ഞ പക്ഷം പ്രവാസി ബ്ലോഗര്‍ കയ്യില്‍ നിന്ന് വാങ്ങിയ 47, 000 രൂപയെങ്കിലും മടക്കിക്കൊടുക്കണമെന്ന് അപേക്ഷിക്കുന്നു. ആ പണം ആവശ്യമുള്ള ഒട്ടനവധി പേര് പുറം ലോകത്തുണ്ട്. അതുപോലെ സഹായവും കാത്തുനില്‍ക്കുന്നവര്‍ക്ക് ചെന്നു ചേരേണ്ട പണം അനര്‍ഹമായ രീതിയില്‍ കൈവശപ്പെടുത്തിയ നടപടി വളരെ ഹീനമാണ്. പ്രവാസി ബ്ലോഗര്‍ ആ പണം 'ജീവകാരുണ്യ' പ്രവര്‍ത്തനങ്ങള്‍ക്കായാണ് കൊടുക്കാന്‍ ഉദ്ദേശിക്കുന്നത്. രോഗം തെളിയിക്കാനാവുന്നില്ലെങ്കില്‍ ജീവിതവുമായി മല്ലിടുന്ന മറ്റേതെങ്കിലും സാധുക്കള്‍ക്ക് ആശ്വാസം നല്‍കാനത് തിരികെ തരൂ. സിയാബ്, ദയവായി താങ്കള്‍ സ്വയം തെളിയിക്കുക, ഇതൊരു അപേക്ഷയാണ്

ഞങ്ങള്‍ക്ക് സിയാബിനെ താറടിച്ച് കാണിക്കണമെന്ന് ഒരു ആഗ്രഹവുമില്ല. യാതൊരു തരത്തിലുള്ള വ്യക്തിവൈരാഗ്യവും ഞങ്ങള്‍ക്ക് സിയാബിനോടില്ല.

ഇന്റര്‍നെറ്റിലൂടെയും മറ്റും നടക്കുന്ന തട്ടിപ്പുകള്‍ അരങ്ങുവാഴുന്ന കാലമാണിത്. ഒരു ബ്ലോഗര്‍ക്കോ , ഓര്‍ക്കുട്ടുകാരനോ , സഹപ്രവര്‍ത്തകനോ, മലയാളിക്ക് തന്നെയോ ഒരബദ്ധം ഈ വിഷയത്തില്‍ ഇനിയെങ്കിലും ഉണ്ടാകാതിരിക്കാന്‍ ഞങ്ങള്‍ നടത്തിയ ആത്മാര്‍ഥമായി അന്വേഷണത്തിന്റേയും പരിശ്രമത്തിന്റേയും ഫലമാണ് ഈ റിപ്പോര്‍ട്ട്.
ഞങ്ങളുടെ സദുദ്ദേശം എല്ലാവരും മനസ്സിലാക്കുമെന്ന അടിയുറച്ച വിശ്വാസം ഞങ്ങള്‍ക്കുണ്ട്.

മറിച്ച് ഇപ്പറഞ്ഞതൊക്കെ അസത്യമാണെന്ന് ആര്‍ക്കെങ്കിലും തെളിയിക്കാനായാല്‍ ഞങ്ങളിവിടെത്തയുണ്ട്, കല്ലെറിയാനുള്ളവര്‍ മുന്നോട്ട് വരിക, എറ്റുവാങ്ങാന്‍ ഞങ്ങള്‍ തയ്യാര്‍.

(തുടർന്ന് വായിക്കാൻ ഇവിടെ ക്ലിക്ക് ചെയ്യുക.)

സിയാബ്‌ ‘ IAS ‘ ???

ചില സംശയങ്ങള്‍

"സിയാബ്‌ " എന്ന ബ്ലോഗര്‍ എഴുതുന്ന "ഓര്‍മ്മക്കുറിപ്പുകള്‍ " എന്ന ബ്ലോഗ് ഇതിനോടകം തന്നെ വായനക്കാര്‍ ശ്രദ്ധിച്ചു കാണുമല്ലോ?.
ഏതാണ്ട് 2009 മേയ്‌ മാസം അവസാനത്തോടെയാണ് സിയാബിന്റെ ബ്ലോഗ് ജീവിതം ആരംഭിക്കുന്നത് . വളരെ പാവപ്പെട്ട കുടുംബത്തില്‍ ജനിച്ച് വളര്‍ന്ന് പ്രതികൂല സാഹചര്യങ്ങളോട് പടവെട്ടി അഞ്ചാം ക്ലാസ്സ് മുതല്‍ സ്വന്തമായി അദ്ധ്വാനിച്ച് പഠനത്തിനും സ്വന്തം വീട്ടുചിലവിന് വരെയുള്ള പണം സമ്പാദിച്ച് കഷ്ടപ്പെട്ട് പൊരുതിക്കയറി ‘ഐ.എ.എസ്സ് ‘ വരെ സ്വന്തമാക്കിയ ഒരാളായ സിയാബിന്റെ സ്വന്തം ജീവിതാനുഭങ്ങളാണ് ഈ ബ്ലോഗിന്റെ ഉള്ളടക്കം. സിയാബിന്റെ ഉയര്‍ച്ചയ്ക്ക് വേണ്ട സഹായങ്ങളൊക്കെ നല്‍കി താങ്ങും തണലുമായി നിന്നിട്ടുള്ള മറ്റേമ്മ, ചേറൂര്‍ വിജയപുരം സെന്റ് സേവ്യേഴ്സ് പള്ളി ഇടവക വികാരി ഫാദര്‍ പോള്‍ വട്ടക്കുഴി, എന്നീ വ്യക്തികളേയും ഇപ്പോഴത്തെ എറണാകുളം ജില്ലാ കളക്‍ടര്‍ ഡോ:ബീന, പോലീസ് അക്കാഡമി ഡയറ‌ക്‍ടര്‍ ഐ.ജി. അലക്സാണ്ടര്‍ ജേക്കബ് എന്നീ പ്രമുഖരുടേയുമൊക്കെ നല്ലമനസ്സുകള്‍ നമുക്കീ ബ്ലോഗിലൂടെ സിയാബ് കാണിച്ച് തരുന്നുണ്ട്.

വിദ്യാര്‍ത്ഥികള്‍ ഒരു റോള്‍ മോഡലായിത്തന്നെ കാണേണ്ട ഒരു വ്യക്തിയാണ് സിയാബ് എന്നരീതിയില്‍ പല പല മാദ്ധ്യമങ്ങളില്‍ സിയാബിനെപ്പറ്റി വന്ന വാര്‍ത്തകളുടെ ഇമേജുകളൊക്കെ സിയാബിന്റെ ബ്ലോഗില്‍ നമുക്ക് കാണാന്‍ സാധിക്കും. ഇങ്ങനെയൊക്കെയുള്ള ത്യാഗങ്ങള്‍ സഹിച്ച് ജീവിതവിജയം കൈവരിച്ച ഒരാളെന്ന നിലയില്‍ സിയാബിന്റെ ബ്ലോഗിന് വായനക്കാര്‍ക്ക് ഒരു പഞ്ഞവുമില്ല. ചുരുങ്ങിയ ഒരു മാസത്തിനുള്ളില്‍ ഏതൊരു ബ്ലോഗറേയും അസൂയാലുവാക്കും വിധത്തില്‍ നൂറോളം ഫോളോവേഴ്സിനെ ഈ ബ്ലോഗിന് ലഭിക്കുകയും ചെയ്തു.

