യാത്രകള്‍ ഡോട്ട് കോം

സുഹൃത്തുക്കളേ

ഇന്റര്‍നെറ്റില്‍ , അവിടവിടെയായി ചിതറിക്കിടക്കുന്ന മലയാളം യാത്രാവിവരണങ്ങളെ ഒരു കുടക്കീഴില്‍ അണിനിരത്താനുള്ള ഒരു ശ്രമം നടക്കുന്നതിനെപ്പറ്റിയുള്ള ഒരു അറിയിപ്പാണ് ഇത്.

ഈ അവശ്യത്തിലേക്കായി www.yathrakal.com എന്ന ഒരു സൈറ്റ് രജിസ്റ്റര്‍ ചെയ്ത് അതിന്റെ പ്രവര്‍ത്തനങ്ങള്‍ ലക്ഷ്യത്തിലേക്ക് അടുത്തുകൊണ്ടിരിക്കുകയാണ്. ഈ സംരംഭം മലയാളം ഇന്റര്‍നെറ്റിന്റെ ചരിത്രത്തിലെ നിര്‍ണ്ണായകമായ ഒരു കാല്‍‌വെയ്പ്പ് ആയിരിക്കുമെന്ന്‍ മാത്രമല്ല, ആദ്യത്തേതുമായിരിക്കും. ഈ സൈറ്റില്‍ കേരളത്തിലെ പോസ്റ്റുകള്‍ ജില്ല തിരിച്ചും, ഇന്ത്യയിലെ പോസ്റ്റുകള്‍ സംസ്ഥാനം തിരിച്ചും വിദേശ പോസ്റ്റുകള്‍ രാജ്യം തിരിച്ചുമാണ് പബ്ലിഷ് ചെയ്യാന്‍ പോകുന്നത്. ഒരു യാത്ര പോകുന്നതിന് മുന്‍പ് എല്ലാം മലയാളിക്കും സന്ദര്‍ശിക്കാന്‍ പറ്റുന്ന ഒരു സൈറ്റായി ഭാവിയില്‍ ഇതു മാറും. ഒരു റെഫറന്‍സ് സൈറ്റ് എന്നുതന്നെ പറയാം.

ഇതൊന്നുമല്ലെങ്കിലും ഇത്രയുമധികം യാത്രാവിവരണങ്ങള്‍ ഒരൊറ്റ സൈറ്റില്‍ത്തന്നെ വന്നാല്‍ അത് വായനക്കാര്‍ക്ക് സൌകര്യപ്രദവും ഉപകാരപ്രദവും ആകുമെന്നതില്‍ സംശയമില്ല. മാത്രമല്ല ഇതിലുള്ള ഓരോ മലയാളം യാത്രാവിവരണങ്ങളും പിന്നീട് ഇംഗ്ലീഷിലേക്ക് പരിഭാഷപ്പെടുത്തി ഇതിനെ ഒരു അന്താരാഷ്ട്രനിലവാരത്തിലേക്ക് ഉയര്‍ത്താനും എല്ലാത്തരം വായനക്കാര്‍ക്കും പ്രയോജനപ്പെടുന്ന രീതിയിലേക്ക് കൊണ്ടുവരാനും ശ്രമിക്കുന്നതായിരിക്കും. ആ സംരംഭം കൂടെ പൂര്‍ത്തിയാകുന്നതോടെ മലയാളി അല്ലാത്തവര്‍ക്കും ഉപകാരപ്രദമായ ഒരു സൈറ്റായി ഇത് മാറും.

തല്‍ക്കാലം ഈ സൈറ്റ് ഇന്‍‌വൈറ്റഡ് മെമ്പേര്‍സിന് മാത്രമേ കാണാനാകൂ. സൈറ്റ് ലോഞ്ച് ചെയ്യുന്നതോടെ യാത്രാവിവരണങ്ങള്‍ എല്ലാ വായനക്കാര്‍ക്കും കാണാനാകും. സൈറ്റ് ഔദ്യോഗികമായി ലോഞ്ച് ചെയ്യുന്നതിന്റെ തീയതിയും മറ്റ് കാര്യങ്ങളൊമൊക്കെ എല്ലാവരേയും അപ്പപ്പോള്‍ നമ്മുടെ ബൂലോകം വഴി തന്നെ അറിയിക്കുന്നതാണ്.

മലയാളത്തില്‍ യാത്രാവിവരണങ്ങള്‍ എഴുതുന്ന ആത്മന്‍ , അച്ചായന്‍ , അപ്പു, ബിന്ദു ഉണ്ണി, ക്യാപ്റ്റന്‍ ഹാഡോക്ക്, ചേച്ചിപ്പെണ്ണ്, ഡോ:ബാബുരാജ്, ഫൈസല്‍ മുഹമ്മദ്, ജ്യോതി മോഹന്‍‌ദാസ്, കൊച്ചുത്രേസ്യ , കുഞ്ഞായി, കുഞ്ഞന്‍സ്, മണികണ്ഠന്‍ , മൈന ഉമൈബാന്‍, നസീഫ് യു.അരീക്കോട്, നീര്‍‌വിളാകന്‍, നിരക്ഷരന്‍, ഒരു യാത്രികന്‍, റാണി ദീപ, സജി മാര്‍ക്കോസ് , സജി തോമസ് (ഞാനും എന്റെ ലോകവും), ഷിജു അലക്സ് , സിജോ ജോര്‍ജ്ജ്, ശിവ, സിയ ഷാമിന്‍, സോജന്‍ പി. ആര്‍ , വിഷ്ണു, എന്നിങ്ങനെ 35ല്‍പ്പരം യാത്രാവിവരണ എഴുത്തുകാര്‍ ഈ സംരംഭവുമായി ഇതിനകം സഹകരിച്ചു കഴിഞ്ഞു. ഇതിനകം തന്നെ ഇവരുടെയെല്ലാം ചേര്‍ത്ത് 200ന് മുകളില്‍ യാത്രാവിവരണങ്ങള്‍ ഈ സൈറ്റിലേക്ക് അപ്പ്ലോഡ് ചെയ്തുകഴിഞ്ഞു. ഇനിയിപ്പോള്‍ സൈറ്റ് ലോഞ്ച് ചെയ്യാനുള്ള ക്രമീകരണങ്ങള്‍ ആണ് നടന്നു കൊണ്ടിരിക്കുന്നത്.