മറ്റെല്ലാവരേയും പോലെതന്നെ വളരെ കൌതുകത്തോടെ ഞങ്ങളും ഈ ബ്ലോഗ് വായിക്കുകയും ശ്രദ്ധിക്കുകയും ചെയ്തിരുന്നു. അങ്ങനെയിരിക്കുമ്പോള്‍ , ചില അവ്യക്തതകള്‍ ആ ബ്ലോഗിലെ വരികള്‍ക്കിടയില്‍ കാണപ്പെട്ടു തുടങ്ങിയതിനാല്‍ സൂക്ഷ്മ നിരീക്ഷണങ്ങള്‍ക്ക് വിധേയമാക്കിയാണ് ആ ബ്ലോഗ് ഞങ്ങള്‍ പിന്നീട് വായിച്ചു കൊണ്ടിരുന്നത്. ഇതിനിടയില്‍ ബ്ലോഗ് സ്പോട്ടില്‍ ഉണ്ടായിരുന്ന ആ ബ്ലോഗ് പൊടുന്നനെ റീ ഡയരക്റ്റ്‌ ചെയ്തു ഡോട്ട് ഇന്നിലെക്കും പോകാന്‍ തുടങ്ങി. ഇതിന് മുന്‍പും ശേഷവും അവ്യക്തതയാര്‍ന്ന കാര്യങ്ങള്‍ ആ ബ്ലോഗില്‍ പരാമര്‍ശിച്ചിട്ടുള്ളത് കൊണ്ടു ഒരു സംശയ ദൂരീകരണത്തിന് വേണ്ടിയാണ് ഈ പോസ്റ്റ് ഇടുന്നത് . ഇതു വായിച്ചിട്ട് വായനക്കാരുടെ അഭിപ്രായങ്ങളും ഇവിടെ പങ്കു വയ്ക്കാം. പക്ഷെ, ഞങ്ങളുടെ സംശയങ്ങള്‍ ദൂരീകരിക്കുന്നതിന് ഇവിടെ മറുപടി പറയേണ്ട ധാര്‍മിക ഉത്തരവാദിത്തം സിയാബിനുണ്ട്. അതിനാല്‍ ഞങ്ങളെപ്പോലെ വായനക്കാരും സിയാബിന്റെ മറുപടിക്കായി കാത്തു നില്‍ക്കുന്നു.

സിയാബ്‌, ഞങ്ങള്‍ ഞങ്ങളുടെ സംശയങ്ങള്‍ ഇവിടെ നിരത്തട്ടെ......

1. പല വായനക്കാരും താങ്കളുടെ ബ്ലോഗില്‍ എഴുതി ചോദിച്ച ഒരു കാര്യം , എന്ത് കൊണ്ടു സിവില്‍ സര്‍വ്വീസ് അനുഭവങ്ങള്‍ വായനക്കാരുമായി പങ്കു വയ്ക്കുന്നില്ല , പകരം ദാരിദ്ര്യത്തിന്റെയും മറ്റും കയ്പ്പേറിയ അനുഭവങ്ങള്‍ മാത്രം എഴുതുന്നു? ഇത് എന്തെങ്കിലും തരത്തിലുള്ള ഗൂഡ ഉദ്ദേശ്യം ലാക്കാക്കിയുള്ള നീക്കമാണോ ?

2. താങ്കള്‍ സിവില്‍ സര്‍വ്വീസ് പ്രിലിമിനറി പാസ്സായതായും ,അഭിമുഖം പസ്സായതായും, മെഡിക്കല്‍ കടമ്പ കടന്നതായും ബ്ലോഗില്‍ പറയുന്നുണ്ട്. പക്ഷെ ആ ഭാഗങ്ങള്‍ക്കൊന്നും അത്ര വ്യക്തതയില്ല. ജീവിതത്തിലെ ഏറ്റവും പ്രധാനപ്പെട്ടതും വില മതിക്കാനാവാത്തതുമായ ഈ സിവില്‍ സര്‍വ്വീസ് പരീക്ഷയുടെ കാര്യത്തെപ്പറ്റി പറയുമ്പോള്‍ പോലും താങ്കളെന്താണ് അല്‍പ്പം പോലും കൃത്യമായി അത് വിവരിക്കാത്തത് ?

ഉദാഹരണത്തിന് താങ്കളുടെ 2 പോസ്റ്റുകള്‍ കൂട്ടി വായിച്ചാല്‍ അതിങ്ങനെയാണ്.സ്വപ്നങ്ങള്‍ പൊലിയുന്നു എന്ന സിയാബിന്റെ പോസ്റ്റ് തീരുന്നത് താഴെ കാണുന്ന 2 പാരഗ്രാഫുകളോടെയാണ്.

വീണ്ടും നാട്ടില്‍ എത്തിയ എന്നോട് എല്ലാവരും വളരെ സ്നേഹത്തോടെ പെരുമാറി. അങ്ങനെ രണ്ടാഴ്ച്ച കഴിഞ്ഞു ഒരു ദിവസം മാതൃഭൂമി പത്രത്തില്‍ നിന്നും എന്നെ വിളിച്ചു റിസള്‍ട്ട്‌ പബ്ലിഷ് ചെയ്തിട്ടുണ്ട് എന്ന് പറഞ്ഞു. എന്റെ പേരു കാണുന്നില്ല എന്നും പറഞ്ഞു. അപ്പോഴേക്കും എല്ലായിടത്തുനിന്നും ഫോണ്‍ വിളികള്‍ വന്നുതുടങ്ങി എല്ലാര്‍ക്കും ഫലം അറിയാനായിരുന്നു തിടുക്കം. ഞാനും പ്രമോദും കൂടി പരിശോധിച്ചപ്പോള്‍ എന്റെ പേരു കണ്ടില്ല. ഞാന്‍ ഇന്റര്‍വ്യൂ പരാജയപെട്ടു എന്ന് മനസിലാക്കി അച്ചനോട് വിവരം പറഞ്ഞു. അച്ചന്‍ അടുത്ത വട്ടം എഴുതാം എന്ന് പറഞ്ഞു ആശ്വസിപ്പിച്ചു. എന്തോ ആ സമയത്തു എനിക്ക് വല്ലാതെ ദുഖം തോന്നി. പരീക്ഷയുടെ ആദ്യ ഘട്ടങ്ങളില്‍ ഒരു പ്രതീക്ഷയും ഇല്ലാതിരുന്ന എനിക്ക് ഇന്റര്‍വ്യൂ ആയപ്പോഴേക്കും ഒരുപാടു പ്രതീക്ഷ വന്നിരുന്നു. പിറ്റേദിവസം ഞാന്‍ നാട്ടില്‍ ചെന്നപ്പോള്‍ തണുത്ത സ്വീകരണം ആണ് കിട്ടിയത്. ആളുകളുടെ മുഖത്തെ പരിഹാസങ്ങള്‍ ഞാന്‍ ശരിക്കും തിരിച്ചറിഞ്ഞു. ആരോടും ഒന്നും പറയാനാവാതെ ഞാന്‍ തിരിച്ചു പള്ളിയിലേക്ക് മടങ്ങി വന്നു.

അന്നുരാത്രി ആമി എന്നെ വിളിച്ചു ഒരുപാടു സംസാരിച്ചു. എന്റെ ദുഖത്തിന്റെ കാരണം എനിക്ക് പറഞ്ഞു തന്നു. പെട്ടന്നു കിട്ടിയ ആളുകളുടെ അംഗീകാരം എന്നില്‍ അഹങ്കാരം വളര്‍ത്തിയിരുന്നു. അത് ഇല്ലാതാക്കാന്‍ വേണ്ടിയാണു ഈ പരാജയം എന്നും ആമി പറഞ്ഞപ്പോള്‍ എനിക്ക് കാര്യങ്ങള്‍ വ്യക്തമായി. എന്റെ ദുഖം ഇല്ലാതാവുകയും ചെയ്തു. അടുത്ത വട്ടം എഴുതുവാനുള്ള തയ്യരെടുപ്പുകളിലേക്ക് ഞാന്‍ തിരിയുകയും ചെയ്തു. പിറ്റേ ദിവസം ഞാന്‍ ബീന മാഡം വിളിച്ചതനുസരിച്ച് കാണാന്‍ പോയി. മെഡിക്കല്‍ പരിശോധനയില്‍ ആണ് പരാജയപെട്ടിരിക്കുന്നത് എന്ന് എന്നോട് പറഞ്ഞു. Upsc ഓഫീസുമായി ബന്ധപ്പെടാനും പറഞ്ഞു. അങ്ങനെ ഓഫീസുമായി ബന്ധപ്പെടുകയും എന്റെ മെഡിക്കല്‍ പരിശോധനയ്ക്ക്‌ വീണ്ടും സമയം അനുവദിക്കണം എന്നും അപേക്ഷിച്ചു. അവരുടെ മറുപടി എന്തായിരിക്കും എന്നൊന്നും അറിയില്ലായിരുന്നു. പക്ഷെ അവിടെയും ദൈവം പ്രതീക്ഷയുടെ ഒരു തിരിനാളം എനിക്കായി കൊളുത്തി വെച്ചിരുന്നു…………

ഇനി ഇതിന്റെ തുടര്‍ച്ചയാണെന്ന് നാം കരുതി കാത്തിരുന്ന് വായിക്കേണ്ട അടുത്ത പോസ്റ്റിലേക്ക് പോയി നോക്കൂ.
ജീവിതത്തിന്റെ പുതിയ ലക്ഷ്യത്തിലേക്കു കടക്കുന്നതിനു വേണ്ടിയുള്ള കാത്തിരിപ്പിന് എനിക്ക് ഒരു വര്‍ഷം കൂടി വേണ്ടി വന്നു. ഒരുവര്‍ഷത്തിനുള്ളില്‍ എന്റെ മെഡിക്കല്‍ പരിശോധന പൂര്‍ത്തിയാക്കുന്നതിനു വേണ്ടിയുള്ള അറിയിപ്പ് എനിക്ക് കിട്ടി. പിന്നീട് അതിന് വേണ്ടിയുള്ള തയ്യാറെടുപ്പുകള്‍ ആയിരുന്നു. ആദ്യ മെഡിക്കല്‍ പരിശോധനയ്ക്ക്‌ പോകുമ്പോള്‍ എനിക്ക് വെറും 42 kg മാത്രമേ ഉണ്ടായിരുന്നുള്ളു. വേണ്ടത് 60 kg. ആദ്യം അത് ശരിയാക്കാനുള്ള ശ്രമം ആയിരുന്നു. അതുവരെ വെജിറ്റെറിയന്‍ ആയിരുന്നു ഞാന്‍ . അച്ചന്‍ എന്നെ നോണ്‍ വെജ് ഭക്ഷണം കഴിക്കാന്‍ ശീലിപ്പിച്ചു. ആദ്യമൊക്കെ വളരെ ബുദ്ധിമുട്ടായി തോന്നിയെങ്കിലും ഒരു ലക്ഷ്യത്തിനു വേണ്ടിയാണല്ലോ എന്നോര്‍ത്തു സമാധാനിച്ചു. പതുക്കെ ശരീരം മെച്ചപ്പെടാന്‍ തുടങ്ങി. ആ കാലത്തു അച്ചന്‍ കാണിച്ചിരുന്ന ശ്രദ്ധയും മറ്റും എടുത്തു പറയേണ്ടതാണ്‌. പിന്നെ കണ്ണിന്റെ പ്രശ്നം ആയിരുന്നു.കണ്ണട വെച്ചു അതും പരിഹരിച്ചു. ഇങ്ങനെ ഓരോ കാര്യത്തിലും മറ്റുള്ളവരുടെ ഉപദേശ പ്രകാരം എന്റെ എല്ലാ പ്രശ്നങ്ങളും പരിഹരിച്ചു ഒരു വര്‍ഷത്തിനുള്ളില്‍ ഞാന്‍ പൂര്‍ണ ആരോഗ്യവാനായി. അടുത്ത മെഡിക്കല്‍ പരിശോധനക്കായി ഞങള്‍ ഡല്‍ഹിയിലേക്കു യാത്രയായി.
ആ യാത്ര വിമാനത്തില്‍ ആയിരുന്നു. എന്റെ ജീവിതത്തിലെ ആദ്യത്തെ വിമാനയാത്ര അതിന് വഴി തെളിച്ചത് ചാക്കോച്ചി ആയിരുന്നു. ചാക്കോച്ചിയെ കുറിച്ചു പിന്നീട് എഴുതാം. ജീവിതത്തില്‍ ഒരു പുതിയ അനുഭവം ആയിരുന്നു ആ യാത്ര. താഴെ നിന്നും മാത്രം വിമാനം നോക്കിയിരുന്നു ആസ്വദിച്ചിരുന്ന ഞാന്‍ അതില്‍ യാത്ര ചെയ്യുക ദൈവത്തിന്റെ ഇടപെടലുകള്‍ എത്ര മനോഹരമാണ് . അങ്ങനെ ഡല്‍ഹിയില്‍ എത്തി മെഡിക്കല്‍ പരിശോധന നടത്തുകയും അതില്‍വിജയിക്കുകയും ചെയ്തു. എന്നാല്‍ ഈ കാര്യം ഞാന്‍ എനിക്ക് വേണ്ടപ്പെട്ട കുറച്ചു പേരെ മാത്രമാണ് അറിയിച്ചത്. ഇനി ഒരു പ്രശസ്തി ഞാന്‍ ഒരിക്കലും ആഗ്രഹിച്ചിരുന്നില്ല.

3. ഡല്‍ഹിയില്‍ എത്തി മെഡിക്കല്‍ പരിശോധന നടത്തുകയും അതില്‍ വിജയിക്കുകയും ചെയ്തു എന്നല്ലാതെ പോസ്റ്റിങ്ങ് എവിടെ ? കളക്‍ടറായിട്ടോ അസിസ്റ്റന്റ് കളക്‍ടറായിട്ടോ എന്നൊന്നും താങ്കള്‍ തെളിച്ച് പറയുന്നില്ല. ഇത്തരം കാര്യങ്ങള്‍ പിന്നീടുള്ള ഒരു പോസ്റ്റിലും പറയുന്നില്ല. എന്തുകൊണ്ട് പറയുന്നില്ല ? ഐ.എ.എസ്സ് എന്നത് താങ്കള്‍ക്ക് അത്രയ്ക്ക് നിസ്സാരമായ ഒരു കാര്യമാണോ ? മറ്റേതൊരു വ്യക്തിയേയും പോലെ സിവില്‍ സര്‍വ്വീസ് താങ്കളുടേയും ഒരു സ്വപ്നമായിരുന്നില്ലേ ? പിന്നെന്താ അതിനെപ്പറ്റി തുറന്നെഴുതിയാല്‍ ?