ആരെങ്കിലും ഒരു പുതിയ യാത്രാവിവരണം എഴുതുമ്പോള്‍ അത് അവരവരുടെ ബ്ലോഗില്‍ത്തന്നെ ആയിരിക്കുമല്ലോ പബ്ലിഷ് ചെയ്യുക. എന്നാല്‍ , ഒരു നിശ്ചിത സമയം (ഉദാഹരണത്തിന് മൂന്ന്‍ ആഴ്ച്ച) കഴിയുമ്പോള്‍ ആ പോസ്റ്റ് ഈ പുതിയ സൈറ്റിലേക്ക് അപ്പ്ലോഡ് ചെയ്യാനായി അയച്ചുതരണമെന്ന് അഭ്യര്‍ത്ഥിക്കുന്നു. നേരിട്ട് ഈ സൈറ്റിലേക്ക് യാത്രാവിവരണങ്ങള്‍ തരാന്‍ താല്‍പ്പര്യമുള്ളവര്‍ക്ക് അതുമാകാം. അങ്ങനെ താല്‍പ്പര്യമുള്ളവര്‍ക്ക് പോസ്റ്റ് ചെയ്യാനുള്ള റൈറ്റ് നല്‍കുന്നതാണ്. ഞങ്ങളുമായി ബന്ധപ്പെടുവാനുള്ള അഡ്രസ്സ് editor@yathrakal.com എന്നതാണ്.

നിങ്ങള്‍ക്ക് ഓരോരുത്തര്‍ക്കും ഒരു യാത്രാവിവരണമെങ്കിലും സ്വന്തം ബ്ലോഗിലോ വെബ് പോര്‍ട്ടലിലോ സ്വന്തമായിട്ടുണ്ടെങ്കില്‍ ,അത് editor@yathrakal.com എന്ന വിലാസത്തിലേക്ക് അയച്ചുതരിക.ലേഖനങ്ങള്‍ അയക്കുമ്പോള്‍ ഓരോ പോസ്റ്റിന്റേയും html code കോപ്പി ചെയ്ത് ഓരോ പോസ്റ്റും ഓരോ വ്യത്യസ്ത മെയിലുകളായി അയക്കണം. മെയിലില്‍ സബ്‌ജക്റ്റ് കോളത്തില്‍ പോസ്റ്റിന്റെ ടൈറ്റിലും, ഏത് ജില്ല/സംസ്ഥാനം/രാജ്യം/ എന്നതും കാണിച്ചാല്‍ കാര്യങ്ങള്‍ എളുപ്പമായി.

‘എന്റെ ലേഖനം മറ്റുള്ളവരുടെ നിലവാരത്തിനൊപ്പം വരില്ല‘ എന്ന് ശങ്കിച്ച് മടിച്ച് നില്‍ക്കാതെ നിങ്ങളുടെ ലേഖനം, അത് എത്ര ചെറുതായാലും, ഒരു സ്ഥലപരിചയം മാത്രമായാലും, ഫോട്ടോകളിലൂടെ മാത്രം പറയുന്ന ഒരു യാത്രാവിവരണമായാലും അയച്ചുതരിക. തുടര്‍ന്നുള്ള നിങ്ങളുടെ ഓരോ യാത്രകളും ഒരു വിവരണത്തിന് ഉതകുന്ന തരത്തിലുള്ളതാക്കി മാറ്റാന്‍ ശ്രമിക്കുക. അത് നിങ്ങളുടെ ബ്ലോഗുകളില്‍ത്തന്നെ ഇട്ട് നിര്‍ദ്ദേശങ്ങളും അഭിപ്രായങ്ങളും മനസ്സിലാക്കിയതിനുശേഷം ഞങ്ങള്‍ക്ക് അയച്ചുതരിക.

ഈ സൈറ്റുമായി ബന്ധപ്പെട്ട് ഇനിയും ഒരുപാട് പദ്ധതികള്‍ ആലോചനയിലുണ്ട്. അതൊക്കെ നിങ്ങള്‍ക്ക് കൂടെ പ്രയോജനമുണ്ടാക്കാന്‍ പോകുന്ന തരത്തിലുള്ളതാണ്. അതുകൊണ്ട് മടിച്ചുനില്‍ക്കാതെ ഈ സൈറ്റിന്റെ പ്രവര്‍ത്തനങ്ങളില്‍ ഭാഗഭാക്കാകൂ. നമുക്ക് നഷ്ടപ്പെടാന്‍ ഒന്നുമില്ല. തുറന്ന് കിട്ടാന്‍ പോകുന്നതോ യാത്രകളുടെ ഒരു പുതിയ ലോകം തന്നെയാണ്.

-നിരക്ഷരന്‍
(അന്നും ഇന്നും എപ്പോഴും)

എഡിറ്റര്‍
www.yathrakal.com