ഈ ചോദ്യത്തിന് ശാലോം എന്ന മാസികയില്‍ പ്രസിദ്ധീകരിച്ച ഈ വാര്‍ത്ത ഒരു മറുപടിയാകുമോ ? വാര്‍ത്ത ഇങ്ങനെ ......



4. മേല്‍ നല്കിയ ശാലോം വാര്‍ത്തയുടെ ചിത്രം സിയാബ്‌ തന്നെ മെയിലിലൂടെ പല സുഹൃത്തുക്കള്‍ക്കും അയച്ച് കൊടുത്തിട്ടുള്ളതാണ്. അതില്‍ ഒരു വ്യക്തിയില്‍ നിന്നാണ് ഞങ്ങള്‍ക്കിത് കിട്ടുന്നത്. എന്തുകൊണ്ട് താങ്കളിത് മനോരമ ഓണ്‍ലൈന്‍ അടക്കമുള്ള താങ്കളുടെതന്നെ ബ്ലോഗികളിലുമൊക്കെ മറ്റ് പേപ്പര്‍ കട്ടിങ്ങുകള്‍ കാണിച്ചിരിക്കുന്ന‍തുപോലെ അഭിമാനത്തോടെ പ്രദര്‍ശിപ്പിക്കുന്നില്ല ?

ഈ പേപ്പര്‍ കട്ടിങ്ങ് വഴി ലഭ്യമായ വിവരങ്ങള്‍ വെച്ച് ഞങ്ങള്‍ അന്വേഷണം ആരംഭിച്ചു . IAS ലഭിച്ചവരുടെ വിവരങ്ങള്‍ പൊതുജനത്തിന് ലഭ്യമാകുന്ന ഭാരത സര്‍ക്കാറിന്റെ ഔദ്യാഗിക സൈറ്റ് വരെ ആ അന്വേഷണം നീണ്ടു. ആ സൈറ്റ് വഴി ഒരു കൌതുകത്തിന് വേണ്ടി ആദ്യം തന്നെ " BEENA " എന്ന പേര് സെര്‍ച്ച് ചെയ്തപ്പോള്‍ കിട്ടിയ വിവരങ്ങള്‍ ആണ് താഴെയുള്ള ചിത്രത്തില്‍ .



പിന്നീട്, എറണാകുളത്തെ മുന്‍ കലക്ടരായിരുന്ന ശ്രീ ഗ്യാനേഷ്‌ കുമാറിനെ ഞങ്ങള്‍ അതിലൂടെ അന്വേഷിച്ചു . അതിങ്ങനെ ലഭിച്ചു.



ഇവയിലെല്ലാം, IAS കിട്ടിയ ഉദ്യോഗസ്ഥര്‍ ഇപ്പോള്‍ പോസ്റ്റ് ചെയ്തിരിക്കുന്ന സ്ഥലവും അവരുടെ ജനന ത്തീയ്യതിയും എന്തിന് ,
ഇപ്പോള്‍ വാങ്ങുന്ന ശമ്പള സ്കെയിലും കൂടി പറഞ്ഞു തരും. അങ്ങനെ ഞങ്ങള്‍ siyab, shihab, shiyab എന്ന പേരില്‍ ഒക്കെ ആ സൈറ്റില്‍ തിരഞ്ഞു.
അതിന് മറുപടി കിട്ടിയത് ഇങ്ങനെ .

ഇനിയും സംശയം തീരാത്ത വായനക്കാര്‍ക്കായി ആ സൈറ്റിന്റെ ലിങ്ക് ഇവിടെ നല്കുന്നു.
നിങ്ങള്‍ക്ക് പരിചയമുള്ള ഏതൊരു IAS ഉദ്യോഗസ്ഥനെയും ഈ സൈറ്റിലൂടെ തിരയാം.
അതിന്റെ മറുപടിയില്‍നിങ്ങള്ക്ക് തൃപ്തി ആയങ്കില്‍ സിയാബിനെയും തിരഞ്ഞു നോക്കൂ.....

ഇനി ചിലപ്പോള്‍ ഞങ്ങളും നിങ്ങളുമൊക്കെ തിരയുന്നത് സിയാബിന്റെ ശരിയായ സ്പെല്ലിങ്ങ് ഉപയോഗിച്ച് അല്ലെങ്കില്‍ നമുക്കെല്ലാവര്‍ക്കും തെറ്റ് പറ്റാം.

5.അങ്ങനെയാണെങ്കില്‍ സിയാബിന്റെ ശരിക്കുള്ള ഔദ്യോഗിക നാമം എന്താണ്. സ്പെല്ലിങ്ങ് അടക്കം പറഞ്ഞുതരൂ. ഞങ്ങളെല്ലാവരും വീണ്ടും തിരഞ്ഞുനോക്കാം.

6. സിയാബ്‌, താങ്കള്‍ക്കു IAS കിട്ടി എന്ന് പറഞ്ഞു പൊന്നാനി എം ഇ എസ് കോളേജ് താങ്കളെ ആദരിച്ചിരുന്നില്ലേ? അവിടെ താങ്കള്‍ പ്രസംഗിക്കുകയും ചെയ്തു.ഈ വിഷയം താങ്കള്‍ എന്ത് കൊണ്ടു ബ്ലോഗില്‍ പറയുന്നില്ല? ശരിക്കും താങ്കള്‍ക്കു IAS കിട്ടിയിട്ടുണ്ടോ? ഉണ്ടെങ്കില്‍ ഏത് കേഡര്‍ ? ഏത് വര്‍ഷം ? പോസ്റ്റിങ്ങ് ആയത് എവിടെ ?

7. ഇപ്പോള്‍ , ബൂലോകത്തുള്ള പലരോടുംതാങ്കള്‍ പറഞ്ഞിരിക്കുന്നത് ജാര്‍ക്കണ്ടില്‍ സബ് കലക്ടര്‍ ആയി പ്രവേശിച്ചു , ഉന്നത പഠനത്തിനു വേണ്ടി അവധി എടുത്തിരിക്കുകയാണ് എന്നാണ്‍.
രണ്ടു വര്‍ഷത്തിലധികം ഒരു സിവില്‍ സര്‍വ്വീസുകാരന് ഇങ്ങനെ അവധിയെടുത്ത് മാറി നില്‍ക്കാന്‍ പറ്റുമോ ?

8. അവധിയെടുത്ത് Mphil പഠിക്കുകയാണെന്നു ചിലരോടും, ലണ്ടന്‍ സ്കൂള്‍ ഓഫ് എക്കണോമിക്സിന്റെ സ്കോളര്‍ഷിപ്പ്‌ കിട്ടിയതിനാലും,
അത് വര്‍ഷത്തില്‍ ഒരിക്കല്‍ , ഒരു ഇന്ത്യാക്കാരന് മാത്രം കിട്ടുന്ന ബഹുമതി ആയതിനാലും അങ്ങോട്ട് പോകുവാന്‍ വേണ്ടി മാത്രം Mphil പഠിക്കുന്നു എന്നും പലരോടും പറഞ്ഞിട്ടുണ്ടല്ലോ ? മാത്രമല്ല അവിടെ പോകുന്നതിനു മുപ്പതു വയസ്സ് കഴിയണം എന്നും പറഞ്ഞിരിക്കുന്നു.
ഇപ്പോള്‍ താങ്കള്‍ക്കു പ്രായം ഇരുപത്തി നാല്. ഇനിയും ആറു കൊല്ലം കൂടി കഴിഞ്ഞെങ്കില്‍ മാത്രമെ താങ്കള്‍ക്കു ലണ്ടന്‍ വാസം തരപ്പെടുകയുള്ളൂ.... അതായത് നീണ്ട ആറുകൊല്ലം ഐ എ എസ് പദവി ഇതിന് വേണ്ടി ഉപേക്ഷിക്കണോ? മേല്‍ പറഞ്ഞ ആ സ്കൂളിന്റെ വെബ് സൈറ്റില്‍ ഈ വക കാര്യങ്ങള്‍ ഉണ്ടോ ? അല്ലെങ്കില്‍ ഇതല്ലേ താങ്കള്‍ പറഞ്ഞ സൈറ്റ്?

9. വനിതാ, എം എം ടി വി , സി എന്‍ എന്‍ .ഐ ബി എന്‍ , മലയാള മനോരമ തുടങ്ങിയ മാദ്ധ്യമങ്ങളില്‍ താങ്കള്‍ക്കു IAS കിട്ടാന്‍ പോകുന്നു എന്ന രീതിയില്‍ വാര്‍ത്തകള്‍ വന്നു. പിന്നീട് താങ്കള്‍ പറയുന്നതുപോലെ താങ്കള്‍ക്ക് സിവില്‍ സര്‍വ്വീസ് കിട്ടിയെങ്കില്‍ എന്ത് കൊണ്ടു ഈ മാധ്യമങ്ങള്‍ താങ്കളെ ക്കുറിച്ചുള്ള വിവരങ്ങള്‍ , ആരെയും അസൂയപ്പെടുത്തുന്ന ആ വിജയെത്തെപ്പറ്റിയൊക്കെ പിന്നീട് പ്രസിദ്ധീകരിച്ചില്ല ? ചാനലുകളിലും പത്രങ്ങളിലൊമൊക്കെ താങ്കള്‍ നിറഞ്ഞുനിന്നില്ല ?!

10. മുകളില്‍ കൊടുത്തിരിക്കുന്ന ശലോം വാര്‍ത്താക്കുറിപ്പില്‍ IAS നു 142 -ആം റാങ്ക് ആണ് താങ്കള്‍ക്കു കിട്ടിയത് എന്ന് പറയുന്നതില്‍ വല്ല വാസ്തവവും ഉണ്ടോ ?

11. ഞങ്ങളുടെ അന്വേഷണം പലവഴികളിലൂടെ നീങ്ങി. താങ്കളുമായി പരിചയം ഉള്ളതും ചാറ്റ് മെയില്‍ തുടങ്ങിയതിലൂടെയൊക്കെ ബന്ധപ്പെടുകയും ചെയ്ത പലരുമായി ഞങ്ങളുടെ സംശയങ്ങള്‍ പങ്കുവെച്ചു. അപ്പോള്‍ അവരെല്ലാം സാക്ഷ്യപ്പെടുത്തുന്ന ഒരു കാര്യം താങ്കള്‍ 95 % മലയാളത്തില്‍ അല്ലെങ്കില്‍ മംഗ്ലീഷില്‍ മാത്രമേ എഴുതിക്കണ്ടിട്ടുള്ളൂ എന്നാണ്. ഇത്രയും വിവരവും വിദ്യാഭ്യാസവും ഉള്ള ആള്‍ ചാറ്റിലൂടെയും എന്ത് കൊണ്ടു രണ്ടു വരി തികച്ചു ഇംഗ്ലീഷില്‍ എഴുതുന്നില്ല ?

12. ഇംഗ്ലീഷില്‍ സംസാരിക്കാന്‍ ശ്രമിച്ച പലരോടും താങ്കള്‍ മറുപടി കൊടുക്കുന്നത് നല്ല നാടന്‍ മലയാളത്തില്‍ മാത്രമാണ്. സിവില്‍ സര്‍വ്വീസിന് വേണ്ടി പ്രിപ്പയര്‍ ചെയ്യുന്ന ഒരാള്‍ പോലും ഇംഗ്ലീഷ് ഭാഷ മനോഹരമായി കൈകാര്യം ചെയ്യും എന്നാണ് ഞങ്ങളുടെ വിശ്വാസം. അങ്ങനല്ലാതെ ഇന്റര്‍വ്യൂ പോലുള്ള കടമ്പകള്‍ കടക്കുക ബുദ്ധിമുട്ടാണെന്നാണ് ഞങ്ങള്‍ മനസ്സിലാക്കിയിരിക്കുന്നത്. ഈ അറിവ് തെറ്റാണെങ്കില്‍ താങ്കള്‍ തന്നെ തിരുത്തിത്തരണം. അതോ താങ്കല്‍ക്ക് മലയാളഭാഷയോടുള്ള അതിഭയങ്കരമായ സ്നേഹമാണോ ഈ മലയാളം /മംഗ്ലീഷ് ടൈപ്പിങ്ങിനും സംസാരത്തിനും പുറകില്‍ ?

13. ഇനി ഒരു സുപ്രധാന ചോദ്യം ചോദിക്കട്ടെ, താങ്കളുടെ " എന്റെ സ്വപ്‌നങ്ങള്‍ പൂവണിയുന്നു " എന്ന പോസ്റ്റില്‍ ഗൌരവത്തോടെ ഒരാള്‍ കമന്റ് ചെയ്തിരുന്നത് ഓര്‍ക്കുന്നുണ്ടാവുമല്ലോ? പൂര്‍ണ്ണമായും മലയാളത്തില്‍ ആയിരുന്ന ആ കമന്റ് മറ്റു വായനക്കാരുടെ അറിവിലേക്കായി ഏകദേശ രൂപം ഇവിടെ നല്‍കട്ടെ.....

" നിങ്ങളൊക്കെ എന്തറിഞ്ഞിട്ടാണ് ഈ സിയാബിനെ ഫോളോ ചെയ്യുകയും ഇവിടെ വന്ന് കമന്റിടുകയുമൊക്കെ ചെയ്യുന്നത് ? ഇയാള്‍ കഴിഞ്ഞ ഒരു വര്‍ഷത്തിലധികമായി ജനങ്ങളെ ഇതുപോലെ കബളിപ്പിച്ചുകൊണ്ടിരിക്കുകയാണ്. "
(സിയാബിന്റെ ബ്ലോഗിലെ കമന്റുകള്‍ മറുമൊഴിയിലേക്ക് പോകുന്നുണ്ടെങ്കില്‍ ഈ കമന്റ് ഇപ്പോഴും മറുമൊഴിയില്‍ ഉണ്ടാകും.)

ഈ കമന്റ് വന്നു സെക്കന്റുകള്‍ക്കകം അത് ഡിലീറ്റ് ചെയ്യപ്പെട്ടു. കുറച്ചു കഴിഞ്ഞു പോസ്റ്റും ഡിലീറ്റ് ആയി . അന്ന് തന്നെ ബ്ലോഗും കാണാതായി. പക്ഷെ, മൂന്നു ദിവസങ്ങള്‍ക്കു ശേഷം ബ്ലോഗ് പഴയത് പോലെ വന്നപ്പോള്‍ പ്രസ്തുത പോസ്റ്റില്‍ കാര്യമായ മാറ്റങ്ങള്‍ വന്നിരിക്കുന്നു. തിക്താനുഭവങ്ങളിലൂടെ കടന്നു വന്ന സിയാബ്‌, അത്തരം ഒരു കമന്റ്, വെറും ആരോപണം ആണെങ്കില്‍ എന്ത് കൊണ്ട് അതിനെ ചോദ്യം ചെയ്യാതെ മേല്‍പ്പറഞ്ഞതുപോലെ കമന്റ് ഡിലീറ്റ് ചെയ്യുകയും പോസ്റ്റ് എഡിറ്റ് ചെയ്യുകയുമൊക്കെ ചെയ്തു?

ഗൂഗിള്‍ കാഷില്‍ ‘സ്വപ്നങ്ങള്‍ വീണ്ടും പൂവണിയുന്നു‘ എന്ന ആ പഴയ പോസ്റ്റ് ഇപ്പോഴും കിടക്കുന്നുണ്ടെന്ന് മറക്കരുത് സിയാബ്. പുതിയ പോസ്റ്റും പഴയ പോസ്റ്റും തമ്മിലുള്ള അന്തരം തെളിവാവശ്യമുള്ളവര്‍ക്കായി ഇവിടെ പ്രദര്‍ശിപ്പിക്കാന്‍ ഞങ്ങള്‍ക്ക് ഒരു ബുദ്ധിമുട്ടുമില്ല.

14. താങ്കള്‍ക്കു സുഹൃത്തുക്കള്‍ മെനഞ്ഞെടുത്ത രണ്ടു ഓര്‍ക്കുട്ട് കമ്മ്യൂണിട്ടി ഉണ്ടല്ലോ . ഒന്നില്‍ താങ്കള്‍ തന്നെ യാണ് മോഡറേറ്റര്‍ ‍. തമിഴ്‌നാട് പൊളിറ്റിക്സ് എന്ന ബ്ലോഗ് കമ്മ്യൂണിറ്റിയില്‍ പോലും താങ്കളുടെ വിഷയം ബന്ധപ്പെടുത്തി ചര്‍ച്ചകള്‍ നടന്നു. അതിനര്‍ത്ഥം താങ്കളുടെ ഈ ‘സിവില്‍ സര്‍വ്വീസ് ‘വിഷയം മലയാളത്തിന്റെ അതിര്‍ വരമ്പുകള്‍ കടന്നിരിക്കുന്നു എന്നതാണ്. സുഹൃത്തുക്കളെ സമ്പാദിക്കാന്‍ എല്ലാവരും ഓര്‍ക്കുട്ട് ഉപയോഗിക്കുമ്പോള്‍ ‍, അതില്‍ ഒരു പ്രൊഫൈല്‍ പോലും ഉണ്ടാക്കാതെ, ബ്ലോഗില്‍ മാത്രം താങ്കള്‍ ശ്രദ്ധ കേന്ദ്രീകരിച്ചത്, താങ്കളുടെ കദനകഥകള്‍ക്ക് വേണ്ട പ്രസിദ്ധി കിട്ടാന്‍ വേണ്ടി മാത്രമായിരുന്നില്ലേ ? ഈ ‘പ്രസിദ്ധി‘ കൊണ്ട് താങ്കള്‍ എന്താണ് ഉദ്ദേശിച്ചിരുന്നത് / ഉദ്ദേശിക്കുന്നത് ?

15. ഇനിയാണ് ഏറ്റവും പ്രധാനമായ ചോദ്യം .താങ്കളുടെ ജീവിതാനുഭവങ്ങളില്‍ പറയുന്ന ബഹുമാനപ്പെട്ട എറണാകുളം ജില്ലാ കലക്ടര്‍ ശ്രീമതി ബീന താങ്കളുടെ ജീവിതത്തില്‍ വളരെ സ്വാധീനം ചെലുത്തിയ ഒരു വ്യക്തിത്വം ആണെന്ന് താങ്കളുടെ പോസ്റ്റുകളില്‍ ആവര്‍ത്തിച്ച് വ്യക്തമാക്കിയിട്ടുണ്ട്.

താങ്കളെക്കുറിച്ചുള്ള ചില പത്രവാര്‍ത്തകളില്‍ കളക്‍ടര്‍ ഡോ: ബീനയെക്കുറിച്ചുള്ള പരാമര്‍ശം കണ്ടതിനേത്തുടന്ന് ‘നമ്മുടെ ബൂലോകം‘ പ്രതിനിധികള്‍ ഇതിനെപ്പറ്റി ബഹുമാനപ്പെട്ട ബീന മാഡവുമായി നേരില്‍ സംസാരിച്ചപ്പോള്‍ ലഭിച്ച വിവരങ്ങള്‍ താങ്കള്‍ പറയുന്ന കാര്യങ്ങളുമായി പൊരുത്തപ്പെടുന്നില്ല.

ഉദാഹരണത്തിന് ‌....,

താങ്കള്‍ താഴെപ്പറയുന്ന പോലെയൊക്കെ ബഹുമാനപ്പെട്ട കളക്ടറെ ക്കുറിച്ച് താങ്കളുടെ ബ്ലോഗില്‍ പറയുന്നുണ്ട്........
“ അന്ന് രാത്രി ഒരു പത്തു മണിക്ക് എന്നെ ഞെട്ടിച്ചു കൊണ്ടു എനിക്ക് മാഡത്തിന്റെ ഫോണ്‍ വരികയും ചെയ്തു. കുറച്ചു നേരത്തേക്ക് എനിക്ക് എന്ത് സംസാരിക്കണം എന്നുപോലും അറിയാതെ ഞാന്‍ നിന്നു പോയി. പിന്നെ സംയമനം വീണ്ടെടുത്തു ഞാന്‍ എന്റെ ആവശ്യം അറിയിച്ചു. പിറ്റേ ദിവസം രാവിലെ അവരുടെ വീട്ടിലേക്ക് ചെല്ലാന്‍ പറയുകയും അവിടെ വന്നു സംസാരിക്കാം എന്നും പറഞ്ഞു അവര്‍ സംഭാഷണം അവസാനിപ്പിച്ചു. ആ ഫോണിലേക്ക് നോക്കി ഞാന്‍ കുറച്ചു നേരം ഇരിക്കുകയും പിന്നീട് അച്ചനോട് ചെന്നു സന്തോഷ വാര്‍ത്ത‍ അറിയിക്കുകയും ചെയ്തു. പിറ്റേ ദിവസം രാവിലെ എന്നോട് പറഞ്ഞ സമയത്തു തന്നെ ചെന്നു. വളരെ ഹൃദ്യമായ പെരുമാറ്റം ആയിരുന്നു എനിക്ക് അവിടെ നിന്നു ലഭിച്ചത്. എന്നോട് എല്ലാ കാര്യങ്ങളും ചോദിച്ചറിയുകയും മെയിന്‍ പരീക്ഷക്ക്‌ വേണ്ട മുഴുവന്‍ കാര്യങ്ങളും പറഞ്ഞു തരികയും ചെയ്തു. എല്ലാ വിധ സഹായങ്ങളും ചെയ്തു തരികയും ചെയ്തു. ആ കൂടിക്കാഴ്ച ഒരു വഴിത്തിരിവ്‌ ആയി മാറുകയായിരുന്നു. പിന്നീട് എന്റെ ജീവിതത്തില്‍ ഉണ്ടായ ഓരോകാര്യങ്ങള്‍ക്കും തീരുമാനങ്ങള്‍ എടുത്തിരുന്നത് മാഡം ആയിരുന്നു. എന്നെ ഒരനിയനെ പ്പോലെ കരുതി സ്നേഹിക്കുകയും ഒരു ചേച്ചിയുടെ വാല്‍സല്യം തരുകയും ചെയ്തിരുന്നു. മെയിന്‍ പരീക്ഷയ്ക്കു തയാറെടുത്ത മൂന്നുമാസങ്ങളിലും പഠനകാര്യങ്ങള്‍ വിളിച്ചു അനോഷിക്കുകയും വേണ്ട സഹായങ്ങള്‍ അപ്പപ്പോള്‍ ചെയ്തു തരികയും ചെയ്തിരുന്നു. പിന്നീട് ജീവിതത്തിന്റെ ഓരോ ഘട്ടങ്ങളിലും ഉപദേശങ്ങളും സഹായങ്ങളും എപ്പോഴും ഉണ്ടായിരുന്നു. ..........

അച്ചനോടും മറ്റെമ്മയോടും വീട്ടില്‍ നിന്നും എല്ലാം അനുഗ്രഹം മേടിച്ച ശേഷം ഞാനും പ്രമോദും കൂടി ബീനമാഡത്തിന്റെ വീട്ടിലേക്ക് പോയി.മാഡം എന്നെ അനുഗ്രഹിച്ചു ഞങ്ങള്‍ക്കു ട്രെയിനില്‍ കഴിക്കാനുള്ള ഭക്ഷണവുംതയ്യാറാക്കി തന്നു...........
ഈ വിഷയം സംബന്ധിച്ച് ശ്രീമതി ബീനാ മാഡത്തിനെ ഞങ്ങളുടെ 3 പ്രധിനിധികള്‍ നേരിട്ടും ഫോണിലൂടെയും ബന്ധപ്പെട്ടിരുന്നു. അപ്പോള്‍ , സിയാബ്‌ തന്നെ ഒരുതവണ വന്നു കണ്ടിരുന്നതായും പാവപ്പെട്ട ഒരു വീട്ടിലെ കുട്ടി എന്ന നിലയ്ക്ക് ഒരു സഹായമായിക്കോട്ടേ എന്ന് കരുതി സിവില്‍ സര്‍വ്വീസ് പരീക്ഷയ്ക്ക് തയ്യാറെടുക്കേണ്ടത് എങ്ങിനെയൊക്കെയാണെന്ന് ആവശ്യമായ നിര്‍ദ്ദേശങ്ങള്‍ നല്കി അയക്കുകയും ചെയ്തു എന്ന് പറഞ്ഞു. ഏതാനും ദിവസം കഴിഞ്ഞപ്പോള്‍ ഏതോ പത്രത്തില്‍ സിയാബിനെപ്പറ്റി സിവില്‍ സര്‍വ്വീസുമായി ബന്ധപ്പെട്ട് വന്ന വാര്‍ത്തയില്‍ ബീനാ മാഡമാണ് എല്ലാ കാര്യങ്ങളും നിരന്തരമായി സഹായിച്ചുകൊണ്ടിരുന്നത് എന്ന് എഴുതിയിരിക്കുന്നത് കണ്ട് കളക്‍ടര്‍ ബീന ഞെട്ടിപ്പോകുകയാണുണ്ടായതെന്നാണ് ഞങ്ങള്‍ക്കറിയാന്‍ കഴിഞ്ഞത്. ഒന്നിലധികം പ്രാവശ്യം താങ്കളെ കണ്ടിട്ടോ സംസാരിച്ചിട്ടോ ഇല്ലെന്നും , രണ്ടാമത്തെ പ്രാവശ്യം താങ്കള്‍ അവരെ കാണാന്‍ ചെന്നപ്പോള്‍ താങ്കള്‍ക്ക് കാണാനുള്ള അനുവാദം നിഷേധിച്ചു എന്നും മാഡം പറയുന്നു.

സിയാബ്‌, പറയൂ ഇതില്‍ എത്രമാത്രം വാസ്തവം ഉണ്ട്? താങ്കള്‍ യഥാര്‍ത്തത്തില്‍ എത്ര പ്രാവശ്യം മാഡത്തെ കണ്ടിട്ടുണ്ട്? മാഡം പറയുന്നത് നിങ്ങള്‍ക്ക് ഖണ്ഡിക്കാനാകുമോ ? എന്താണിതിലെ സത്യാവസ്ഥ ? മാഡം പറയുന്നതാണ് ശരിയെങ്കില്‍ പലയിടത്തും മാഡത്തിന്റെ പേര് താങ്കള്‍ മിസ്സ് യൂസ് ചെയ്യുന്നത് എന്തിനാണ്?

മാഡവുമായി ഞങ്ങള്‍ സംസാരിച്ചിട്ടുണ്ടോ എന്നറിയാനും അപ്പോള്‍ മാഡം തന്ന മറുപടി എന്താണെന്നുമൊക്കെ അറിയാന്‍ ബീനാ മാഡവുമായിത്തന്നെ ആര്‍ക്ക് വേണമെങ്കിലും സംസാരിക്കാം. രാവിലെ ഒരു മണിക്കൂര്‍ സമയം അവര്‍ തന്റെ ക്യാമ്പ് ഓഫീസില്‍ പൊതുജനവുമായി സമ്പര്‍ക്കം പുലര്‍ത്താറുണ്ട്. പുറത്ത് ഗേറ്റിലുള്ള പോലീസ് ഉദ്യോഗസ്ഥരെ നിങ്ങളുടെ ആഗമനോദ്യേശ്യം പറഞ്ഞ് മനസ്സിലാക്കിക്കൊടുത്താല്‍ ബീനാ മാഡത്തെ കാണാന്‍ ഒരു ബുദ്ധിമുട്ടുമില്ല.

16. ഞങ്ങള്‍ സംസാരിച്ചപ്പോളൊക്കെ ബീനാ മാഡം എടുത്ത് പറഞ്ഞ ഒരു വാചകമുണ്ട് - അയാള്‍ സിവില്‍ സര്‍വ്വീസ് പരീക്ഷകള്‍ എല്ലാം പാസ്സായിട്ടൊന്നുമില്ല്ല . ഇപ്പറയുന്നത് എറണാകുളം ജില്ലാ കളക്‍ടര്‍ ആണെന്നുള്ളത് മറക്കരുത്. ങ്ങങ്ങള്‍ക്കവരെ പൂര്‍ണ്ണമായും വിശ്വസിച്ചേ പറ്റൂ. വ്യക്തതയില്ലാത്ത പോസ്റ്റുകള്‍ എഴുതി ബ്ലോഗിലിടുന്ന സിയാബിനേക്കാള്‍ ഞങ്ങള്‍ക്ക് വിശ്വാസം സിവില്‍ സര്‍വ്വീസില്‍ ഇരിക്കുന്ന കളക്‍ടര്‍ ഡോ:ബീനയെത്തന്നെയാണ്. നിങ്ങള്‍‍ക്കെന്തെങ്കിലും പറയാനുണ്ടോ സിയാബ് ? പറയൂ ഞങ്ങള്‍ക്കും, വായനക്കാര്‍ക്കും അറിയാന്‍ താല്‍പ്പര്യം ഉണ്ട്.

‍ബൂലോകത്ത് തികഞ്ഞ സൌഹാര്‍ദ്ദങ്ങള്‍ ഉണ്ട്, വെറുപ്പുകള്‍ ഉണ്ട്, കളിയാക്കലും പരിഭവം പറച്ചിലുകളും ഉണ്ട്. എന്നിരുന്നാലും ബ്ലോഗെഴുതുന്ന ബൂലോകര്‍ മനസ്സുകൊണ്ട് ഒന്നാണ് . ബ്ലോഗ് എന്ന മാദ്ധ്യമത്തിന്റെ വളര്‍ച്ച കാംക്ഷിക്കുന്നവരാണ്. അതുകൊണ്ടുതന്നെ നമു‍ക്കിടയിലുള്ള ഒരു വ്യക്തി ബ്ലോഗ് എന്ന മാധ്യമത്തെ അപകീര്‍ത്തിപ്പെടുത്തുന്ന രീതിയില്‍ പ്രവര്‍ത്തിക്കുന്നുണ്ടെങ്കില്‍ / പ്രവര്‍ത്തിച്ചാല്‍ കൂട്ടായ്മയോടെ ആ വസ്തുത പുറത്തു കൊണ്ടു വരേണ്ട ബാധ്യത ഒരു ബ്ലോഗ് പത്രം എന്ന നിലയില്‍ ഞങ്ങള്‍ക്കുണ്ട്‌ എന്ന് ഞങ്ങള്‍ കരുതുന്നു.

അതിനാലാണ് സംശയ നിവാരണത്തിനായി ഈ ചോദ്യങ്ങള്‍ ഞങ്ങള്‍ ചോദിക്കുന്നത്. ഈ വിഷയത്തില്‍ ധാരാളം തെളിവുകള്‍ ഞങ്ങളുടെ കൈവശം ഉണ്ട്. കഴിഞ്ഞ രണ്ടു മാസക്കാലമായി നിരന്തരം നടന്ന അന്വേഷണങ്ങള്‍ക്കും പഠനങ്ങള്‍ക്കും ഒടുവില്‍ ആണ് ഈ വസ്തുതകള്‍ ഇപ്പോള്‍ ഞങ്ങള്‍ പ്രസിദ്ധീകരിക്കുന്നത്. ഇവിടെ സിയാബിനും , സിയാബിനെ അനുകൂലിക്കുന്നവര്‍ക്കും, പ്രതികൂലിക്കുന്നവര്‍ക്കും അഭിപ്രായങ്ങള്‍ അറിയിക്കാം. അതിന് ശേഷം ഈ വിഷയത്തെപ്പറ്റിയുള്ള കൂടുതല്‍ നടുക്കുന്ന ചോദ്യങ്ങളും വസ്തുതകളുമൊക്കെ അടുത്ത ഭാഗങ്ങളില്‍ ഞങ്ങള്‍ വെളിപ്പെടുത്തുന്നതാണ്.

ഇക്കാര്യങ്ങളൊക്കെയും സംശയങ്ങള്‍ എന്ന രീതിയില്‍ താങ്കളോട് നേരിട്ട് ചോദിച്ചാല്‍പ്പോരായിരുന്നോ, പരസ്യമായി ഇങ്ങനെ പത്രത്തിലൂടെ വേണമായിരുന്നോ, എന്ന് സിയാബിനോ നമ്മൂടെ ബൂലോകത്തിന്റെ വായനക്കാര്‍ക്കോ ഈ അവസരത്തില്‍ തോന്നിയേക്കാം. അതിന് കൃത്യമായ ഉത്തരം ഞങ്ങള്‍ക്കുണ്ട്. താമസിയാതെ അതൊക്കെ ഞങ്ങള്‍ പ്രസിദ്ധീകരിക്കുന്നതാണ്. തല്‍ക്കാലം ഈ സംശയങ്ങള്‍ക്ക് സിയാബ് മറുപടി തരുക.

അവസാനമായി സിയാബിനോട് ഒരു വാക്ക് കൂടി...., സിയാബ്‌, താങ്കള്‍ ഇനി ആ ബ്ലോഗ്‌ തന്നെ ഡിലീറ്റ് ചെയ്താലും ഗൂഗിള്‍ ക്യാഷില്‍ നിന്നും എല്ലാം തിരികെ ലഭിക്കുമെന്ന് ഇപ്പോള്‍ എറണാകുളത്തുള്ള ഒരു സ്ഥാപനത്തില്‍ വെബ്‌ അഡ്മിനിസ്ട്രേഷന്‍ വിഭാഗത്തില്‍ ജോലി (സ്ഥാപനം ഏതെന്ന് ഇപ്പോള്‍ ഞങ്ങള്‍ വെളിപ്പെടുത്തുന്നില്ല) ചെയ്യുന്ന താങ്കള്‍ക്ക് പ്രത്യേകം പറഞ്ഞു തരേണ്ട ആവശ്യം ഇല്ലല്ലോ ? അതേപോലെ താങ്കളുടെ പോസ്റ്റുകളുടെയെല്ലാം സ്ക്രീന്‍ ഷോട്ടുകള്‍ ഞങ്ങള്‍ എടുത്തുവെച്ചിട്ടുണ്ട്. ഇതിനൊക്ക പുറമേ താങ്കളുടെ പോസ്റ്റുകള്‍ ജനങ്ങള്‍ ആരാധനയോടേയും അഭിമാനത്തോടെയുമൊക്കെ വായിച്ച് മനസ്സിലേറ്റിക്കഴിഞ്ഞിരിക്കുന്നു. നേരിട്ട് ഗൂഗിള്‍ തന്നെ അതൊക്കെ ഡിലീറ്റ് ചെയ്താല്‍പ്പോലും അതൊന്നും വായനക്കാരുടെ മനസ്സില്‍ നിന്ന് പോകില്ല. അവര്‍ താങ്കള്‍ക്ക് തന്ന ബഹുമാനവും , ആദരവുമൊക്കെ നഷ്ടപ്പെടുത്തരുതെന്നുണ്ടെങ്കില്‍ താങ്കള്‍ ഈ ചോദ്യങ്ങള്‍ മറുപടി തന്നേ മതിയാകൂ.

തൃപ്തികരമായ വിശദീകരണം ലഭിക്കുന്നുവെങ്കില്‍ ഞങ്ങളുടെ എല്ലാ വിധ പിന്തുണയും താങ്കള്‍ക്കുണ്ടായിരിക്കും.


(തുടർന്ന് വായിക്കാൻ ഇവിടെ ക്ലിക്ക് ചെയ്യുക.)